ଭୁବନେଶ୍ୱର, ୧୭।୧(କ୍ରୀଡ଼ା ପ୍ରତିନିଧି): ଜଣକ ଘର ଫ୍ରାନ୍ସ, ଆଉ ଜଣକର ଜର୍ମାନୀ। ମାତ୍ର ସେମାନେ ଚଳିତ ହକି ବିଶ୍ୱକପରେ କ୍ରମାଗତଭାବେ ଦକ୍ଷିଣ ଆଫ୍ରିକା ଦଳକୁ ସମର୍ଥନ କରି ଆସୁଛନ୍ତି। ଏହା ଶୁଣିଲେ ନିଶ୍ଚିତ ଆଶ୍ଚର୍ଯ୍ୟ ଲାଗୁଥିବ, ମାତ୍ର ଏହା ସତ। ଭୁବନେଶ୍ୱର ଏବଂ ରାଉରକେଲାରେ ଏବେ ଚାଲିଛି ପୁରୁଷ ହକି ବିଶ୍ୱକପ। ଟୁର୍ନାମେଣ୍ଟ ଆରମ୍ଭରୁ ଦୁଇଜଣ ମହିଳା ଦର୍ଶକ କଳିଙ୍ଗ ଷ୍ଟାଡିୟମର ଓ୍ବେଷ୍ଟ ଷ୍ଟାଣ୍ଡରେ ଉପସ୍ଥିତ ରହି ଦୃଷ୍ଟି ଆକର୍ଷଣ କରିଛନ୍ତି। ସେମାନେ ହେଲେ ଫ୍ରାନ୍ସର କାମିଲେ ଓ ଜର୍ମାନୀର ଜୋହାନା। ତେବେ ସେମାନଙ୍କ ମୁହଁରେ ଚିତ୍ରିତ ହୋଇଛି ଦକ୍ଷିଣ ଆଫ୍ରିକା ଜାତୀୟ ପତାକା। କାରଣ ସେମାନେ ଆରମ୍ଭରୁ ଷ୍ଟାଡିୟମ ଗ୍ୟାଲେରୀରେ ଉପସ୍ଥିତ ରହି ଦକ୍ଷିଣ ଆଫ୍ରିକା ଦଳକୁ ସମର୍ଥନ କରି ଆସିଛନ୍ତି। ସେମାନେ ଯେ କେବଳ ଦକ୍ଷିଣ ଆଫ୍ରିକା ମ୍ୟାଚକୁ ଦେଖିଛନ୍ତି ତା’ ନୁହେଁ ୧୩ ତାରିଖରେ ଅଷ୍ଟ୍ରେଲିଆ-ଫ୍ରାନ୍ସ, ୧୪ରେ ବେଲ୍ଜିୟମ-ଦକ୍ଷିଣ କୋରିଆ, ଜର୍ମାନୀ-ଜାପାନ, ୧୬ରେ ଆର୍ଜେଣ୍ଟିନା-ଅଷ୍ଟ୍ରେଲିଆ ମ୍ୟାଚକୁ ମଧ୍ୟ ମନଭରି ଉପଭୋଗ କରିଛନ୍ତି। ମଝିରେ ମଝିରେ ସେମାନେ ଛିଡ଼ା ହୋଇ ‘ହକି ହେ ଦିଲମେରା’ ଗୀତର ତାଳେତାଳେ ନୃତ୍ୟ ମଧ୍ୟ କରିଥାନ୍ତି। ପ୍ରକୃତ କଥା ହେଲା ଉଭୟ ହେଉଛନ୍ତି ଜଣେ ଜଣେ କ୍ଲବ ସ୍ତରର ହକି ଖେଳାଳି। କାମିଲେ ଓ ଜୋହାନା ଫ୍ରାନ୍ସର ଏକ କ୍ଲବ ପ୍ୟାରିସ ଜନ ବୌଇନ୍ (ପିଜେବି) ପକ୍ଷରୁ ହକି ଖେଳିଥାନ୍ତି। ସେମାନଙ୍କ କ୍ଲବର କେତେଜଣ ପୁରୁଷ ସଦସ୍ୟ ଦକ୍ଷିଣ ଆଫ୍ରିକା ଜାତୀୟ ଦଳ ପକ୍ଷରୁ ଖେଳୁଛନ୍ତି। ତେଣୁ ସେମାନଙ୍କୁ ଉତ୍ସାହିତ କରିବା ପାଇଁ ସେମାନେ ଷ୍ଟାଡିୟମରେ ଆରମ୍ଭରୁ ଉପସ୍ଥିତ ରହିଛନ୍ତି ଏବଂ ଦକ୍ଷିଣ ଆଫ୍ରିକା ଦଳକୁ ସମର୍ଥନ ଦେଇ ଆସିଛନ୍ତି। ”ଆମର ସମର୍ଥନ ସ୍ବାଭାବିକଭାବେ ଜାତୀୟ ଦଳ ଫ୍ରାନ୍ସ ଓ ଜର୍ମାନୀ ପ୍ରତି ରହିଛି। ଗତଥରର ଚାମ୍ପିୟନ ବେଲଜିୟମକୁ ମଧ୍ୟ ଆମେ ସମର୍ଥନ ଦେଉଛୁ। ତେବେ ଦକ୍ଷିଣ ଆଫ୍ରିକା ପାଇଁ ଆମ ହାର୍ଟ ବିଟ୍ ହେଉଛି। କାରଣ ଆମ କ୍ଲବର କେତେକ ଖେଳାଳି ଦକ୍ଷିଣ ଆଫ୍ରିକା ପକ୍ଷରୁ ଖେଳୁଛନ୍ତି। ସେମାନଙ୍କୁ ସମର୍ଥନ କରି ଆମେ ଖୁସି ଅଛୁ। ଦକ୍ଷିଣ ଆଫ୍ର୍ର୍ରିକା କ୍ରମାଗତ ୨ଟି ମ୍ୟାଚ ହାରି ଗ୍ରୁପ୍ ପର୍ଯ୍ୟାୟରୁ ବିଦାୟ ନେବା ସ୍ଥିତିରେ ପହଞ୍ଚତ୍ ଯାଇଥିବା ସେମାନଙ୍କୁ ଦୁଃଖ ଦେଇଛି। ମାତ୍ର ଶେଷ ମ୍ୟାଚରେ ଏହି ଦଳ କିଛିଟା ଲଢ଼ୁଆ ପ୍ରଦର୍ଶନ କରିବ ବୋଲି ଉଭୟ ଆଶା ରଖିଛନ୍ତି। କଳିଙ୍ଗ ଷ୍ଟାଡିୟମର ପରିବେଶ ଓ ଦର୍ଶକଙ୍କ ଉପସ୍ଥିତି ଉଭୟ କାମିଲେ ଓ ଜୋହାନାଙ୍କୁ ବିମୋହିତ କରିଛି। ଏଠାରେ ସେ ବହୁତ ଖୁସି ଅନୁଭବ କରୁଛନ୍ତି ବୋଲି କହିଛନ୍ତି। ଘରୋଇ ପରିବେଶରେ ଖେଳୁଥିବାରୁ ଭାରତ ଟୁର୍ନାମେଣ୍ଟର ଅନ୍ୟତମ ଟାଇଟଲ ଫେଭରାଇଟ ବୋଲି ସେ ପ୍ରକାଶ କରିଛନ୍ତି।
