କେନ୍ଦୁଝର,୧୮ା୩ (ସ୍ବ.ପ୍ର.) କେନ୍ଦୁଝରଗଡ ପାୈରପରିଷଦ ନିର୍ବାଚନ ପରିପ୍ରେକ୍ଷୀରେ ପୌରାଞ୍ଚଳର ସାମୂହିକ ବିକାଶ ପାଇଁ ଭାଜପା ପକ୍ଷରୁ ବିଂଶସୂତ୍ରୀ ଘୋଷଣାନାମା ଗୁରୁବାର ଜାରି କରାଯାଇଛି। ଜିଲା ଭାଜପା କାର୍ଯ୍ୟାଳୟରେ ଅନୁଷ୍ଠିତ ଏକ ସ୍ବତନ୍ତ୍ର ସଭାରେ ସଦର ବିଧାୟକ ତଥା ବିରୋଧୀ ଦଳ ମୁଖ୍ୟ ସଚେତକ ମୋହନ ଚରଣ ମାଝୀ ଯୋଗଦେଇ କେନ୍ଦୁଝରଗଡ ପୌରପାଳିକାରେ ଭାଜପା କ୍ଷମତାକୁ ଆସିଲେ ଏକ ସୁନ୍ଦର, ସ୍ବଚ୍ଛ ଓ ଲୋକାଭିମୁଖି ପୌରାଞ୍ଚଳ ଗଠନ କରିବାକୁ ପ୍ରତିଶ୍ରୁତି ଦେଇଥିଲେ। ବିଂଶସୂତ୍ରୀ ନିର୍ବାଚନ ଇସ୍ତାହାର ମଧ୍ୟରେ ବହୁ ଦିନ ଧରି ସମସ୍ୟାରେ ଜର୍ଜରିତ ସହରବାସୀଙ୍କ ସମସ୍ୟାକୁ ପ୍ରାଧାନ୍ୟ ଦିଆଯିବ ଏବଂ ସହରର ବିକାଶ ପାଇଁ ସ୍ବତନ୍ତ୍ର ମାଷ୍ଟରପ୍ଲାନ କରାଯିବ ବୋଲି କହିଥିଲେ। ଡିଏମ୍ଏଫ୍ ଅର୍ଥରେ ନିର୍ମାଣଧିନ ସରକାରୀ ମେଡିକାଲ କଲେଜକୁ କେନ୍ଦୁଝରର ଆରାଧ୍ୟ ଦେବତା ବଳଦେବଜୀଉଙ୍କ ନାମରେ ନାମକରଣ କରିବା ସହ କେନ୍ଦୁଝର ସହରରେ ଟ୍ରାଫିକ ସମସ୍ୟା ଦୂର କରିବା ପାଇଁ ବିଭିନ୍ନ ସ୍ଥାନରେ ଗାଡ଼ି ପାର୍କିଂ, ମାର୍କେଟ କମ୍ପ୍ଲେକ୍ସ ଓ ଅତ୍ୟାଧୁନିକ ମଲ୍ ପ୍ରତିଷ୍ଠା କରାଯିବ ବୋଲି କହିଥିଲେ। ଜିଲା ଭାଜପା ସଭାପତି ଅଂଶୁମାନ ସବୁଜ ମହାନ୍ତ ବର୍ମା ଇସ୍ତାହାରରେ ଦିଆଯାଇଥିବା ପ୍ରତିଶ୍ରୁତି ପୂରଣ କରାଯିବ ବୋଲି କହିଥିଲେ। ଭାଜପା ଜିଲା ସମବାୟ ସେଲ ସଂଯୋଜକ ଅଜୟ କୁମାର ସାହୁ କାର୍ଯ୍ୟକ୍ରମରେ ଉପସ୍ଥିତ ଥିଲେ। ଏହି ଅବସରରେ ଆୟୋଜିତ ଖବରଦାତା ସମ୍ମିଳନୀରେ ପୂର୍ବତନ ଜିଲା ସଭାପତି ଅଶ୍ୱିନୀ ପଟ୍ଟନାୟକ, ଭାଜପା କୋଷାଧ୍ୟକ୍ଷ ହରିହର ମହାନ୍ତ, ନଗର ପ୍ରଭାରୀ ତଥା ଜିଲା କାର୍ଯ୍ୟକାରିଣୀ ସଦସ୍ୟ ଦିଲ୍ଲୀପ କୁମାର ପଣ୍ଡା, ନଗର ଭାଜପା ସଭାପତି ବିଶ୍ୱଜିତ ତ୍ରିପାଠୀ, ଭାଜପା ସମ୍ପାଦକ ଶିବକୁମାର ରାଠୋର, ଦୀପକ ଜେନା, ଯୁବ ମୋର୍ଚ୍ଚା ଜିଲା ସଭାପତି ହେମରଞ୍ଜନ ବାରିକ, ଯୁବ ମୋର୍ଚ୍ଚା ନଗର ସଭାପତି ପ୍ରିୟବ୍ରତ ଜେନା, ଯୁବ ମୋର୍ଚ୍ଚା ସାଧାରଣ ସମ୍ପାଦକ ସବିର ଦାଶ, ଯୁବ ମୋର୍ଚ୍ଚା ଜିଲା ଉପସଭାପତି ଅଶ୍ୱିନୀ ମହାନ୍ତ ପ୍ରମୁଖ ଉପସ୍ଥିତ ଥିଲେ।
