କେନ୍ଦୁଝର,୧୨ା୭(ନରେଶ ଚନ୍ଦ୍ର ପଟ୍ଟନାୟକ): ରବିବାର ସକାଳେ କେନ୍ଦୁଝର ଜିଲାର ଜୁଡ଼ିଆ ଘାଟିରେ ଏକ ପିଆଜ ବୋଝେଇ ଟ୍ରକ୍ ଓଲଟି ୨ ଜଣ ଆହତ ହୋଇଛନ୍ତି।
ଉକ୍ତ ପିଆଜ ବୋଝେଇ ଟ୍ରକ୍ଟି ଘାଟି ରାସ୍ତାରେ ଯାଉଥିବା ବେଳେ ଭାରସାମ୍ୟ ହରାଇ ରାସ୍ତା ଉପରେ ଓଲଟି ପଡ଼ିଥିଲା। ଫଳରେ ବହୁ ପରିମାଣର ପିଆଜ ରାସ୍ତା ଉପରେ ବିଛାଇ ହୋଇଯାଇଥିଲା। ଖବର ପାଇ ଲସ୍ଥାନୀୟ ଲୋକଙ୍କ ଭିଡ଼ ଜମିଥିଲା। ଲୋକମାନେ ପିଆଜ ଗୋଟାଇ ବୋହି ନେଉଥିବା ଦୃଶ୍ୟ ଦେଖିବାକୁ ମିଳିଥିଲା। ଏହାର ଭିଡିଓ ଏବେ ସାମାଜିକ ମିଡିଆରେ ଭାଇରାଲ ହେଉଛି।
କିଛି ଲୋକ ବ୍ୟାଗ, ବସ୍ତା ଓ ଝୁଡ଼ି ଧରି ପିଆଜ ସଂଗ୍ରହ କରୁଥିବା ଦୃଶ୍ୟ ଭାଇରାଲ ହେଉଥିବା ବେଳେ କେତେକ ଅଟୋରେ ବୋହି ସହରରେ କମ୍ ଦାମରେ ବିକ୍ରି କରୁଥିବା ଆଲୋଚ୍ୟର ବିଷୟ ହୋଇଛି। ଏହା ଫଳରେ ରାସ୍ତାରେ ଯାତାୟାତ କିଛି ସମୟ ଠପ୍ ହୋଇ ଯାଇଥିଲା।
ପରେ ଖବର ପାଇ ସ୍ଥାନୀୟ ପୋଲିସ ଓ ପ୍ରଶାସନିକ ଅଧିକାରୀମାନେ ଘଟଣାସ୍ଥଳରେ ପହଞ୍ଚିବା ପରେ ସ୍ଥିତି ନିୟନ୍ତ୍ରଣ ହୋଇଥିଲା ଏବଂ ଯାତାୟାତ ସ୍ବାଭାବିକ ହୋଇଥିଲା। ପୋଲିସ ବଳକା ପିଆଜ ସହିତ ଦୁର୍ଘଟଣାଗ୍ରସ୍ତ ଟ୍ରକ୍କୁ ଜବତ କରି ତଦନ୍ତ କରୁଛି। ଟ୍ରକ୍ର ଆହତ ହୋଇଥିବା ଚାଳକ ଓ ହେଲ୍ପର ସ୍ଥାନୀୟ ଡାକ୍ତରଖାନାରେ ଚିକିତ୍ସିତ ଅଛନ୍ତି। ପୋଲିସ ଦୁର୍ଘଟଣାର ପ୍ରକୃତ କାରଣ ଏବଂ କ୍ଷୟକ୍ଷତି ସମ୍ପର୍କରେ ତଦନ୍ତ ଜାରି ରଖିଛି।
