ଭୋପାଳ, ୧୩।୧୦: ଆଗାମୀ ପାର୍ବଣ ଋତୁକୁ ନଜରରେ ରଖି ପାର୍ସଲ ମାଧ୍ୟମରେ ଠକେଇ ମାମଲା ବଢ଼ିବାରେ ଲାଗିଛି। ଦିଲ୍ଲୀର ୨ଜଣ ଠକ ନାମିଦାମୀ ବ୍ରାଣ୍ଡର ମୋବାଇଲକୁ ଶସ୍ତାରେ ଯୋଗାଇ ଦେବାର ପ୍ରତିଶ୍ରୁତି ଦେଇ ପାର୍ସଲରେ ପଥର ପଠାଇ ୧୭୦ ଜଣ ଲୋକଙ୍କୁ ଠକିଛନ୍ତି। ଠକେଇର ଶିକାର ହୋଇଥିବା ଲୋକଙ୍କ ମଧ୍ୟରେ ଭୋପାଳର ୫ଜଣ ରହିଛନ୍ତି। ଏନେଇ ବିଭିନ୍ନ ଥାନାରେ ମାମଲା ରୁଜୁ ହୋଇଛି।
କୋଲାର ରୋଡ୍ ନିବାସୀ କୁବେର ନିବାରେ କହିଛନ୍ତି, ‘କିଛିଦିନ ତଳେ ତାଙ୍କ ମୋବାଇଲକୁ ଏକ ଅଜ୍ଞାତ ନମ୍ବରରୁ ଫୋନ୍ ଆସିଥିଲା। ଫୋନ କରିଥିବା ଲୋକଜଣଙ୍କ ନିଜକୁ ଏକ ଦାମୀ ଫୋନ୍ କମ୍ପାନୀର ପ୍ରତିନିଧିତ୍ୱ କହି ୨୫ ହଜାର ଟଙ୍କା ମୂଲ୍ୟର ଫୋନକୁ ୪,୫୦୦ ଟଙ୍କାରେ ଦେବାକୁ କହିଥିଲେ। କୁବେର କୋରିଅର ଏଜେଣ୍ଟକୁ ୪,୫୦୦ ଟଙ୍କା ପ୍ରଦାନ କରି ପାର୍ସଲ ଗ୍ରହଣ କରିଥିଲେ। ତେବେ ଯେତେବେଳେ ସେ ଘରେ ପାର୍ସଲ ଖୋଲିଥିଲେ ଏହା ମଧ୍ୟରେ ପଥର ଓ କାଗଜ ଟୁକୁଡା ଥିବା ଦେଖିବାକୁ ପାଇଥିଲେ ବୋଲି କୁବେର କହିଛନ୍ତି। ଏନେଇ ସେ ସ୍ଥାନୀୟ କୋଲାର ପୋଲିସ ନିକଟରେ ଅଭିଯୋଗ କରିବା ପରେ ପୋଲିସ ଅଜଣା ବ୍ୟକ୍ତିଙ୍କ ନାମରେ ମାମଲା ରୁଜୁ କରିଥିଲା। ଶେଷରେ କୋଲାର ପୋଲିସ ଏହି ଘଟଣାରେ ଦିଲ୍ଲୀରୁ ୨ଜଣ ଠକଙ୍କୁ ଗିରଫ କରିଛି। ସେମାନେ ଏହିଭଳି ଭାବେ ୧୭୦ ଲୋକଙ୍କୁ ଠକିଥିବା ସ୍ବୀକାର କରିଛନ୍ତି।
