ପୁରୁଷୋତ୍ତମପୁର,୧୧।୭(ସିମାଞ୍ଚଳ ମିଶ୍ର):ଗଞ୍ଜାମ ଜିଲା ପୁରୁଷୋତ୍ତମପୁର ଏନଏସିରେ ନିର୍ବାହୀ ଅଧିକାରୀ ଭାବରେ କାର୍ଯ୍ୟରତ ଓଏଏସ ଅଫିସର ଗୋବିନ୍ଦ ଡନସେନାଙ୍କୁ ଶୁଟ କରିଦେବା ଓ ମାଡ ମାରିବାର ଧମକ ଦେବା ସହ ଅସଭ୍ୟ ଭାଷାରେ ଗାଳିକରିବା ଘଟଣାରେ ଠିକାଦାର ବାପ, ପୁଅ ସମେତ ତିନିଜଣଙ୍କୁ ପୋଲିସ ଶୁକ୍ରବାର ଗିରଫ କରି କୋର୍ଟ ଚାଲାଣ କରାଯାଇଛି। ଏ ନେଇ ଆଇଆଇସି ରାଜେଶକୁମାର ନାୟକ କହିଛନ୍ତି। ଗିରଫ ବ୍ୟକ୍ତିମାନେ ହେଲେ ନାରାୟଣ ପ୍ରସାଦ ମହାପାତ୍ର, ଆଶିଶକୁମାର ମହାପାତ୍ର ଓ ଦୀପକକୁମାର ଗୌଡ।
ସୂଚନାଯୋଗ୍ୟ, ଗତମାସ ୩୦ ତାରିଖରେ ନିର୍ବାହୀ ଅଧିକାରୀ ତାଙ୍କ ପ୍ରକୋଷ୍ଟରେ ବସିଥିବାବେଳେ ଠିକାଦାର ବାପା ନାରାୟଣପ୍ରସାଦ ମହାପାତ୍ର ଓ ପୁଅ ଆଷିଶ କୁମାର ମହାପାତ୍ର କାର୍ଯ୍ୟାଳୟକୁ ଆସି ସେ ଠିକାରେ କରିଥିବା ଗୋପାଳବନ୍ଧ କାର୍ଯ୍ୟର ବିଲ କରିବାଲାଗି କହିଥିଲେ। ମାତ୍ର ବର୍ତ୍ତମାନ ଫଣ୍ଡରେ ଟଙ୍କା ନ ଥିବା ସହ ସହରରେ ହୋଇଥିବା କାର୍ଯ୍ୟକୁ ନେଇ ସହରବାସୀ ଭିଜିଲାନ୍ସରେ ଅଭିଯୋଗ କରିଛନ୍ତି। ଏଣୁ ତଦନ୍ତ ପରେ ଓ ଫଣ୍ଡକୁ ଟଙ୍କା ଆସିବାପରେ ବିଲ କରିଯିବ ବୋଲି କହିଥିଲେ। ଏହାକୁ ନେଇ ସେ ହଠାତ ଉତ୍ତ୍ୟକ୍ତ ହୋଇ ଟେବୁଲ ପିଟି ଗାଳିଗୁଲଜ କରି ଅସଭ୍ୟ ବ୍ୟବହାର ପ୍ରଦର୍ଶନ କରିବା ସହ ଶୁଟ କରିବା ଓ ମାଡ ମାରିବା ଆଦି ନାନା ପ୍ରକାରର ଧମକ ଦେଇଥିଲେ। ଏପରିକି ଦିପକକୁମାର ଗୌଡ ମଧ୍ୟ ଅଫିସରେ ବସିରହି ଅନେକ ସମୟରେ ଅପଶବ୍ଦ ବ୍ୟବହାର କରୁଥିବା ନେଇ ପୋଲିସରେ ଗତ ୭ ତାରିଖରେ ନିର୍ବାହୀ ଅଧିକାରୀ ଲିଖିତ ଅଭିଯୋଗ କରିଥିଲେ। ଏହାକୁ ନେଇ ଥାନାରେ କେସ ନଂ ୫୨୨/୨୫ ପ୍ରକାରେ ପୋଲିସ ଘଟଣାର ତଦନ୍ତ କରି ୩ ଜଣଙ୍କୁ ଗିରଫକରି କୋର୍ଟ ଚାଲାଣ କରିଛନ୍ତି।
