ଚେନ୍ନାଇ,୨।୯: ତାମିଲନାଡୁର ରାଜନୀତିରେ ଏବେ ଥଲାପତି ବିଜୟଙ୍କୁ ନେଇ ଜୋରଦାର ଚର୍ଚ୍ଚା ଆରମ୍ଭ ହୋଇଛି। ସତ୍ତାରୂଢ଼ ଟିଭିକେ (TVK)ର ନେତା ଓ ମନ୍ତ୍ରୀମାନେ ବିଜୟଙ୍କୁ ୨୦୨୯ରେ ପ୍ରଧାନମନ୍ତ୍ରୀ ପଦ ପାଇଁ ପ୍ରାର୍ଥୀ ଭାବେ ପ୍ରୋଜେକ୍ଟ କରୁଥିବା ବେଳେ, ଏହାକୁ ନେଇ କଂଗ୍ରେସ ପୂର୍ବରୁ ଚେତାବନୀ ଦେଇଥିଲା। କିନ୍ତୁ ଏହା ସତ୍ତ୍ୱେ ଟିଭିକେ ନେତାମାନେ ବିଜୟଙ୍କୁ ‘ଫ୍ୟୁଚର ପିଏମ’ ଭାବେ ଦର୍ଶାଇବା ଜାରି ରଖିଛନ୍ତି। ଏବେ ଟିଭିକେର ଆଷ୍ଟ୍ରୋଲଜର ତଥା ସେଲିବ୍ରିଟି ବିଧାୟିକା କନିମୋଝି ସନ୍ତୋଷଙ୍କ ଏକ ବୟାନ ତାମିଲନାଡୁ ରାଜନୀତିକୁ ଆହୁରି ଗରମ କରିଦେଇଛି। ବୁଧବାର କନିମୋଝି ସନ୍ତୋଷ ଦାବି କରିଛନ୍ତି ଯେ, ୨୦୨୯ର ପ୍ରଧାନମନ୍ତ୍ରୀ ପ୍ରାର୍ଥୀ ଆମ କମାଣ୍ଡର ବିଜୟ ନିଜେ ହେବେ।
ସେ କହିଛନ୍ତି, ରାହୁଲ ଗାନ୍ଧୀ ନିଜେ ବିଜୟଙ୍କ ହାତ ଧରିବେ, ତାଙ୍କୁ ସାଙ୍ଗରେ ନେଇଯିବେ ଏବଂ ପ୍ରଧାନମନ୍ତ୍ରୀଙ୍କ ଆସନରେ ବସାଇବେ। ତାଙ୍କ ଏହି ବୟାନ ଏପରି ଏକ ସମୟରେ ଆସିଛି, ଯେତେବେଳେ ବିଜୟଙ୍କୁ ଭବିଷ୍ୟତର ପ୍ରଧାନମନ୍ତ୍ରୀ ଭାବେ ପ୍ରୋଜେକ୍ଟ କରାଯିବାକୁ ନେଇ କଂଗ୍ରେସର ୫ ଜଣ ବିଧାୟକ ସରକାରରୁ ବାହାରିଯିବା ନେଇ ଚେତାବନୀ ଦେଇଥିବା କୁହାଯାଉଛି। କଂଗ୍ରେସର ୨ ଜଣ ବିଧାୟକ ବିଜୟଙ୍କ ସରକାରରେ ମନ୍ତ୍ରୀ ଅଛନ୍ତି।
