ତେନ୍ତୁଳିଖୁଣ୍ଟି, ୧୮ା୬(ଚିଦାନନ୍ଦ ସାହୁ) ରାଜ୍ୟ ଓ କେନ୍ଦ୍ର ସରକାରଙ୍କ ଯୋଜନା ସଫଳ ରୂପାୟନ ନେଇ କର୍ମଚାରୀ ନିଯୁକ୍ତି କରାଯାଉଛି। କିନ୍ତୁ ଏବେ ଚାଲିଥିବା ଅମଲାଙ୍କ ଧର୍ମଘଟ ଓ କମ୍ ସଂଖ୍ୟକ କର୍ମଚାରୀ ଥିବାରୁ ଉନ୍ନୟନ କାର୍ଯ୍ୟ ଠପ୍ ହୋଇ ପଡ଼ିଛି। ନବରଙ୍ଗପୁର ଜିଲା ତେନ୍ତୁଳିଖୁଣ୍ଟି ବ୍ଲକର ୧୫ ପଞ୍ଚାୟତ ରହିଥିବା ବେଳେ ପଞ୍ଚାୟତ ନିବାହୀ ଅଧିକାରୀ ସଂଖ୍ୟା ୪। ଏତେ କମ୍ ସଂଖ୍ୟକ ଅଧିକାରୀଙ୍କୁ ନେଇ ଉନ୍ନୟନ କାମ ହୋଇପାରୁନାହିଁ। ଅମଲାମାନେ ଜୁନ୍ ପହିଲାରୁ ଧର୍ମଘଟରେ। ମଙ୍ଗଳ ସମ୍ପ୍ରସାରଣ ଅଧିକାରୀ ଜଗମୋହନ ମାଝିଙ୍କୁ ୨ ବ୍ଲକ ଦାୟିତ୍ୱ ମିଳିଛି। ବ୍ଲକରେ ବିଏସ୍ଏସ୍ଓ ପଦବୀରେ ସ୍ଥାୟୀ ଅଧିକାରୀ ନାହାନ୍ତି। ଦାୟିତ୍ୱରେ ଜଣେ ଅମଲା ରହିଛନ୍ତି। ଅମଲାଙ୍କ ଧର୍ମଘଟ ପରେ ଉକ୍ତ ବିଭାଗ କାମ ମଧ୍ୟ ଠପ୍ ହୋଇ ପଡ଼ିଛି। ସ୍ବାସ୍ଥ୍ୟଗତ କାରଣରୁ ଜିପିଇଓ ମଣ୍ଟୁ ସ୍ବାଇଁ ଦୀର୍ଘଦିନ ଧରି ଛୁଟିରେ ଥିଲେ। ଫଳରେ ଅନେକ କାମ ଅଟକି ରହିଥିଲା।
ବିଡିଓ ମନୋଜ ପାଣିଗ୍ରାହୀ ଲୋକଙ୍କ ସମସ୍ୟା ବୁଝି ତାହାକୁ ସମାଧାନ କରିବାକୁ ଚେଷ୍ଟା କରୁଛନ୍ତି। ୨୦୨୨-୨୩ ଆର୍ଥିକ ବର୍ଷ ବଜେଟ ପଞ୍ଚାୟତସ୍ତରରେ ଆସିଯାଇଛି। କିଛି ପଞ୍ଚାୟତ ଅନ୍ଲାଇନ ପ୍ରୋଜେକ୍ଟ ତିଆରି କରି ଦେଇଛନ୍ତି। ଜଣେ ପିଇଓ ଦୁଇ ଦୁଇଟି ପଞ୍ଚାୟତ ଦାୟିତ୍ୱରେ ଥିବା କାରଣରୁ ବଜେଟ ଆସି ୬ମାସ ବିତି ଯାଇଥିଲେ ସୁଦ୍ଧା ନିଜ ପଞ୍ଚାୟତ ପ୍ରୋଜେକ୍ଟ ଅନ୍ଲାଇନ କରିନାହାନ୍ତି। ବର୍ତ୍ତମାନ ଜିପିଇଓ ଛୁଟିରେ ଥିବା ଯୋଗୁ ପ୍ରୋଜେକ୍ଟ ଅନ୍ଲାଇନ ହୋଇପାରୁନି କି ଅନ୍ଲାଇନ ହୋଇଥିବା ପ୍ରୋଜେକ୍ଟ ରେଜିଷ୍ଟର ହୋଇପାରୁନାହିଁ। ଏହାଦ୍ବାରା ପଞ୍ଚାୟତସ୍ତରରେ ଗାଁ ଗୁଡିକର ସମସ୍ୟା ସମାଧାନ ହୋଇ ପାରୁନାହିଁ କି ନୂତନ ପ୍ରକଳ୍ପ ହାତକୁ ନେଇ ରୂପାୟନ ହୋଇପାରିନାହିଁ। ବିଶେଷଭାବେ ଡ୍ରେନେଜ ସମସ୍ୟା। ଡ୍ରେନ୍ ସଫା ହୋଇପାରୁନାହିଁ । ଆଗକୁ ବର୍ଷାିଋତୁ ଥିବାବେଳେ ନାଳନର୍ଦ୍ଦମାର ଦୂଷିତ ପାଣିରେ ମଶା, ମାଛି ବଢ଼ିଲେ ମ୍ୟାଲେରିଆ, ଡାଇରିଆ ଆଶଙ୍କା ରହିଛି। ପଞ୍ଚାୟତର ନଳକୂପ ମରାମତି ତଥା ବସୁଧା ଯୋଜନାରେ ପ୍ଲମ୍ବର କାମ କରୁଥିବା ଏସ୍ଇଏମ୍ କର୍ମଚାରୀଙ୍କୁ ୩ରୁ୪ ମାସ ଦରମା ମଧ୍ୟ ମିଳି ନ ଥିବା ଅଭିଯୋଗ ହେଉଛି। ନୂତନ ପ୍ରକଳ୍ପ ଯଥା ଡ୍ରେନ୍ ଓ ବିଦ୍ୟାଳୟ ମରାମତି ଓ ଅନ୍ୟ ଉନ୍ନୟନ କାର୍ଯ୍ୟ ବନ୍ଦ ହୋଇ ରହିଛି। ଅମଲାଙ୍କ ଆନ୍ଦୋଳନ ଯୋଗୁ ସବୁ ଠପ୍ ହୋଇଯାଇଛି। ଜିପିଇଓ ମଣ୍ଟୁ ସ୍ବାଇଁ ଶନିବାର କାର୍ଯ୍ୟରେ ଯୋଗ ଦେଇଛନ୍ତି। ଏହା ପରେ ଉନ୍ନୟନ କାର୍ଯ୍ୟ ଠିକ୍ ହେବ ବୋଲି ବୁଦ୍ଧିଜୀବୀ ଆଶା କରିଛନ୍ତି।
