ଓ୍ବାଶିଂଟନ,୧୮।୯: ଆମେରିକାର ମିଚିଗାନରେ ନିୟମିତ ପ୍ରଶିକ୍ଷଣ ଉଡ଼ାଣ ସମୟରେ ଟେକ୍ସାସ ଏୟାର ନ୍ୟାସନାଲ ଗାର୍ଡର ଏକ F-16 ଫାଇଟର ଜେଟ୍ ଦୁର୍ଘଟଣାଗ୍ରସ୍ତ ହୋଇଛି । ଗ୍ରାଣ୍ଡ ଟ୍ରାଭର୍ସ କାଉଣ୍ଟି ଅଞ୍ଚଳରେ ଘଟିଥିବା ଏହି ଦୁର୍ଘଟଣାରେ ପାଇଲଟ୍ ବିମାନରୁ ସୁରକ୍ଷିତ ଭାବେ ବାହାରି ଆସିଥିଲେ । ତେବେ ସେ ଆହତ ହୋଇଥିବାରୁ ତାଙ୍କୁ ଚିକିତ୍ସା ପାଇଁ ହସ୍ପିଟାଲରେ ଭର୍ତ୍ତି କରାଯାଇଛି । ବର୍ତ୍ତମାନ ତାଙ୍କ ଅବସ୍ଥା ସ୍ଥିର ଥିବା ଜଣାପଡ଼ିଛି ।
ଟେକ୍ସାସ ମିଲିଟାରୀ ଡିପାର୍ଟମେଣ୍ଟ ଅନୁସାରେ, ଟେକ୍ସାସ ନ୍ୟାସନାଲ ଗାର୍ଡର ୧୪୯ତମ ଫାଇଟର ୱିଙ୍ଗ୍ ଦ୍ୱାରା ପରିଚାଳିତ F-16 ଫାଇଟିଂ ଫାଲକନ୍ ଆଲ୍ପେନାସ୍ଥିତ ଏୟାର ନ୍ୟାସନାଲ ଗାର୍ଡ କମ୍ବାଟ୍ ରେଡିନେସ୍ ଟ୍ରେନିଂ ସେଣ୍ଟରରୁ ପ୍ରଶିକ୍ଷଣ ମିଶନ୍ରେ ଉଡ଼ାଣ ଭରିଥିଲା। ଏହି ସମୟରେ ଦୁର୍ଘଟଣା ଘଟିଥିଲା। ଦୁର୍ଘଟଣାର କାରଣ ସମ୍ପର୍କରେ ଅଧିକାରୀମାନେ ତୁରନ୍ତ କୌଣସି ସୂଚନା ଦେଇନାହାନ୍ତି । ୧୪୯ତମ ଫାଇଟର ୱିଙ୍ଗ୍ର ମୁଖପାତ୍ର କହିଛନ୍ତି ଯେ ପାଇଲଟ୍ ବିମାନରୁ ବାହାରି ଆସିଥିଲେ ଏବଂ ତାଙ୍କୁ ଚିକିତ୍ସା ପାଇଁ ନିଆଯାଇଛି। ତାଙ୍କ ସ୍ଥିତି ସ୍ଥିର ଥିବା ଜଣାପଡ଼ିଛି। ମିଚିଗାନ ଷ୍ଟେଟ୍ ପୋଲିସ ଓ ଗ୍ରାଣ୍ଡ ଟ୍ରାଭର୍ସ କାଉଣ୍ଟି ଶେରିଫ୍ କାର୍ଯ୍ୟାଳୟ ପକ୍ଷରୁ ଘଟଣାସ୍ଥଳରେ ଉଦ୍ଧାର ଓ ସୁରକ୍ଷା କାର୍ଯ୍ୟ ଚାଲିଛି। ଏପର୍ଯ୍ୟନ୍ତ ଅନ୍ୟ କାହାରି ଆହତ ହେବାର ଖବର ମିଳିନାହିଁ।
F-16 ଦୁର୍ଘଟଣା ପରେ ଘଟଣାସ୍ଥଳ ନିକଟରେ ଥିବା ପ୍ରାୟ ଏକ ମାଇଲ୍ ପରିଧିରେ ରହୁଥିବା ଲୋକଙ୍କୁ ଅଞ୍ଚଳ ଖାଲି କରିବାକୁ ଅଧିକାରୀମାନେ ନିର୍ଦ୍ଦେଶ ଦେଇଛନ୍ତି । ବିମାନରୁ କୌଣସି ବିପଜ୍ଜନକ ରାସାୟନିକ ପଦାର୍ଥ ଲିକ୍ ହେବାର ଆଶଙ୍କା ଥିବାରୁ ଏହି ପଦକ୍ଷେପ ନିଆଯାଇଥିବା ଜଣାପଡ଼ିଛି।ଏହା ପୂର୍ବରୁ ନିକଟସ୍ଥ ଲୋକଙ୍କୁ ଘର ଭିତରେ ରହିବା ସହ ଝରକା ଓ କବାଟ ବନ୍ଦ ରଖିବାକୁ କୁହାଯାଇଥିଲା। କାଉଣ୍ଟି ରୋଡ୍ ୬୩୩ ଓ ବ୍ଲେୟାର ଟାଉନହଲ୍ ରୋଡ୍ ନିକଟରେ ବିମାନଟି ଖସିପଡ଼ିଥିବାରୁ ଘଟଣାସ୍ଥଳ ଆଖପାଖର ରାସ୍ତାଗୁଡ଼ିକୁ ବନ୍ଦ କରାଯାଇଛି।
ଘଟଣା ପୂର୍ବର ଏୟାର ଟ୍ରାଫିକ୍ କଣ୍ଟ୍ରୋଲ୍ ଅଡିଓରୁ F-16ଟି କୌଣସି ପକ୍ଷୀ ସହ ଧକ୍କା ହୋଇଥିବାର ସଙ୍କେତ ମିଳୁଥିବା ରିପୋର୍ଟ ହୋଇଛି । ତେବେ ବିମାନଟି ପକ୍ଷୀ ସହ ଧକ୍କା ହୋଇଥିଲା ବୋଲି ସାମରିକ ଅଧିକାରୀମାନେ ଏପର୍ଯ୍ୟନ୍ତ ନିଶ୍ଚିତ କରିନାହାନ୍ତି। ଦୁର୍ଘଟଣାର ପ୍ରକୃତ କାରଣ ଜାଣିବା ପାଇଁ ତଦନ୍ତ ଆରମ୍ଭ ହୋଇଛି ।
