ଆନନ୍ଦପୁର,୧୨ା୨(ସ୍ବ.ପ୍ର.): କେନ୍ଦୁଝର ଜିଲା ଆନନ୍ଦପୁର ବ୍ଲକ ଅଧୀନ ୧, ୨ ଓ ୩ନଂ ଜିଲା ପରିଷଦ ଜୋନରେ ପ୍ରଚାର ସରଗରମ ହେବାରେ ଲାଗିଛି। ଏହି ଜୋନ ଗୁଡ଼ିକରେ ବିଜେଡି, ଭାଜପା ଓ କଂଗ୍ରେସ ମଧ୍ୟରେ ତ୍ରିମୁଖୀ ଲଢ଼େଇ ହେଉଥିବା ଲକ୍ଷ୍ୟ କରାଯାଉଛି। ୩ ପ୍ରମୁଖ ଦଳର ପ୍ରାର୍ଥୀ ଘରକୁ ଘର ବୁଲି ନିଜ ସପକ୍ଷରେ ଭୋଟ ଭିକ୍ଷା କରୁଛନ୍ତି।
୧ନଂ. ଜୋନ୍ ଅସଂରକ୍ଷିତ ମହିଳାଙ୍କ ପାଇଁ ଉଦ୍ଦିଷ୍ଟ ରହିଛି। ଏଠାରେ ବିଜେଡିରୁ ଟିନି ରଣା, ଭାଜପାରୁ ତପସ୍ବିନୀ ମହାନ୍ତ ଓ କଂଗ୍ରେସରୁ ମୀନାରାଣୀ ବେହେରା ନିର୍ବାଚନ ଲଢ଼ୁଛନ୍ତି। କୋଡ଼ପଡ଼ା, କୋଳିମାଟି, ଗୟଳମୁଣ୍ଡା, ଧକୋଠା, ପଣସଡିହା, ବୁଢ଼ିକୁଦ, ମନୋହରପୁର ଆଦିି ପଞ୍ଚାୟତକୁ ନେଇ ଏହି ଜୋନ ଗଠିତ। ଧକୋଠା ଓ କୋଡ଼ପଡ଼ା ବ୍ୟତୀତ ଅନ୍ୟ ପଞ୍ଚାୟତଗୁଡ଼ିକରେ ଆଦିବାସୀ ଭୋଟରଙ୍କ ସଂଖ୍ୟା ଅଧିକ। ପଣସଡିହା ଓ ମନୋହରପୁର ପଞ୍ଚାୟତରେ ଶାସକ ଦଳର ଅସନ୍ତୁଷ୍ଟ ଗୋଷ୍ଠୀ ଅଧିକ ସକ୍ରିୟ ଥିବା ଜଣାପଡ଼ିଛି। ଅନ୍ୟପକ୍ଷରେ ଗୟଳମୁଣ୍ଡା ପଞ୍ଚାୟତର କେତେଜଣ ଶାସକ ଦଳର ନେତା ବିରୋଧୀଦଳ ସହିତ ଭିତିରି ସମ୍ପର୍କ ରଖିଥିବା ଆଲୋଚନାର ମୁଖ୍ୟ ବିଷୟ ସାଜିଛି। ୨୦୧୭ ନିର୍ବାଚନରେ ଏହି ଜୋନଟି ବିଜେଡି ଅକ୍ତିିଆର କରିଥିଲା। ଏହି ଜୋନରେ ମୁଖ୍ୟତଃ ବିଜେଡି ଓ ଭାଜପା ମଧ୍ୟରେ ଲଢ଼େଇ ହେବାର ସମ୍ଭାବନା ଥିଲେ ମଧ୍ୟ କଂଗ୍ରେସ ପ୍ରାର୍ଥୀଙ୍କ ଭୂମିକା ଗୁରୁତ୍ୱପୁର୍ଣ୍ଣ ରହିଛି। ଶେଷ ମୁହୂର୍ତ୍ତରେ କଂଗ୍ରେସ ପ୍ରାର୍ଥୀ ଓଲଟପାଲଟ ପରିସ୍ଥିତି ସୃଷ୍ଟି କରିପାରନ୍ତି ବୋଲି ଆଲୋଚନା ହେଉଛି। ଅନ୍ୟପକ୍ଷରେ ଯୁବ ଭୋଟରମାନେ ଭାଜପା ପ୍ରତି ଆକର୍ଷିତ ହେଉଥିବାରୁ ବିଜେଡି ପାଇଁ ମହଙ୍ଗା ସାବ୍ୟସ୍ତ ହେବା ସମ୍ଭାବନାକୁ ଏଡାଇ ଦିଆଯାଇ ନ ପାରେ। ସେହିପରି ୨ନଂ ଜୋନ୍ ଅସଂରକ୍ଷିତ ଥିବାବେଳେ ଏଠାରେ ମୁଖ୍ୟତଃ ବିଜେଡି, ଭାଜପା ଓ କଂଗ୍ରେସ ମଧ୍ୟରେ ତ୍ରିମୁଖୀ ପ୍ରତିଦ୍ୱନ୍ଦ୍ୱିତା ହେଉଛି। କଣ୍ଟିପାଳ, କାଠକଟା, ତରତରା, ବାଉଁଶଗଡ, ମୋଚିନ୍ଦା, ଶାଳବଣି ଆଦି ପଞ୍ଚାୟତର ଭୋଟର ଏହି ଜୋନର ପ୍ରାର୍ଥୀମାନଙ୍କୁ ଭୋଟ ଦେବେ। ଏଠାରେ ବିଜେଡି ପ୍ରାର୍ଥୀ ପ୍ରଚାରରେ ଆଗୁଆ ଥିବା ବେଳେ ଦଳୀୟ ବିଦ୍ରୋହ କେତେକାଂଶରେ ପ୍ରଭାବିତ କରିବାର ଆଶଙ୍କା ସୃଷ୍ଟି ହୋଇଛି।
୩ନଂ. ଜୋନ୍ରେ କଡ୍ଡା ଟକ୍କର ହେବାଭଳି ପରିସ୍ଥିତି ସୃଷ୍ଟି ହୋଇଛି। ଜଳସୁଆଁ, ପଞ୍ଚୁୁପଲୀ, ବାଇଲୋ, ବେଲବାହାଳି ଓ ହରିଡ଼ାପାଳ ଆଦି ୫ ପଞ୍ଚାୟତକୁ ନେଇ ଏହି ଜୋନ୍ ଗଠିତ। ଏହି ଆସନଟି ଅସଂରକ୍ଷିତ ମହିଳାଙ୍କ ପାଇଁ ଉଦ୍ଦିଷ୍ଟ ରହିଛି। ଏଠାରେ ମଧ୍ୟ ଭାଜପା, ବିଜେଡି ଓ କଂଗ୍ରେସ ପ୍ରାର୍ଥୀଙ୍କ ମଧ୍ୟରେ ଲଢ଼େଇ ହେଉଛି। ସମସ୍ତ ପ୍ରାର୍ଥୀ ବାଇଲୋ ପଞ୍ଚାୟତର ଅଟନ୍ତି। ଭାଜପାରୁ ଅସୀମା ମିଶ୍ର, ବିଜେଡିରୁ ଉର୍ମିଳା ସାହୁ ଓ କଂଗ୍ରେସରୁ ସୁକାନ୍ତି ସାହୁ ନିର୍ବାଚନ ମଇଦାନକୁ ଓହ୍ଲାଇଛନ୍ତି। ୨୦୧୭ ନିର୍ବାଚନରେ ଏହି ଜୋନ୍ ଓଲଟପାଲଟ ପରିସ୍ଥିତି ସୃଷ୍ଟି କରିଥିଲା। ବେଲବାହାଳିର କୁଶେଇ ସେତୁ ଘଟଣାକୁ ନେଇ ଶାସକ ଦଳ ବିରୋଧରେ ଜନମତ ଯାଇଥିଲା। ଯାହାର ପରିଣାମ ସ୍ବରୂପ ସନାତନ ମହାକୁଡ଼ଙ୍କ ସମର୍ଥନରେ ସ୍ବାଧୀନ ପ୍ରାର୍ଥୀ ପ୍ରଭାକର ସାହୁ ନିର୍ବାଚିତ ହୋଇଥିଲେ। ଚଳିତ ନିର୍ବାଚନରେ ସନାତନ ମହାକୁଡ ବିଜେଡିକୁ ସମର୍ଥନ କରୁଥିବା ବେଳେ ଗୋଳିଆ ପାଣିରୁ ଫାଇଦା ନେବାକୁ ଭାଜପା ପ୍ରୟାସ ଜାରି ରଖିଛି।
