କୋଲକାତା,୨୬।୧୧: ଯାହାଙ୍କୁ ମୁଁ ଭାଇ ଭଳି ଦେଖେ ସେ ମୋତେ କହୁଛନ୍ତି, ପଶ୍ଚିମବଙ୍ଗ ସରକାର ଏବେ ପାର୍ଟି ପାଇଁ, ପାର୍ଟି ଦ୍ୱାରା ଏବଂ ପାର୍ଟିର ହୋଇଯାଇଛି। ତେବେ କେନ୍ଦ୍ର ସରକାର ଏଜେନ୍ସିର, ଏଜେନ୍ସି ଦ୍ୱାରା ଏବଂ ଏଜେନ୍ସି ପାଇଁ ବୋଲି ମୁଁ ଏହାର ଜବାବ ଦେଇପାରିବି। ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ବିଧାନସଭାର ବିରୋଧୀ ଦଳ ନେତା ତଥା ପୂର୍ବତନ ସହଯୋଗୀ ଶୁଭେନ୍ଦୁ ଅଧିକାରୀଙ୍କ ସହ ସାକ୍ଷାତ ପରେ ଏଭଳି କହିଛନ୍ତି। ଚା’ ପାଇଁ ନିମନ୍ତ୍ରଣ ପାଇ ଶୁକ୍ରବାର ରାଜ୍ୟ ବିଧାନସଭାସ୍ଥିତ ମୁଖ୍ୟମନ୍ତ୍ରୀଙ୍କ ପ୍ରକୋଷ୍ଠରେ ମମତାଙ୍କୁ ଅନ୍ୟ ତିନି ବିଧାୟକଙ୍କ ସହ ଶୁଭେନ୍ଦୁ ସାକ୍ଷାତ କରିଥିଲେ। ତେବେ ବିଧାନସଭା ପରିସରସ୍ଥିତ ପ୍ଲାଟିନମ୍ ଜୁବୁଲି ମେମୋଟିଆଲ ବିଲ୍ଡିଂର ଉଦ୍ବୋଧନ ପୂର୍ବରୁ ଏହି ଦୁଇ ନେତାଙ୍କ ସାକ୍ଷାତ ହୋଇଛି।
ମମତାଙ୍କ ସହ ସାକ୍ଷାତ ସମ୍ପର୍କରେ ଶୁଭେନ୍ଦୁ କହିଛନ୍ତି, ମୁଖ୍ୟମନ୍ତ୍ରୀଙ୍କ ସହ ୩-୪ ମିନିଟ୍ର ଏହି ସାକ୍ଷାତ ସୌଜନ୍ୟମୂଳକ ଥିଲା। ନନ୍ଦିଗ୍ରାମରେ ଲଢେଇ ମମତାଜୀଙ୍କ ସହ ବ୍ୟକ୍ତିଗତ ନ ଥିଲା। ଏହା ରାଜନୈତିକ ଏବଂ ଏକ ବିଚାରଧାରା ମଧ୍ୟରେ ଲଢେଇ ଥିଲା। ସୂଚନାଯୋଗ୍ୟ, ଶୁଭେନ୍ଦୁ ତାଙ୍କ ଆସନ ବ୍ୟବସ୍ଥାକୁ ବିରୋଧକରି ବୁଧବାର ନୂତନ ରାଜ୍ୟପାଳ ସିଭି ଆନନ୍ଦ ବୋଷଙ୍କ ଶପଥ ଗ୍ରହଣ ଉତ୍ସବରେ ଯୋଗଦେଇ ନ ଥିଲେ। ଏଥିନେଇ ସେ ମୁଖ୍ୟମନ୍ତ୍ରୀ ମମତାଙ୍କୁ ଟାର୍ଗେଟ୍ କରିଥିଲେ। ତେବେ ତୃଣମୂଳ କଂଗ୍ରେସ ଛାଡ଼ିବା ପରେ ମମତାଙ୍କ ସହ ଶୁଭେନ୍ଦୁଙ୍କର ଏହା ତାଙ୍କର ପ୍ରଥମ ସାକ୍ଷାତ ଥିଲା। ଏହି ସାକ୍ଷାତକୁ ନେଇ ଏବେ ଚର୍ଚ୍ଚା ଜୋର୍ ଧରିଛି।
