ନୟାଗଡ଼ ଅଫିସ,୧୪ା୧୧: ନୟାଗଡ଼ ଜିଲାରେ ଧାନ କିଣାବିକାରେ ସ୍ବଚ୍ଛତା ରହୁନାହିଁ। ୨୦୧୯-୨୦ ଆର୍ଥିକ ବର୍ଷର ସ୍ଥିତି ଅନୁଧ୍ୟାନ କଲେ ଏହା ସ୍ପଷ୍ଟ ହେବ। ଚଳିତବର୍ଷ ଏହି ଅନିୟମିତତା ରୋକା ନ ଗଲେ କଂଗ୍ରେସ ଓ ଭାଜପା ଆନ୍ଦୋଳନ କରିବାକୁ ଧମକ ଦେଇସାରିଲେଣି। ବର୍ତ୍ତମାନ ସୁଦ୍ଧା ଜିଲାରେ ଧାନମଣ୍ଡି ଖୋଲିନାହିଁ। ଏହାକୁ ସୁଯୋଗ ମନେକରି ଦଲାଲ ସକ୍ରିୟ ହୋଇଉଠିଛନ୍ତି। ସେମାନେ ଗାଁ ଗାଁରେ ବୁଲି ଧାନ କିଣିବା ଆରମ୍ଭ କଲେଣି।
ଭାଟସାହିର କୁଳମଣି ବେହେରା, ରାମଚନ୍ଦ୍ର ସାମନ୍ତରାୟ କୁହନ୍ତି, ଜିଲାର ଅଧିକାଂଶ ପ୍ରାଥମିକ କୃଷି ସମବାୟ ସମିତି ଅଧୀନରେ ଗତବର୍ଷ ଧାନ କିଣାବିକାରେ ଦୂୁର୍ନୀତି ହୋଇଥିଲା। ଚାଷୀମାନେ ଅଭିଯୋଗ କରିବା ପରେ କେତେଜଣ କର୍ମଚାରୀଙ୍କୁ ନିଲମ୍ବିତ କରି ଦାୟିତ୍ୱ ଶେଷ କରିଦିଆଗଲା। ହେଲେ ଚାଷୀ କିପରି ତା’ ଧାନ ବିକ୍ରି କରିବ ସେ ନେଇ ପଦକ୍ଷେପ ନିଆଗଲା ନାହିଁ। ଗଣିଆର ଡମ୍ବରୁ ପ୍ରଧାନ, ରଣପୁରର ସୁଦାମ ସାହୁ, ନୟାଗଡ଼ର ଅଭିମନ୍ୟୁ ବେହେରା ଓ ଦଶପଲ୍ଲାର ଭୀମ ନାୟକ କୁହନ୍ତି, ଚଳିତ ଖରିଫ ଋତୁରେ ଧାନ କିଣାବିକା ପାଇଁ ପଦକ୍ଷେପ ନାହିଁ। ଶୁଣାଯାଉଛି ଡିସେମ୍ବରରେ ଧାନକିଣା ହେବ। ହେଲେ ମଣ୍ଡି ଖୋଲିବାରେ ବିଳମ୍ବ ଯୋଗୁ ଚାଷୀ ବେପାରୀ ଓ ଦଲାଲଙ୍କୁ ଧାନ ବିକ୍ରି କରିବା ଆରମ୍ଭ କଲେଣି। ଜିଲା କଂଗ୍ରେସ ସଭାପତି ରଣଜିତ୍ ଦାଶ ଓ ଜିଲା ଭାଜପା ସଭାପତି ଲାଲା ମନୋଜ ରାୟ କୁହନ୍ତି, ଗତବର୍ଷ ଧାନ କିଣାବିକା ଦୁର୍ନୀତି ଯୋଗୁ ଚାଷୀ ଧାନ ବିକ୍ରି କରିପାରି ନ ଥିଲେ। ସରକାର ଚାଷୀଙ୍କୁ ଗୁରୁତ୍ୱ ଦେଉଥିବା ଡିଣ୍ଡିମ ପିଟୁଥିଲେ ମଧ୍ୟ ଏହି ଦୁର୍ନୀତିକୁ ରୋକାଯାଉ ନାହିଁ। ଚଳିତବର୍ଷ ଚାଷୀ ହଇରାଣ ହେବା ନଜରକୁ ଆସିଲେ ଆନ୍ଦୋଳନ କରାଯିବ। ନୟାଗଡ଼ ଏଆର୍ସିଏସ୍ ଭାସ୍କର ପାଣିଗ୍ରାହୀ କୁହନ୍ତି, ଧାନ କିଣାବିକାରେ ହୋଇଥିବା ଅନିୟମିତତା ନେଇ ଗତ ବର୍ଷ ନିଲମ୍ବିତ ୫ଜଣ କର୍ମଚାରୀଙ୍କୁ ରି ଇନ୍୍ଷ୍ଟେଡ କରାଯାଇ ନାହିଁ। ଧାନ କିଣାବିକାରେ ଅନିମୟିତତା ନଜରକୁ ଆସିଲେ ତୁରନ୍ତ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ। ଜିଲା ଯୋଗାଣ ଅଧିକାରୀ ବ୍ରଜବନ୍ଧୁ ନାୟକ କୁହନ୍ତି, ଜିଲାରେ ଡିସେମ୍ବରରେ ଧାନ କିଣାବିକା କରାଯିବ। ଏ ନେଇ ଜିଲାସ୍ତରୀୟ ବୈଠକ ପରେ ପଦକ୍ଷେପ ନିଆଯିବ। ତେବେ ଚାଷୀ ଯେପରି ହଇରାଣ ନ ହେବେ ସେଥିପ୍ରତି ଗୁରୁତ୍ୱ ଦିଆଯିବ।
