ବଡ଼ବିଲ,୨ା୭(ଦେବପ୍ରିୟ ରଣା): ହାଓ୍ବଡ଼ା-ବଡ଼ବିଲ ଜନଶତାବ୍ଦୀ ଟ୍ରେନ୍ ଉପରକୁ ପଥର ମାଡ଼ ହୋଇଛି। ଫଳରେ ବଗିର କାଚ ଭାଙ୍ଗି ଯାଇଥିବା ଜଣାପଡିଛି। ରବିବାର ଅପରାହ୍ନରେ ଝାଡ଼ଖଣ୍ଡ ରାଜ୍ୟ ବଡ଼ଜାମଦା ଷ୍ଟେଶନରୁ ଛାଡି ଟ୍ରେନ୍ଟି ବଡ଼ବିଲ ଅଭିମୁଖେ ଆସୁଥିଲା ବେଳେ କେହି ଦୁର୍ବୃତ୍ତ ଚଳନ୍ତା ଟ୍ରେନ୍ ଉପରକୁ ପଥର ମାଡ଼ କରିଥିଲେ। ପଥରଟି ବଗି ନଂ-୧୧ର ୫/୫/୬ ନମ୍ବର ସିଟର କାଚରେ ବାଜିଥିଲା। ଫଳରେ କାଚଟି ଭାଙ୍ଗି ଚୂର୍ମାର ହୋଇଯାଇଥିଲା। ସୌଭାଗ୍ୟବଶତଃ ସେହି ସିଟ୍ରେ କୌଣସି ଯାତ୍ରୀ ନ ଥିବାରୁ ଅଳ୍ପକେ ବର୍ତ୍ତିଯାଇଥିବା ଜଣାପଡ଼ିଛି। ତେବେ ଏ ନେଇ ବଡ଼ବିଲ ରେଳ ଷ୍ଟେଶନ ମ୍ୟାନେଜର ବିମଲ ଠାକୁରଙ୍କୁ ପଚାରିବାରୁ ସେ କହିଛନ୍ତି, ତାଙ୍କୁ ଏ ନେଇ କେହି ହେଲେ କହିନାହାନ୍ତି କିମ୍ବା କୌଣସି ସୂଚନା ମିଳିନାହିଁ।
ସୂଚନାଥାଉକି, କୋଲକାତାରୁ ବଡ଼ବିଲ ଆସୁଥିବା ଜନଶତାବ୍ଦୀ ଏକ୍ସପ୍ରେସ ଟ୍ରେନ୍ ୩/୪ଦିନ ହେବ ହାଓ୍ବଡାରୁ କୌଣସି କାରଣରୁ ବିଳମ୍ବରେ ଛାଡୁଥିବାରୁ ବଡ଼ବିଲରେ ମଧ୍ୟ ବିଳମ୍ବରେ ପହଞ୍ଚୁଛି। ରବିବାର ଅପରାହ୍ନ ପ୍ରାୟ ୪ଟା ବେଳେ ବଡ଼ଜାମଦାରୁ ବଡ଼ବିଲ ଅଭିମୁଖେ ଟ୍ରେନ୍ଟି ରେଳ ଷ୍ଟେଶନ ଛାଡିଥିଲା। ମାତ୍ର କିଛିଦୂର ଆସିବା ପରେ ହଠାତ୍ ଚଳନ୍ତା ଟ୍ରେନ ଉପରକୁ କ୍ଷୀପ୍ରଗତିରେ ଏକ ପଥର ମାଡ଼ ହୋଇଥିଲା।
