ଝାରସୁଗୁଡ଼ା ଅଫିସ,୧୦ା୧୦: ଝାରସୁଗୁଡ଼ା ଜିଲା ବ୍ରଜରାଜନଗର ଓ ବେଲପାହାଡ଼ ଅଞ୍ଚଳରେ ନକଲି ବିଦେଶୀ ମଦ ତିଆରି ଚାଲିଥିବା ନେଇ ଗୁଇନ୍ଦା ବିଭାଗ ସୂତ୍ରରୁ ଖବର ମିଳିଥିଲା। ସ୍ଥାନୀୟ ଅବକାରୀ ବିଭାଗକୁ ନ ଜଣାଇ ସମ୍ବଲପୁର ଅବକାରୀ ବିଭାଗର ଏକ ସ୍ବତନ୍ତ୍ର ସ୍କ୍ବାଡ୍ ବ୍ରଜରାଜନଗର ତେଲେନପାଲି ଗଣେଶନଗରର ଏକ ଘର ଉପରେ ଚଢାଉ କରିଥିଲା। ଏଥିରେ ସମ୍ପୃକ୍ତ ୨ ଭାଇଙ୍କୁ ଗିରଫ କରାଯାଇଛି। ସେମାନେ ହେଲେ ଶିବ କୁମାର ସନହରା ଓ ସରୋଜ କୁମାର ସନହରା। ଗିରଫ ଅଭିଯୁକ୍ତଙ୍କ ନିକଟରୁ ଅବକାରୀ ଟିମ୍ ବିଭିନ୍ନ ପ୍ରକାରର ଶତାଧିକ ବିଦେଶୀ ମଦ ବୋତଲ ଜବତ କରିଛି। ଏହା ସହିତ ଜବତ ହୋଇଛି ଖାଲି ବୋତଲ, ଠିପି, ନକଲି ଲେବୁଲ୍। ଜବତ ସାମଗ୍ରୀର ମୂଲ୍ୟ ଦେଢଲକ୍ଷ ଟଙ୍କା ହେବ ବୋଲି ଅବକାରୀ ବିଭାଗ ସୂତ୍ରରୁ ଜଣାପଡିଛି। ନକଲି ଲେବୁଲ୍ରେ ଅରୁଣାଚଳ ପ୍ରଦେଶ ଲେଖା ରହିଥିବା ଦେଖିବାକୁ ମିଳିଛି। ଏହି ମଦକୁ ଅଞ୍ଚଳରେ ଥିବା ବିଭିନ୍ନ ହୋଟେଲ ଓ ଢାବାକୁ ପଠାଯାଉଥିଲା ବୋଲି ଗିରଫ ଅଭିଯୁକ୍ତ ପ୍ରକାଶ କରିଛନ୍ତି। ଏହି ର଼୍ୟାକେଟ୍ର ଚେର ରାଜ୍ୟ ବାହାରକୁ ଲମ୍ବିଥିବା ଅବକାରୀ ବିଭାଗର ପ୍ରାଥମିକ ତଦନ୍ତରୁ ଜଣାପଡିଛି। ଏଥିରେ ରାଉରକେଲା ଜଲଦା ଅଞ୍ଚଳର ଜଣେ ମୁଖ୍ୟ ଅଭିଯୁକ୍ତ ରହିଛନ୍ତି। ଏହି ସ୍କ୍ବାଡ୍ରେ ସମ୍ବଲପୁର ଅବକାରୀ ଇନ୍ସପେକ୍ଟର ଶ୍ରୁତିକାନ୍ତ ରାଉତ, ଏସ୍ଆଇ କେ.ସି. ମଲ୍ଲିକଙ୍କ ସମେତ ୧୦ଜଣ ଅଧିକାରୀ ସାମିଲ ହୋଇଥିଲେ।
