ରଣପୁର,୨୬ା୧୨(ସୁକାନ୍ତ କିଶୋର ଡାକୁଆ): ନୟାଗଡ଼ ଜିଲା ରଣପୁର ବନବିଭାଗ ଅଧୀନରେ ଥିବା କାଞ୍ଚନପୁର କାଜୁ ଜଙ୍ଗଲରେ ଏକ ଅସୁସ୍ଥ ଦନ୍ତା ହାତୀ ଗତ ୫ ଦିନ ହେବ ବୁଲୁଥିଲା। ଏ ନେଇ ସ୍ଥାନୀୟ ଗ୍ରାମବାସୀ ବନ ବିଭାଗକୁ ଜଣାଇଥିଲେ। ବନ ବିଭାଗ ପକ୍ଷରୁ ଅସୁସ୍ଥ ହାତୀର ଚିକିତ୍ସା ଆରମ୍ଭ କରାଯାଇଛି। କୌଣସି ଶିକାରୀଙ୍କ ଗୁଳିମାଡ଼ରେ ହାତୀର ଆଗ ବାମ ଗୋଡ଼ରେ କ୍ଷତ ସୃଷ୍ଟି ହୋଇଥିଲା। ଆବଶ୍ୟକ ଚିକିତ୍ସା ଅଭାବରୁ ତାହା ସଂକ୍ରମଣ ହୋଇଥିଲା। ଫଳରେ ହାତୀଟି ଠିକ୍ରେ ଚାଲି ପାରୁ ନ ଥିବା ସ୍ଥାନୀୟ ଲୋକମାନେ କହିଥିଲେ। ହେଲେ ଶିକାରୀଙ୍କ ଗୁଳିମାଡ଼ ଘଟଣାକୁ ବନ ବିଭାଗ ଖଣ୍ଡନ କରିଛି l
ଅନ୍ୟପକ୍ଷେ ହାତୀ ଅସୁସ୍ଥ ଥିବା ଜଣାପଡ଼ିବା ପରେ ଗ୍ରାମବାସୀ ହାତୀକୁ ଦେଖିବାକୁ କାଜୁ ଜଙ୍ଗଲରେ ଭିଡ଼ ଜମାଇଥିଲେ। ଫଳରେ ହାତୀଟି ଜଙ୍ଗଲ ଭିତରକୁ ଚାଲିଯାଇଥିଲା l ଫଳରେ ହାତୀକୁ ଚିକିତ୍ସା କରିବା ପାଇ ବନ ବିଭାଗକୁ କସରତ କରିବାକୁ ପଡିଥିଲା। ରଣପୁର ବନବିଭାଗ ଅଧିକାରୀ ଓ କର୍ମଚାରୀଙ୍କ ସହିତ ନନ୍ଦନକାନନରୁ ଆସିଥିବା ସ୍ବତନ୍ତ୍ର ବିଶେଷଜ୍ଞ ଦଳ ରବିବାର ରାତିରୁ କାଜୁ ଜଙ୍ଗଲରେ ଡେରା ପକାଇଥିଲେ। ରାତିସାରା ରଣପୁର ରେଞ୍ଜର ୨ ଟିମ୍ ଅସୁସ୍ଥ ଦନ୍ତାକୁ କାଜୁ ଜଙ୍ଗଲରେ ଖୋଜିବା ଆରମ୍ଭ କରିଥିଲେ। ହାତୀର ସନ୍ଧାନ ମିଳିବା ପରେ ଟାଙ୍କୁଲାଇଜାର କରି ଚିକିତ୍ସା ଆରମ୍ଭ କରାଯାଇଛି। ହାତୀର ଗୋଡ଼ରେ ଗଭୀର କ୍ଷତ ରହିଛି। ତାହା ସଂକ୍ରମଣ ହୋଇଛି। ଚିକିତ୍ସା ପରେ ସେଥିରେ ଉନ୍ନତି ଆସିଛି ବୋଲି ରଣପୁର ରେଞ୍ଜର ସୁଶାନ୍ତ ଦଳେଇ କହିଛନ୍ତି।
