ଭୁବନେଶ୍ବର, ୨୬।୧୧(ବ୍ୟୁରୋ): ପଦ୍ମପୁର ଉପନିର୍ବାଚନରେ ଭାଜପା ପ୍ରାର୍ଥୀ ପ୍ରଦୀପ ପୁରୋହିତଙ୍କ ପାଇଁ ପ୍ରଚାର କରିବାକୁ ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ ଓ କେନ୍ଦ୍ର କୃଷିମନ୍ତ୍ରୀ ନରେନ୍ଦ୍ର ସିଂ ତୋମାର ଓଡ଼ିଶା ଗସ୍ତରେ ଆସୁଛନ୍ତି। ଆସନ୍ତା ୨୭ ତାରିଖରେ ସେମାନଙ୍କ ନିର୍ବାଚନ ସଭା ହେବ ବୋଲି ଦଳର ସାଧାରଣ ସମ୍ପାଦକ ଗୋଲକ ମହାପାତ୍ର ସୂଚନା ଦେଇଛନ୍ତି। ସେ କହିଛନ୍ତି, ରାଜ୍ୟ ସରକାରଙ୍କ ଅପାରଗତା ଓ ବୀମା କମ୍ପାନୀଗୁଡ଼ିକ ସହ ମଧୁଚନ୍ଦ୍ରିକା ଯୋଗୁ ଫସଲ ବୀମା ଯୋଜନାରେ ଚାଷୀମାନେ ସେମାନଙ୍କ ନ୍ୟାଯ୍ୟ ହକ୍ରୁ ବଞ୍ଚିତ ହେଉଥିଲେ। କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏବଂ ତୋମାରଙ୍କ ହସ୍ତକ୍ଷେପରେ ଏହାର ସମାଧାନ ହେଲା। ଚାଷୀମାନଙ୍କୁ ବୀମା ଅର୍ଥ ମିଳିଲା। ସେହିଭଳି ପଦ୍ମପୁରରେ ରେଳ ଚାଲିବା ପାଇଁ ଥିବା ଦୀର୍ଘଦିନର ଦାବିକୁ କେନ୍ଦ୍ର ସରକାର ୨୦୨୧ରେ ଅନୁମୋଦନ ଦେଇସାରିଥିବା ବେଳେ ରାଜ୍ୟ ସରକାର ଜମି ଯୋଗାଇ ନ ଦେବାରୁ ପ୍ରକଳ୍ପ କାମ ଆଗେଇପାରୁନାହିଁ। ଚାଷୀ ସମସ୍ୟାକୁ ନେଇ ପଦ୍ମପୁର ଉପନିର୍ବାଚନରେ ବିଜେଡି ଏବଂ ଭାଜପା ମଧ୍ୟ ରାଜନୀତି ଜୋର୍ ଧରିଛି। ତେଣୁ ଏଭଳି ସମୟରେ ତୋମାରଙ୍କୁ ଆଣି ଭାଜପା ଚାଷୀ ସମସ୍ୟାରୁ ଫାଇଦା ନେବାକୁ ଚେଷ୍ଟା କରୁଥିବା ଚର୍ଚ୍ଚା ହେଉଛି। ସେହିପରି ରେଳ ପ୍ରକଳ୍ପ ପ୍ରସଙ୍ଗରେ ମଧ୍ୟ ରାଜନୀତି ଚାଲିଥିବା ବେଳେ ଏଥିରୁ କିପରି ଫାଇଦା ଉଠାଇହେବ ସେନେଇ ଭାଜପା ରେଳମନ୍ତ୍ରୀଙ୍କୁ ପ୍ରଚାର ମଇଦାନରେ ଓହ୍ଲାଇବାକୁ ଯୋଜନା କରିବା ନେଇ ଆଲୋଚନା ଚାଲିଛି।
