ଛତ୍ରପୁର,୧୪।୫(ଡି.ଏନ୍.ଏ):ଗଞ୍ଜାମ ଜିଲା ମୁଖ୍ୟାଳୟ ଛତ୍ରପୁରରେ ଥିବା ଜିଲା ଟ୍ରେଜେରି ଅଫିସର ଷ୍ଟ୍ରଙ୍ଗରୁମ ବିପଦଶଙ୍କୁଳ ଅବସ୍ଥାରେ ଦୀର୍ଘ ବର୍ଷ ହେଲା ରହିଛି। ଅଫିସ ଷ୍ଟ୍ରଙ୍ଗରୁମର କାନ୍ଥ ଓ ଛାତର ବିଭିନ୍ନ ସ୍ଥାନରେ ଫାଟ ଦେଖାଦେଲାଣି। ଏପରିକି ବର୍ଷା ଦିନେ ହେଉ ଅବା କାଳ ବୈଶାଖୀରେ ବର୍ଷା ପାଣି ଫାଟ ଦେଇ ଘର ଭିତରକୁ ପ୍ରବେଶ କରୁଛି। ଫଳରେ ଷ୍ଟ୍ରଙ୍ଗ ରୁମରେ ଥିବା ସରକାରୀ ସମ୍ପତି ପ୍ରତି ବିପଦ ଆଶଙ୍କା ଦେଖାଦେଉଛି । ସୂଚନାଯୋଗ୍ୟ ଉକ୍ତ ଟ୍ରେଜରୀ ଅଫିସର ଷ୍ଟ୍ରଙ୍ଗରୁମରେ ସରକାରଙ୍କ ବିଭିନ୍ନ ଗୁରୁତ୍ୱପୂର୍ଣ୍ଣ କାଗଜପତ୍ର ଠାରୁ ଆରମ୍ଭ କରି ହାତୀ ଦାନ୍ତ, ଷ୍ଟାମ୍ପ ଆଦି ବିଭିନ୍ନ ସରକାରୀ ସମ୍ପତି ଗଛିତ ରଖାଯାଇଥାଏ। ଏଠାରେ ୨୪ ଘଣ୍ଟିଆ ପୋଲିସ କର୍ମଚାରୀ ମୁତୟନ ସହ ସିସି କ୍ୟାମେରା ଲଗାଯାଇଛି। କିନ୍ତୁ ଟ୍ରେଜେରୀ ଅଫିସ ଷ୍ଟ୍ରଙ୍ଗରୁମରେ ଥିବା ସରକାରୀ ସମ୍ପତି ଆଦୌ ନିରାପଦ ନଥିବା ଜଣାପଡିଛି। ଆହୁରି ଜଣାଯାଇଛି ଯେ ଟ୍ରେଜରୀ ଅଫିସର ଷ୍ଟ୍ରଙ୍ଗରୁମକୁ ଯିବାକୁ ଥିବା ପାସେଜ ମଧ୍ୟ ଭାଙ୍ଗିରୁଜି ଯାଇଛି। ଏହା ପୁରୁଣା ହୋଇଥିବାରୁ ଏଠାରୁ ଲିକ୍ କରୁଛି। କିଛି ଦିନ ପୂର୍ବେ ଏହାର ମରାମତି କରାଯାଇଥିଲା। ମାତ୍ର ଏବେ ସେଠାରୁ ଲିକ୍ ହେଉଛି। ଷ୍ଟ୍ରଙ୍ଗରୁମ ଓ ପାସେଜ ମରାମତି ଅତ୍ୟନ୍ତ ଜରୁରୀ ହୋଇପଡିଛି। ଏହା ମରାମତି କରିବାକୁ ଗଞ୍ଜାମ ଟ୍ରେଜେରି ଅଫିସରଙ୍କ ପକ୍ଷରୁ ୨ ତାରିଖରେ ଏକ ଚିଠି (୧୦୭୫) ବ୍ରହ୍ମପୁରସ୍ଥିତ ଗଞ୍ଜାମ ଆରଏବି -୨ ଅଧୀକ୍ଷଣ ଯନ୍ତ୍ରୀଙ୍କୁ ଲେଖାଯାଇଛି। ଷ୍ଟ୍ରଙ୍ଗରୁମର ଛାତ ଓ କାନ୍ଥରୁ ପାଣି ଗଳୁଥିବାରୁ ସରକାରୀ ସମ୍ପତି ଓ ଷ୍ଟାମ୍ପ ବକ୍ସଗୁଡିକୁ ଅନ୍ୟତ୍ର ନିରାପଦ ସ୍ଥାନକୁ ସ୍ଥାନାନ୍ତର କରିବାକୁ ପଡୁଛି। ତେବେ ବହୁ ସରକାରୀ ସମ୍ପତି ଗଛିତ ଥିବାରୁ ସ୍ଥାନ ଅଭାବ ରହୁଛି। ଏହାର ଯାଞ୍ଚ କରି ଷ୍ଟ୍ରଙ୍ଗରୁମର ମରାମତି କରିବାକୁ ଉକ୍ତ ଚିଠିରେ ଅନୁରୋଧ କରାଯାଇଛି। ଛତ୍ରପୁରସ୍ଥିତ ଗଞ୍ଜାମ ଟ୍ରେଜେରୀ ଅଫିସର ପ୍ରଥମ ମହଲାରେ ୫୦ ସିଟ୍ ବିଶିଷ୍ଟ ଏକ ସମ୍ମିଳନୀ ଗୃହ ରହିଛି। ସେଠାରେ ପ୍ରୋଜେକ୍ଟର ସୁବିଧା ଅଛି । ଏଠାରେ ଜିଲାର ସମସ୍ତ ସରକାରୀ ଅଫିସମାନଙ୍କର ଡିଡିଓମାନଙ୍କୁ ତାଲିମ ନିୟମିତ ଦିଆଯାଇଥାଏ। ମାତ୍ର ଉକ୍ତ ସମ୍ମିଳନୀ ଗୃହରେ ପାଇଖାନାର ସୁବିଧା ନାହିଁ। ଏଠାକୁ ଆସୁଥିବା ଡିଡିଓମାନଙ୍କୁ ଅସୁବିଧାର ସମ୍ମୁଖୀନ ହେବାକୁ ପଡୁଛି। ଏଣୁ ପାଇଖାନା ନିର୍ମାଣର ଆବଶ୍ୟକତା ରହିଛି ଏବଂ ଏହା ନିର୍ମାଣ ପାଇଁ ଅନୁରୋଧ କରାଯାଇଛି। ଆହୁରି ଜଣାଯାଇଛି ଯେ, ପୁରୁଣା ହୋଇଥିବାରୁ ଟ୍ରେଜେରି ଅଫିସର ପାଚେରି ମଧ୍ୟ ଭାଙ୍ଗିରୁଜି ଗଲାଣି। ଏଠାରେ ପାର୍କିଂ ସୁବିଧା ନଥିବାରୁ ଗାଡ଼ି ପାର୍କିଂ ଅନ୍ୟ ସ୍ଥାନମାନଙ୍କରେ କରିବାକୁ ପଡୁଛି। ଫଳରେ ଗାଡ଼ିଗୁଡିକ ସୁରକ୍ଷିତ ରହୁନି। ଏହିସବୁ ଉପରେ ପଦକ୍ଷେପ ନେବାକୁ ଉକ୍ତ ଚିଠିରେ ଅନୁରୋଧ କରାଯାଇଛି। ଏ ସମ୍ପର୍କରେ ଗଞ୍ଜାମ ଜିଲାପାଳଙ୍କୁ ମଧ୍ୟ ଚିଠି ଦ୍ୱାରା ଟ୍ରେଜେରୀ ଅଫିସର ଅବଗତ କରିଛନ୍ତି।
