ଗୋପ,୧୩।୧୦(ଡି.ଏନ୍.ଏ.):ପୁରୀ ଜିଲା ଗୋପ ବ୍ଲକର ଅଣ୍ତରା-ଇଚ୍ଛାପୁର ପଞ୍ଚାୟତରେ ପାଇଖାନା ଦୁର୍ନୀତି ହୋଇଥିବା ଅଭିଯୋଗ ହୋଇଥିଲା। ଏହି ଅଭିଯୋଗକୁ ଭିତ୍ତି କରି ମଙ୍ଗଳବାର ଭୁବନେଶ୍ବର ଭିଜିଲାନ୍ସ ବିଭାଗର ଏକ ୩ଜଣିଆ ଟିମ୍ ଉକ୍ତ ପଞ୍ଚାୟତରେ ପହଞ୍ଚତ୍ ତଦନ୍ତ ଆରମ୍ଭ କରିଛନ୍ତି। କିନ୍ତୁ ପ୍ରଥମ ଦିନରେ ଉକ୍ତ ପଞ୍ଚାୟତର ୩ଟି ଗାଁରେ ଏହି ଭିଜିଲାନ୍ସ ଟିମ୍ ୭୩ଜଣ ହିତାଧିକାରୀଙ୍କ ପାଇଖାନା ତଦନ୍ତ କରିଥିବା ବେଳେ ସମସ୍ତଙ୍କ ଠିକ୍ ଥିବା ଦେଖିବାକୁ ପାଇଥିଲେ। ଆଉ ଅବଶିଷ୍ଟ ହିତାଧିକାରୀଙ୍କ ପାଇଖାନା ତଦନ୍ତ କରାଯିବ ବୋଲି ଭିଜିଲାନ୍ସ ବିଭାଗ ଇନ୍ସପେକ୍ଟର ମମିତା ପ୍ରଧାନ ସୂଚନା ଦେଇଛନ୍ତି। ସୂଚନାଯୋଗ୍ୟ, ଗୋପ ବ୍ଲକର ଅଣ୍ତରା-ଇଚ୍ଛାପୁର ପଞ୍ଚାୟତରେ ପାଇଖାନା ନିର୍ମାଣରେ ବ୍ୟାପକ ଅନିୟମିତତା ହେବା ନେଇ ଅଭିଯୋଗ ହୋଇଥିଲା। ପଞ୍ଚାୟତରେ ୭୦୨ଟି ପାଇଖାନା ସ୍ବଚ୍ଛ ଭାରତ ଅଭିଯାନ ଯୋଜନାରେ ହେବାକୁ ଥିବାବେଳେ ବ୍ୟକ୍ତିଗତ ଭାବେ ହିତାଧିକାରୀମାନେ ନିର୍ମାଣ କରିଥିବା ବେଳେ ଆଉ କିଛି କୋଣାର୍କ ଅଞ୍ଚଳର ଏକ ସ୍ବେଚ୍ଛାସେବୀ ସଂଗଠନ ମଧ୍ୟ ପାଇଖାନା ନିର୍ମାଣ କରିଥିଲା। କିନ୍ତୁ ପାଇଖାନା ନିର୍ମାଣରେ ଦୁର୍ନୀତି ହୋଇଥିବା କେତେଜଣ ଲୋକ ଜାଣିବା ପରେ କିଛିଦିନ ତଳେ ଭିଜିଲାନ୍ସ ଦ୍ୱାରସ୍ଥ ହୋଇଥିଲେ। ଏହି ଅଭିଯୋଗକୁ ମଙ୍ଗଳବାର ପୂର୍ବାହ୍ନରେ ଭୁବନେଶ୍ୱର ଭିଜିଲାନ୍ସ ବିଭାଗ ମହିଳା ଇନ୍ସପେକ୍ଟର ପ୍ରଧାନଙ୍କ ନେତୃତ୍ୱରେ ଏହି ଟିମ ପ୍ରଥମେ ଅଣ୍ତରା-ଇଚ୍ଛାପୁର ପଞ୍ଚାୟତରେ ପହଞ୍ଚତ୍ ହିତାଧିକାରୀ କେଉଁଠି ଟଙ୍କା ପାଇଲେ, କେତେ ଟଙ୍କା ପାଇଛନ୍ତି ପଚାରିଥିଲେ। ହିତାଧିକାରୀମାନେ ଏହି ଯୋଜନାରେ ୧୨ହଜାର ଟଙ୍କା ପାଇବା ସହ କାହାରିକୁ ହାତଗୁଞ୍ଜା ଦେଇ ନାହାନ୍ତି ବୋଲି କହିବା ସହ ଅଭିଯୋଗ କରିଥିବା ବ୍ୟକ୍ତି ଉଦ୍ଦେଶ୍ୟମୂଳକ ଭାବେ ଏପରି କରିଥିବା ଭିଜିଲାନ୍ସ ଅଧିକାରୀଙ୍କୁ କହିଥିଲେ। ତଦନ୍ତ ସମୟରେ ବ୍ଲକର କନିଷ୍ଠଯନ୍ତ୍ରୀ ସତ୍ୟନାରାୟଣ ତ୍ରିପାଠୀ, ସାମାଜିକ କର୍ମୀ ନିରୁପମା ସ୍ବାଇଁ, ଅଜୟ ଜେନା, ରମଣ ପଟ୍ଟନାୟକ ପ୍ରମୁଖ ଉପସ୍ଥିତ ଥିଲେ ।
