କେନ୍ଦୁଝର, ୧୨।୮(ସ୍ବ.ପ୍ର.): କେନ୍ଦୁଝର ଜିଲା ତେଲକୋଇ ଥାନା ଜଗମୋହନପୁର ଗ୍ରାମ ମଣ୍ଡା ସାହିରେ ଗୁରୁବାର ଏକ ଦୁଃଖଦ ଘଟଣା ଘଟିଛି। ଦୁଇ ଭଉଣୀ ଖେଳୁଥିବା ବେଳେ ଅସାବଧାନତାବଶତଃ ପୋଖରୀରେ ପଡ଼ିଯିବାରୁ ସେମାନଙ୍କ ମୃତ୍ୟୁ ଘଟିଛି। ମୃତକଦ୍ୱୟ ହେଲେ ଯୋଗୀ ମୁଣ୍ଡାଙ୍କ ୩ ବର୍ଷର ଝିଅ ସୁଇଟି ଏବଂ ସୁଶୀଲ ମୁଣ୍ଡାଙ୍କ ୪ ବର୍ଷର ଝିଅ ପରୀ। ଉଭୟ ସମ୍ପର୍କରେ ବଡବାପା ଝିଅ, ଦାଦା ଝିଅ ଭଉଣୀ ବୋଲି ଜଣାପଡିଛି।
ମିଳିଥିବା ସୂଚନା ମୁତାବକ, ଯୋଗୀ ମୁଣ୍ଡା ନିକଟସ୍ଥ ବିଞ୍ଜବହାଳ ଗ୍ରାମକୁ ଗୋରୁ ଚରାଇବାକୁ ଯାଇଥିବା ବେଳେ ତାଙ୍କ ସ୍ତ୍ରୀ ଲକ୍ଷ୍ମୀ ଖାଇବା ନେଇ ସ୍ବାମୀଙ୍କ ପାଖକୁ ଯାଇଥିଲେ। ଅନ୍ୟପଟେ ସୁଶୀଲ ଓ ତାଙ୍କ ସ୍ତ୍ରୀ ରାଇବାରୀ ମଜୁରି ଲାଗିବାକୁ ଯାଇଥିଲେ। ଘରେ ଦୁଇ ଝିଅ ଓ ତାଙ୍କର ୫ବର୍ଷର ଭାଇ ରାହୁଲ ଥିଲେ। ସୁଇଟି ଓ ପରୀ ଖେଳିବାକୁ ପୋଖରୀ ଆଡେ ଚାଲି ଯାଇଥିଲେ। କିଛି ସମୟ ପରେ ରାହୁଲ ୨ଭଉଣୀଙ୍କୁ ଖୋଜିଖୋଜି ପୋଖରୀ ନିକଟରେ ପହଞ୍ଚିଥିଲେ। ପାଣିରେ ଦୁଇ ଭଉଣୀ ପଡ଼ିଥିବା ଦେଖି ରାହୁଲ ସୁଇଟିକୁ ପାଣିରୁ ଉଠାଇ ବାହାରକୁ ଆଣିଥିଲେ। ହେଲେ ପରୀକୁ ଉଠାଇବାକୁ ଚେଷ୍ଟା କରି ଆଣି ପାରି ନ ଥିଲେ। ପରେ ପରିବାର ଲୋକେ ପହଞ୍ଚି ଉଭୟଙ୍କୁ ଉଦ୍ଧାର କରି ସଙ୍ଗେ ସଙ୍ଗେ ଆମ୍ବୁଲାନ୍ସ ଯୋଗେ ତେଲକୋଇ ମେଡିକାଲରେ ଭର୍ତ୍ତି କରିଥିଲେ। କିନ୍ତୁ ଡାକ୍ତର ସେମାନଙ୍କୁ ମୃତ ଘୋଷଣା କରିଥିଲେ। ଖବରପାଇ ତେଲକୋଇ ପୋଲିସ ମେଡିକାଲରେ ପହଞ୍ଚି ମୃତଦେହ ଜବତ କରିଛି। ଏହି ଘଟଣା ପରେ ସାହିରେ ଶୋକାକୁଳ ପରିବେଶ ସୃଷ୍ଟି ହୋଇଛି ।
