କେନ୍ଦୁଝର, ୧୯।୫(ସ୍ବ.ପ୍ର.): ଲକ୍ଷାଧିକ ଟଙ୍କା ବ୍ୟୟରେ ପ୍ରତିଷ୍ଠା କରାଯାଇଥିବା ଜିଲା ଆସିବାସୀ ଶିକ୍ଷା ସାଧନ କେନ୍ଦ୍ର ଅସୁରକ୍ଷିତ ଅବସ୍ଥାରେ ରହିଥିଲେ ହେଁ କାହାରି ନିଘା ନାହିଁ। ସର୍ବଶିକ୍ଷା ଅଭିଯାନ ଅଧୀନରେ ଚାଲିଥିବା ଏହି ଆଦିବାସୀ ସମ୍ପଦ କେନ୍ଦ୍ର ପ୍ରତିଷ୍ଠା ପାଇଁ ବ୍ୟାପକ ଅର୍ଥ ଖର୍ଚ୍ଚ କରାଯାଇ ପ୍ରତିଷ୍ଠା କରାଯାଇଛି। ଏହି କେନ୍ଦ୍ରରେ ଲୋପ ପାଇବାକୁ ବସିଥିବା ଆଦିବାସୀ କଳାସଂସ୍କୃତି, ଭାଷାପରମ୍ପରା, ଅସ୍ତ୍ରଶସ୍ତ୍ର, ବେଶଭୂଷା କାୈଳିକ ପ୍ରଥା ଓ ବ୍ୟବସ୍ଥା ତଥା ସେମାନଙ୍କ ବ୍ୟବହାର୍ଯ୍ୟ ସାମଗ୍ରୀ ଆଦି ସାଇତି ରଖାଯାଇଛି। ବିଶେଷ କରି ଜିଲାର ଜୁଆଙ୍ଗ, ଭୂୟାଁ, ହୋ, ସାନ୍ତାଳ ଆଦି ଜନଜାତିଙ୍କ ମୂଲ୍ୟବାନ ପୁରୁଣା ସାମଗ୍ରୀ ସାଇତି ରଖାଯାଇଛି ା ଏହାକୁ ସମସ୍ତଙ୍କ ପ୍ରଦର୍ଶନ ସହିତ ଆଦିବାସୀ କଳାସଂସ୍କୃତି ଉପରେ ଗବେଷଣା ପାଇଁ ରଖାଯାଇଛି। ସେହିପରି ଏଠାରେ ଆଦିବାସୀଙ୍କ ଉପରେ ସେମିନାର, ବୈଠକ, ରିସର୍ଚ୍ଚ ସମ୍ପର୍କିତ କାର୍ଯ୍ୟକ୍ରମ ଆଦି ପାଇଁ ବ୍ୟବସ୍ଥା ଗ୍ରହଣ କରାଯିବା ସହ ଡିଜିଟାଲ ପ୍ଲାଟଫର୍ମ ବ୍ୟବସ୍ଥା କରାଯାଉଛି ବୋଲି ଜିଲା ଶିକ୍ଷା ଅଧିକାରୀ ପୂର୍ଣ୍ଣଚନ୍ଦ୍ର ସେଠୀ କହିଛନ୍ତି ା
ଏପରିକି ଏଠାକୁ ବାହାର ଜିଲାରୁ ମଧ୍ୟ ଆଦିବାସୀଙ୍କ ଉପରେ ଗବେଷଣା ବା ଅଧ୍ୟୟନ କରୁଥିବା ମେଧାବୀ ଛାତ୍ର ମାନେ ମଧ୍ୟ ଗସ୍ତ କରି ମୂଲ୍ୟବାନ ତଥ୍ୟ ସଂଗ୍ରହ କରୁଛନ୍ତି। ତେବେ କୋଭିଡ ପରେ ଏହାକୁ ବନ୍ଦ ରଖାଯାଇଥିଲା। ଏହାର ରକ୍ଷଣାବେକ୍ଷଣ ଓ ସୁରକ୍ଷା ପାଇଁ ସୁବ୍ୟବସ୍ଥା କରାଯାଇଥିଲେ ହେଁ ଏବେ ଏହା ଅବହେଳିତ ହୋଇ ରହିଛି। ଏହାକୁ ଏବେ ପୂର୍ଣ୍ଣକାର୍ଯ୍ୟକ୍ଷମ କରାଯାଉ ନ ଥିବା ଅନେକ ଅସନ୍ତୋଷ ବ୍ୟକ୍ତ କରୁଛନ୍ତି। ଏହାର ବାହ୍ୟ ପାଚେରୀ ଦୀର୍ଘ ଦିନ ହେଲା ଭାଙ୍ଗିଯାଇଥିଲେ ହେଁ ମରାମତି କରାଯାଉ ନ ଥିବାରୁ ଏହି କେନ୍ଦ୍ରର ସୁରକ୍ଷା ତଥା ଏଠାରେ ଥିବା ମୂଲ୍ୟବାନ ସାମଗ୍ରୀର ସୁରକ୍ଷାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଏସମ୍ପର୍କରେ ଜିଲା ଶିକ୍ଷା ଅଧିକାରୀ ସେଠୀ କହିଛନ୍ତି, ଏହି କେନ୍ଦ୍ର ଶିକ୍ଷା ବିଭାଗର ଅନୁଦାନରେ ପ୍ରତିଷ୍ଠା ହୋଇଛି। ଏହାର ପାଚେରି ଭାଙ୍ଗିଥିବା ନେଇ ତାଙ୍କୁ କେହି ସୂଚନା ଦେଇ ନାହାନ୍ତି। ଏନେଇ ତୁରନ୍ତ ପଦକ୍ଷେପ ନିଆଯିବ ା ତୁରନ୍ତ ପାଚେରି ମରାମତି କରିବା ସହ ଉକ୍ତ କେନ୍ଦ୍ର ଖୋଲିବା ପାଇଁ ସାଧାରଣରେ ଦାବି ହେଉଛି।
