ଲଣ୍ଡନ, ୧୫ା୭ (ପି.ଟି.)-ଟୋନି ଇରିଶ ଇଂଲଣ୍ଡ ଓ ଓ୍ବେଲ୍ସର ପ୍ରଫେସନାଲ କ୍ରିକେଟର୍ସ ଆସୋଏଶନ (ପିସିଏ)ର ମୁଖ୍ୟ କାର୍ଯ୍ୟନିର୍ବାହୀ ପଦବୀରୁ ତାଙ୍କର ଇସ୍ତଫା ପ୍ରଦାନ କରିଛନ୍ତି। ସାଉଥ୍ ଆଫ୍ରିକାନ କ୍ରିକେଟର୍ସ ଆସୋସିଏଶନ ପାଇଁ ୧୭ ବର୍ଷ ଧରି କାର୍ଯ୍ୟକରିବା ପରେ ଇରିିଶ ଗତ ଜାନୁୟାରୀରେ ପିସିଏରେ ଯୋଗଦାନ କରିଥିଲେ। ମାତ୍ର ବ୍ୟକ୍ତିଗତ କାରଣ ଦର୍ଶାଇ ସେ ଏହି ପଦ ତ୍ୟାଗ କରିବା ସହ ନିଜ ଦେଶକୁ ଫେରିଯିବାକୁ ନିଷ୍ପତ୍ତି ନେଇଛନ୍ତି। ମିଡଲସେକ୍ସରୁ ଆସି ଗତ ଫେବୃୟାରୀରେ ଯୋଗଦାନ କରିଥିବା ପିସିଏର କମର୍ସିଆଲ ଡାଇରେକ୍ଟର ରବ୍ ଲିଞ୍ଚ୍ କାମଚଳା ସିଇଓ ଭାବେ ନିଯୁକ୍ତି ପାଇଛନ୍ତି। ଇରିଶ ବର୍ତ୍ତମାନ ଫେଡେରେଶନ ଅଫ୍ ଇଣ୍ଟରନ୍ୟାଶନାଲ କ୍ରିକେଟର୍ସ ଆସୋସିଏଶନ୍ସ (ଏଫ୍ଆଇସିଏ)ର କାର୍ଯ୍ୟନିର୍ବାହୀ ଚେୟାରମ୍ୟାନ ଅଛନ୍ତି। ବର୍ତ୍ତମାନ ପରିସ୍ଥିତିରେ ଇଂଲଣ୍ଡର ପରିସ୍ଥିତି ସହ ଖାପ ଖୁଆଇ ଚଳିବା ତାଙ୍କର ପରିବାର ପାଇଁ କଷ୍ଟକର ଥିଲା ବୋଲି ଇରିଶ କହିଛନ୍ତି। କୋଭିଡ୍-୧୯ ମହାମାରୀ ଯୋଗୁ ପିସିଏ ଚେୟାରମ୍ୟାନ ଡେରିଲ ମିଚେଶଙ୍କ କାର୍ଯ୍ୟଭାର ଯଥେଷ୍ଟ ବଢ଼ିଯାଇଛି।
