ନୂଆଦିଲ୍ଲୀ, ୧୩।୭: ଇଂଲଣ୍ଡ ଓ ଓ୍ବେଷ୍ଟଇଣ୍ଡିଜ ଟେଷ୍ଟ ସିରିଜ ସହ ଅନ୍ତର୍ଜାତୀୟ କ୍ରିକେଟ୍ ପଡ଼ିଆକୁ ପ୍ରତ୍ୟାବର୍ତ୍ତନ କରିଥିଲେ ମଧ୍ୟ ଭାରତରେ ଖେଳ ପରିସ୍ଥିତି ଏବେ ମଧ୍ୟ ଆରମ୍ଭ ହେବାଭଳି ସ୍ଥିତିରେ ନାହିଁ। ବିଶ୍ୱରେ କରୋନା ଦ୍ୱାରା ସର୍ବାଧିକ ପ୍ରଭାବିତ ହୋଇଥିବା ଦେଶ ତାଲିକାରେ ଭାରତ ୩ୟ ସ୍ଥାନରେ ରହିଛି। କରୋନା ଲାଗି ଅଧିକାଂଶ ଖେଳାଳି ଘରେ ପରିବାର ଗହଣରେ ସମୟ ଅତିବାହିତ କରୁଥିବାବେଳେ କିଛି କ୍ରିକେଟର୍ ମଧ୍ୟ ସୋସିଆଲ ମିଡିଆରେ ବେଶ୍ ସକ୍ରିୟ ରହିଛନ୍ତି। ସୋସିଆଲ ମିଡିଆରେ ଖେଳାଳିମାନେ ପ୍ରଶଂସକଙ୍କ ସହ ବାର୍ତ୍ତାଳପ କରୁଥିବାର ଦେଖିବାକୁ ମିଳିଛି। ଭାରତୀୟ ଦଳର ଦ୍ରୁତ ବୋଲର ଭୁବନେଶ୍ୱର କୁମାର ନିକଟରେ ଟୁଇଟର୍ରେ ‘ସଓ୍ବାଲ-ଜବାବ’ ନାମକ ଏକ ସେସନ ରଖିଥିଲେ। ଯେଉଁଥିରେ ପ୍ରଶଂସକଙ୍କ ଦ୍ୱାରା ପଚରା ଯାଉଥିବା ବିଭିନ୍ନ ପ୍ରଶ୍ନର ଉତ୍ତର ଭୁବନେଶ୍ୱର ଦେଉଥିଲେ। ଏହି ଅବସରରେ ଜଣେ ପ୍ରଶଂସକ ଭୁବନେଶ୍ୱରଙ୍କୁ ତାଙ୍କ ପ୍ରଥମ ରୋଜଗାର କେତେ ଥିଲା ଏବଂ ଏହାକୁ କିପରି ଖର୍ଚ୍ଚ କରିଥିଲେ ବୋଲି ପଚାରିଥିଲେ। ଏହାର ଉତ୍ତର ରଖି ୩୦ ବର୍ଷୀୟ ଭୁବନେଶ୍ୱର କହିଥିଲେ, ତାଙ୍କର ପ୍ରଥମ ରୋଜଗାର ୩ ହଜାର ଟଙ୍କା ଥିଲା। ଏହି ଅର୍ଥରେ କିଛି ଶପିଂ କରିବା ସହ ବଳକା ଟଙ୍କା ସଞ୍ଚତ୍ତ କରି ରଖିଥିଲି।’ ଏଠାରେ ଉଲ୍ଲେଖଯୋଗ୍ୟ, ମିରଟ ଜନ୍ମିତ ଏହି ଡାହାଣହାତୀ ଦ୍ରୁତ ବୋଲର ଭାରତୀୟ ଦଳ ପକ୍ଷରୁ ୨୧ ଟେଷ୍ଟ, ୧୧୪ ଏକଦିବସୀୟ ଓ ୪୩ ଟି୨୦ ମ୍ୟାଚ୍ ଖେଳିଛନ୍ତି। ଯେଉଁଥିରେ ସେ ଯଥାକ୍ରମେ ୬୩, ୧୩୨ ଓ ୪୩ ଉଇକେଟ୍ ଅକ୍ତିଆର କରିଛନ୍ତି।
