ବ୍ରହ୍ମପୁର,୧୫ା୧୦(ସୁବାସ ଚନ୍ଦ୍ର ପାଢ଼ୀ)ମହାରାଜା କୃଷ୍ଣଚନ୍ଦ୍ର ଗଜପତି (ଏମକେସିଜି) ମେଡିକାଲ କଲେଜ ଓ ହସ୍ପିଟାଲକୁ ସ୍ବାସ୍ଥ୍ୟସେବା କ୍ଷେତ୍ରରେ ଦକ୍ଷିଣ ଓଡ଼ିଶାର ଲାଇଫଲାଇନ କୁହାଯାଉଛି। ଏଠାରେ କାର୍ଯ୍ୟରତ କେତେକ ଡାକ୍ତରଙ୍କ ଘର କଟକ, ଭୁବନେଶ୍ୱର ହୋଇଥିବା ବେଳେ ସେମାନେ ନିଜ ଇଚ୍ଛାରେ ହସ୍ପିଟାଲ ଆସୁଛନ୍ତି। ସେହିପରି ଅନ୍ୟ କେତେକ ଡାକ୍ତର ଅନଧିକୃତ ଛୁଟିରେ ରହୁଥିବା ନେଇ ବିଭିନ୍ନ ସମୟରେ ଅଭିଯୋଗ ହୋଇଆସୁଥିଲା। ଅନ୍ୟ କିଛି ବରିଷ୍ଠ ଡାକ୍ତରଙ୍କୁ ଘରୋଇ ହସ୍ପିଟାଲ ପ୍ରୀତି ଲାଗିରହିଛି। ସେମାନେ ହସ୍ପିଟାଲକୁ ଆସୁନଥିବା ଅଭିଯୋଗ ହେଉଥିଲା। ଛୁଟି ନନେଇ ସେମାନେ କଟକ ଓ ଭୁବନେଶ୍ୱରରେ ପ୍ରାକ୍ଟିସ୍ କରୁଥିବା ବେଳେ ଏଠାରେ କାମ କରୁଥିବା ଦର୍ଶାଇ ଦରମା ପାଉଥିବା ମଧ୍ୟ ଅଭିଯୋଗ ହେଉଥିଲା। ଜଣେ ପ୍ରଫେସର ଛୁଟି ନନେଇ ଅନଧିକୃତ ଅନୁପସ୍ଥିତ ରହିଥିବା ଜଣାପଡିବା ପରେ ତାଙ୍କ ଉପରେ କାର୍ଯ୍ୟାନୁଷ୍ଠାନ ହୋଇଛି। କିଡନି ରୋଗ ବିଭାଗର ଜଣେ ପ୍ରଫେସରଙ୍କ ମାସକର ଦରମା ବନ୍ଦ ହୋଇଥିବା ଜଣାପଡିଛି। ଏନେଇ ଏମକେସିଜି ଡିନ୍ ତଥା ପ୍ରିନ୍ସିପାଲ ପ୍ରଫେସର ଡା.ସନ୍ତୋଷ କୁମାର ମିଶ୍ର କହିଛନ୍ତି, ପ୍ରତ୍ୟେକ ମାସରେ ଡାକ୍ତରଙ୍କ ଉପସ୍ଥାନ ଯାଞ୍ଚ କରାଯାଉଛି। ଜଣେ ପ୍ରଫେସର ଅନଧିକୃତ ଛୁଟିରେ ରହିବା ଜଣାପଡିବା ପରେ କାର୍ଯ୍ୟାନୁଷ୍ଠାନ ହୋଇଥିବା ସେ ସ୍ବୀକାର କରିଛନ୍ତି। ତିନିଦିନ ସେ ଅନଧିକୃତ ଅନୁପସ୍ଥିତ ଥିବାରୁ ତାଙ୍କର ସେପ୍ଟେମ୍ବର ମାସର ଦରମା ବନ୍ଦ ହୋଇଥିବା କହିଛନ୍ତି। ଏମକେସିଜିରେ ଏହା ପ୍ରଥମ ଘଟଣା ନୁହେଁ, ପୂର୍ବରୁ ମଧ୍ୟ ଅନେକ ଥର ଏଭଳି ଦେଖିବାକୁ ମିଳିଛି।
ବରିଷ୍ଠ ଡାକ୍ତରମାନେ କଟକ ଓ ଭୁବନେଶ୍ୱରରେ ରହି ଏମକେସିଜିରେ ଉପସ୍ଥିତି ଥିବା ଉପସ୍ଥାନରେ ଦେଖାଉଛନ୍ତି। ଦୁଃଖର ବିଷୟ ହେଲା ଏଠାରେ ବାୟୋମେଟ୍ରିକ୍ ଓ ଫେସ୍ ଡିଟେକ୍ଟର ମାଧ୍ୟମରେ ଏଠାରେ ଉପସ୍ଥାନ ନେବାକୁ ମେଡିକାଲ କାଉନସିଲ୍ ଅଫ୍ ଇଣ୍ଡିଆ (ଏମସିଆଇ)ର ନିର୍ଦ୍ଦେଶ ରହିଛି। ଏମକେସିଜିରେ ସମସ୍ତ ପ୍ରଫେସର ଏବଂ ଡାକ୍ତର ମାନଙ୍କ ଫେସ୍ ଡିଟେକ୍ଟର ଓ ବାୟୋମେଟ୍ରିକ୍ରେ ଉପସ୍ଥାନ ଦେବାକୁ ପଞ୍ଜିକରଣ କରାଯାଇଛି। ଯେଉଁ ବିଭାଗ ଡାକ୍ତରମାନଙ୍କ ଫେସ୍ ଡିଟେକ୍ଟର ଓ ବାୟୋମେଟ୍ରିକ୍ ଉପସ୍ଥାନରେ ସମସ୍ୟା ହେଉଛି, ସେମାନଙ୍କ କାର୍ଯ୍ୟ ପ୍ରମାଣପତ୍ର ବିଭାଗ ମୁଖ୍ୟ ଦେବେ। କିନ୍ତୁ ଅଧିକାଂଶ ବିଭାଗରେ ଡାକ୍ତର ଓ ବିଭାଗ ମୁଖ୍ୟମାନେ ବି ରହୁନାହାନ୍ତି। ସେମାନେ ବାୟୋମେଟ୍ରିକ ଓ ଫେସ୍ ଡିଟେକ୍ଟରରେ ଉପସ୍ଥାନ ନଦେଇ, ଖାତାରେ ଉପସ୍ଥାନ ଦେଉଛନ୍ତି। ଫଳରେ କିଏ ଆସୁଛନ୍ତି ଓ କିଏ ଆସୁନାହାନ୍ତି ତାହା ଜାଣିବା କଷ୍ଟକର ହେଉଥିଲା। କିଡନି ବିଭାଗରେ ନିୟମିତ ଭାବେ ଡାକ୍ତର ଇନଡୋରକୁ ଆସୁନଥିବା ଅଭିଯୋଗ ହେବା ପରେ ଏହି କାର୍ଯ୍ୟାନୁଷ୍ଠାନ ହୋଇଛି। ଏ ନେଇ ଏମକେସିଜି ଅଧୀକ୍ଷକ ପ୍ରଫେସର ସୂଚିତ୍ରା ଦାଶ ଡିନ୍ଙ୍କୁ ଜଣାଇଥିଲେ। ଡିନ୍ ଛୁଟି ତାଲିକା ଦେଖିବା ସହ ଉପସ୍ଥାନ ଯାଞ୍ଚ କରିଥିଲେ। ଗତମାସରେ ସେ ୧୩ରୁ ୧୫ ତାରିଖ ପର୍ଯ୍ୟନ୍ତ ଅନଧିକୃତ ଅନୁପସ୍ଥିତ ରହିଥିବା ଜଣାପଡିଥିଲା। ଏହି ବିଭାଗରେ ଜଣେ ପ୍ରଫେସର ଓ ଜଣେ ଆସିଷ୍ଟାଣ୍ଟ ପ୍ରଫେସର, ଜୁନିୟର ରେସିଡେଣ୍ଟ ଦୁଇଜଣ, ୯ଜଣ ନର୍ସ ରହିଥିବା ବେଳେ ୩ଜଣ ଟେକ୍ନିସିଆନ୍ ରହିଥିବା ଜଣାପଡିଛି। ପ୍ରତ୍ୟେକ ଦିନ ୨୮ରୁ ୩୦ ଜଣ ଡାୟାଲେସିସ୍ ହେଉଥିବା ବେଳେ ମଙ୍ଗଳବାର ଓ ଶନିବାର ଆଉଟଡୋରକୁ ଶତାଧିକ ରୋଗୀ ଆସୁଛନ୍ତି। ମଙ୍ଗଳବାର ଆଉଟଡୋରରେ ବିଭାଗୟୀ ପ୍ରଫେସରଙ୍କୁ ଦେଖିବାକୁ ମିଳୁଛି, କିନ୍ତୁ ଅନ୍ୟଦିନମାନଙ୍କରେ ଏହି ବିଭାଗରେ ଡାକ୍ତର ମରୁଡ଼ି ବୋଲି ରୋଗୀ ଅଭିଯୋଗ କରି ଆସୁଥିଲେ। ଗୁରୁବାର, ଶୁକ୍ରବାର ଓ ଶନିବାର ଆସିଷ୍ଟାଣ୍ଟ ପ୍ରଫେସର ଆସୁଥିବା ବେଳେ ପ୍ରଫେସର କେବଳ ମଙ୍ଗଳବାର ଆସୁଥିବା ମଧ୍ୟ ଅଭିଯୋଗ ଉଠିଛି। ଅନ୍ୟଦିନରେ କେହି ବି ଡାକ୍ତର ରହୁନାହାନ୍ତି। କିଡନି ବିଭାଗ ଏକ ଗୁରୁତ୍ୱପୂର୍ଣ୍ଣ ବିଭାଗ ହୋଇଥିବା ବେଳେ ଡାକ୍ତରଙ୍କ ଅନୁପସ୍ଥିତ କାରଣରୁ ଅନେକ ରୋଗୀ ଚିକିତ୍ସାରୁ ବଞ୍ଚିତ ହେଉଛନ୍ତି। କେତେକ ଡାକ୍ତର କଟକରେ ରହି ସେଠାରେ ଘରୋଇ ହସ୍ପିଟାଲରେ ରୋଗୀ ଚିକିତ୍ସା କରୁଥିବା ବେଳେ ବ୍ରହ୍ମପୁର ଏମକେସିଜି ମେଡିକାଲରୁ ଦରମା ନେଉଛନ୍ତି। ଯାହାଫଳରେ ଏଠି ରୋଗୀ ସେବା ସମ୍ପୁର୍ଣ୍ଣ ବାଧାପ୍ରାପ୍ତ ହେଉଛି ବୋଲି ମାନବ ଅଧିକାର ସୁରକ୍ଷା ମଞ୍ଚର ଆବାହକ ଅବନୀ ଗୟା କହିଛନ୍ତି।
