ବଇଣ୍ଡା,୩୧।୩(ପରିକ୍ଷିତ ସାହୁ)ଦୀର୍ଘ ୧୪ ବର୍ଷ ଧରି ଚାଷୀମାନେ ଆନ୍ଦୋଳନ ଚଳାଇଛନ୍ତି। ବର୍ଷ ବର୍ଷ ଧରି ଧାରଣା ଦେଇଛନ୍ତି। ହେଲେ ଅନୁଗୋଳ ଜିଲା କିଶୋରନଗର ବ୍ଲକ ବାମୁର ପଞ୍ଚାୟତଠାରେ ସୁରେଶ୍ୱରୀ ଜଳସେଚନ ପ୍ରକଳ୍ପ ନିର୍ମାଣ ହେଉନାହିଁ। ଫଳରେ ସରକାରୀ ପ୍ରତିଶ୍ରୁତି କେବଳ ପ୍ରତିଶ୍ରୁତିରେ ଅଟକି ରହିଥିବାରୁ ଏ ନେଇ କିଶୋରନଗର ଜୀବନ ଜୀବିକା ଓ କୃଷି ଜମି ସୁରକ୍ଷା କମିଟି ଓ ଚାଷୀମାନଙ୍କ ମଧ୍ୟରେ ଅସନ୍ତୋଷ ବୃଦ୍ଧିପାଉଛି।
କମିଟି ପକ୍ଷରୁ କୁହାଯାଇଛି, କିଶୋରନଗର ବ୍ଲକ କୃଷି ବହୁଳ ଅଞ୍ଚଳ। ଚାଷ ଜମିକୁ ପାଣି ମାଡ଼ିବା ପାଇଁ ସୁରେଶ୍ୱରୀ ନାଳ ଉପରେ ଏକ ଜଳସେଚନ ପ୍ରକଳ୍ପ ନିର୍ମାଣ କରିବା ପାଇଁ ୨୦୦୪ ଫେବୃଆରୀ ୨୦ରେ ବାମୁର ପଞ୍ଚାୟତ କାନ୍ତ ଆମ୍ବତଇଲାଠାରେ ରାଜ୍ୟ ସରକାରଙ୍କ ତତ୍କାଳୀନ ଜଳସମ୍ପଦ ମନ୍ତ୍ରୀ ମଙ୍ଗଳା କିଶାନ ଶୁଭ ଦେଇଥିଲେ। ହେଲେ ଆଜକୁ ଦୀର୍ଘ ୨୦ ବର୍ଷ ବିତି ଯାଇଥିଲେ ମଧ୍ୟ କୌଣସି ପ୍ରକଳ୍ପ ନିର୍ମାଣ ହୋଇପାରିନାହିଁ। ଏହି ପ୍ରକଳ୍ପ ନିର୍ମାଣ ପାଇଁ ରାଜ୍ୟ ସରକାର ୨୦୦୫ ମସିହାରେ ୬ କୋଟି ଟଙ୍କା ମଞ୍ଜୁର କରିଥିଲେ। ଏହି ପ୍ରକଳ୍ପ ନିର୍ମାଣ ହେଲେ ବାମୁର, ଜଏରାଟ, ଓସ୍କାପାଲି, ଧଉରାପାଲି, କଦଳୀମୁଣ୍ଡା, ରଣିଆକଟା ୬ ଟି ପଞ୍ଚାୟତର ୩୪ଟି ଗ୍ରାମର ୧୦ ହଜାର ଏକର ଚାଷ ଜମିକୁ ପାଣି ମାଡ଼ିବ। ହେଲେ ଏହା ସ୍ବପ୍ନ ପାଲଟିଛି। ଏହି ଜଳ ସେଚଳ ପ୍ରକଳ୍ପ ନିର୍ମାଣ ପାଇଁ ଜୀବନ ଜୀବିକା ଓ ଜମି ସୁରକ୍ଷା କମିଟି ପକ୍ଷରୁ ୨୦୧୦ ଏପ୍ରିଲ ୧୦ ଠାରୁ ଆନ୍ଦୋଳନ ଆରମ୍ଭ ହୋଇଛି। ବହୁବାର ବ୍ଲକ, ତହସିଲ ଅଫିସ, ଉପ ଜିଲାପାଳ ଅଫିସ, ଜିଲାପାଳ ଅଫିସ ସମ୍ମୁଖରେ ଆନ୍ଦୋଳନ କରାଯାଇଥିବାବେଳେ କୌଣସି ସୁଫଳ ମିଳିନାହିଁ। ପରେ ୬ ପଞ୍ଚାୟତବାସୀ ୨୦୧୭ ସେପ୍ଟେମ୍ବର ୧୧ ଓ ୧୨ ଦୁଇଦିନ ଜିଲାପାଳ କାର୍ଯ୍ୟାଳୟଠାରେ ଅହୋରାତ୍ର ଧାରଣା ଦେଇଥିଲେ। ଶୀଘ୍ର ପ୍ରକଳ୍ପ ନିର୍ମାଣ ହେବ ବୋଲି ଜିଲା ପ୍ରଶାସନ ପ୍ରତିଶ୍ରୁତି ଦେଇଥିବାବେଳେ ପର ମୁହୂର୍ତ୍ତରେ କୌଣସି କାମ ଆରମ୍ଭ ହୋଇ ନ ଥିଲା। ପରେ ପୁଣି ଚାଷୀମାନେ କିଶୋରନଗର ବ୍ଲକ ସମ୍ମୁଖରେ ୨୦୧୯ ଅକ୍ଟୋବର ୨୧, ୨୨, ୨୩ ତିନି ଦିନ ଧରି ଅହୋରାତ୍ର ଧାରଣା ଦେବା ପରେ ଜଳସମ୍ପଦ ବିଭାଗ ପକ୍ଷରୁ କିଛି କେନାଲ କାର୍ଯ୍ୟ କରାଯାଇଥିବାବେଳେ ପ୍ରକଳ୍ପ ନିର୍ମାଣ ଆରମ୍ଭ ହୋଇ ନ ଥିଲା। ବାରମ୍ବାର ଆନ୍ଦୋଳନ କରାଯିବା ସହ ଏହି ପ୍ରକଳ୍ପ ନିର୍ମାଣ ପାଇଁ ରାଜ୍ୟ ସରକାରଙ୍କୁ ଅବଗତ କଲେ ମଧ୍ୟ କୌଣସି ସୁଫଳ ମିଳୁନାହିଁ। ତୁରନ୍ତ ଏଥିପ୍ରତି ଦୃଷ୍ଟି ଦିଆ ନ ଗଲେ ଆଗାମୀ ଦିନରେ ପୁଣି ଆନ୍ଦୋଳନ କରାଯିବ ବୋଲି କମିଟି ପକ୍ଷରୁ ଚେତାବନୀ ଦିଆଯାଇଛି। ଏ ନେଇ କମିଟି ସଭାପତି ଦିନବନ୍ଧୁ ପ୍ରଧାନ କହିଛନ୍ତି, ସରକାର ସବୁବେଳେ ଚାଷୀଙ୍କୁ ପ୍ରତାରଣା କରୁଛନ୍ତି। ଅନେକ ଯୋଜନା କାର୍ଯ୍ୟକାରୀ କଲେ ମଧ୍ୟ ଚାଷୀଙ୍କ ପାଇଁ ସରକାର ବିଫଳ ହୋଇଛନ୍ତି। ସୁରେଶ୍ୱରୀ ଜଳସେଚନ ପ୍ରକଳ୍ପ ନିର୍ମାଣ ପାଇଁ ବହୁବାର ଦାବି କରାଯାଉଥିବାବେଳେ ପ୍ରକଳ୍ପ ନିର୍ମାଣ ପାଇଁ ପ୍ରଶାସନିକ କ୍ଷେତ୍ରରେ ପଦକ୍ଷେପ ନିଆଯାଉନାହିଁ। ଫଳରେ କୃଷିର ବିକାଶ ହୋଇ ପାରୁନାହିଁ।
