ପାତ୍ରପୁର,୮ା୧୧(ଉମା ଚରଣ ନେପାକ): ଗଞ୍ଜାମ ଜିଲା ସାମନ୍ତିଆପଲ୍ଲୀ ବନାଞ୍ଚଳରେ ବାଘ ଆତଙ୍କ ଦେଖାଦେଇଛି । ପାତ୍ରପୁର ବ୍ଲକ ଜୟନ୍ତୀପୁର ଗ୍ରାମ ନିକଟରେ ରାତିରେ ଜଣେ ଅଟୋ ଚାଳକ ଗ୍ରାମକୁ ଫେରୁଥିବା ବେଳେ ବାଘ ରାସ୍ତା ପାର ହୋଇଥିବା ଦେଖି ସ୍ଥାନୀୟ ବନ ବିଭାଗକୁ ଜଣାଇଥିଲେ। ଏହା ପ୍ରଘଟ ହେବା ପରେ ଅଞ୍ଚଳରେ ଆତଙ୍କ ସୃଷ୍ଟି ହୋଇଥିଲା ।
ଖବରପାଇ ବନ ବିଭାଗ ଜୟନ୍ତୀପୁର ଆଖପାଖ ଗ୍ରାମରେ ପାଟ୍ରୋଲିଂ କରିବା ସହ ଜନ ସାଧାରଣଙ୍କୁ ସଚେତନ କରିଥିଲା। ଶୁକ୍ରବାର ସକାଳୁ ବିଭାଗ ପକ୍ଷରୁ ଉକ୍ତ ଅଞ୍ଚଳରେ ବାଘ ପାଦଚିହ୍ନ ଖୋଜା ଯାଇଥିଲା। ତେବେ ଏ ସମ୍ପର୍କରେ ଫରେଷ୍ଟର ଅବିନାଶ ଚୌଧୁରୀଙ୍କ ସହ ଯୋଗାଯୋଗ କରିବାରୁ ସେ କହିଛନ୍ତି, ବାଘ ଦେଖାଯାଇଥିବା ସୂଚନା ମିଳିବା ପରେ ଅଞ୍ଚଳରେ ପାଟ୍ରୋଲିଂ କରାଯାଇଛି। ବାଘର ଗତିବିଧି ନେଇ କୌଣସି ସ୍ପଷ୍ଟ ସୂଚନା ମିଳିନାହିଁ । କିନ୍ତୁ ଚିକିଟି ରାମପୁର ନିକଟରେ ବାଘର ପାଦଚିହ୍ନ ମିଳିଥିବା ଏବଂ ବାଘ ଏକ ମଇଁଷି ଛୁଆ ମାରି ଖାଇଥିବା ଫରେଷ୍ଟର ପ୍ରକାଶ କରିଛନ୍ତି । ଲୋକେ ଭୟଭୀତ ନହେବା ପାଇଁ ସେ ପରାମର୍ଶ ଦେଇଛନ୍ତି ।
