ମୁମ୍ବାଇ,୩।୧୦: ବଲିଉଡ ସୁପରଷ୍ଟାର ସଲମାନ ଖାନଙ୍କ ଆଗାମୀ ୱାର୍-ଡ୍ରାମା ଫିଲ୍ମ ନେଇ ଆସିଛି ଖୁସି ଖବର। ଦୀର୍ଘଦିନ ଧରି ରିଲିଜକୁ ନେଇ ଚାଲିଥିବା ଅନିଶ୍ଚିତତା ମଧ୍ୟରେ ଫିଲ୍ମକୁ ଥିଏଟରରେ ପ୍ରଦର୍ଶନ ପାଇଁ ସରକାରୀ ଅନୁମତି ମିଳିଛି। ଏହି ଫିଲ୍ମଟି ପୂର୍ବରୁ ‘ବ୍ୟାଟଲ ଅଫ ଗଲୱାନ’ନାମରେ ତିଆରି ହେଉଥିଲା। ତେବେ ଫିଲ୍ମର କାମ ଶେଷ ହେବା ପରେ ଏହାର ନାମ ବଦଳାଇ ‘ମାତୃଭୂମି’ ରଖାଯାଇଥିଲା। ୨୦୨୦ରେ ଭାରତ ଓ ଚାଇନା ସେନା ମଧ୍ୟରେ ଗଲୱାନ ଘାଟିରେ ଘଟିଥିବା ସଂଘର୍ଷକୁ ଆଧାର କରି ଫିଲ୍ମଟି ନିର୍ମିତ ହୋଇଛି।
ଫିଲ୍ମରେ ଚାଇନା ସହ ଜଡ଼ିତ ଅନେକ ଦୃଶ୍ୟ ରହିଥିଲା। ଭାରତ-ଚାଇନା ସମ୍ପର୍କରେ ସୁଧାରକୁ ଦୃଷ୍ଟିରେ ରଖି ରକ୍ଷା ମନ୍ତ୍ରଣାଳୟ ପକ୍ଷରୁ ଫିଲ୍ମର କିଛି ଦୃଶ୍ୟକୁ ନେଇ ଆପତ୍ତି ଉଠିଥିବା କୁହାଯାଇଛି।
ଏହାପରେ ଫିଲ୍ମ ନିର୍ମାତାମାନେ ଆବଶ୍ୟକ କଟ ଏବଂ ଏଡିଟ କରି ନୂଆ ଭର୍ସନ ପ୍ରସ୍ତୁତ କରିଥିଲେ। ନୂଆ ଭର୍ସନକୁ ଦେଖିବା ପରେ ଅଧିକାରୀମାନେ ସନ୍ତୁଷ୍ଟ ହୋଇଥିବା ଏବଂ ଗତ ସପ୍ତାହରେ ଫିଲ୍ମକୁ ଥିଏଟରରେ ପ୍ରଦର୍ଶନ ପାଇଁ NOC ମିଳିଥିବା ଜଣାପଡ଼ିଛି।
ସଲମାନ ଫିଲ୍ମର ରିଲିଜ ପାଇଁ ୧୩ ନଭେମ୍ବର ଉପରେ ନଜର ରଖିଛନ୍ତି। ଦୀପାବଳି ପରବର୍ତ୍ତୀ ସମୟରେ ଦର୍ଶକଙ୍କ ମଧ୍ୟରେ ଉତ୍ସବର ମାହୋଲ ରହୁଥିବାରୁ ଏହି ସମୟ ଫିଲ୍ମ ପାଇଁ ଉପଯୁକ୍ତ ହୋଇପାରେ ବୋଲି ଆଲୋଚନା ହେଉଛି। ତେବେ ଏପର୍ଯ୍ୟନ୍ତ ଫିଲ୍ମର ନିର୍ମାତାଙ୍କ ପକ୍ଷରୁ ରିଲିଜ ତାରିଖ ନେଇ କୌଣସି ଅଧିକାରିକ ଘୋଷଣା କରାଯାଇନାହିଁ।
ସରକାରୀ NOC ମିଳିଥିଲେ ମଧ୍ୟ ଫିଲ୍ମର ସେନ୍ସର ପ୍ରକ୍ରିୟା ଏବେ ବାକି ରହିଛି। ନିର୍ମାତାମାନେ ଖୁବଶୀଘ୍ର ଫିଲ୍ମଟିକୁ ସେଣ୍ଟ୍ରାଲ ବୋର୍ଡ ଅଫ ଫିଲ୍ମ ସାର୍ଟିଫିକେସନ (CBFC) ନିକଟରେ ଦାଖଲ କରିବେ ବୋଲି ଚର୍ଚ୍ଚା ହେଉଛି। CBFCରୁ ମଧ୍ୟ ଅନୁମତି ମିଳିଲେ ଏବଂ ଚଳିତ ମାସରେ ସମସ୍ତ ପ୍ରକ୍ରିୟା ଶେଷ ହେଲେ, ନଭେମ୍ବର ୧୩ରେ ‘ମାତୃଭୂମି’ ରିଲିଜ ହେବାର ସମ୍ଭାବନା ରହିଛି। ତେବେ ଏନେଇ ଆଗାମୀ କିଛି ଦିନରେ ଅଧିକ ସ୍ପଷ୍ଟତା ମିଳିପାରେ।
ଦେଶଭକ୍ତିର ଭାବନା ଏବଂ ଗଲୱାନ ଘଟଣାକୁ କେନ୍ଦ୍ର କରି ତିଆରି ହୋଇଥିବା ଏହି ୱାର୍-ଡ୍ରାମାକୁ ନେଇ ସଲମାନଙ୍କ ପ୍ରଶଂସକଙ୍କ ମଧ୍ୟରେ ଦୀର୍ଘଦିନ ଧରି ଉତ୍ସୁକତା ରହିଛି। ଏବେ ସରକାରୀ କ୍ଲିୟରାନ୍ସ ପରେ ଫିଲ୍ମଟି ଖୁବଶୀଘ୍ର ବଡ଼ ପରଦାକୁ ଆସିବ ବୋଲି ଆଶା ବଢ଼ିଛି।
Dharitri – Odisha’s No.1 Odia Daily
