ହାଇଦ୍ରାବାଦ୍, ୮।୧୦: ଆନ୍ଧ୍ର ପ୍ରଦେଶ ମୁଖ୍ୟମନ୍ତ୍ରୀ ଜଗନ୍ ମୋହନ ରେଡ୍ଡୀ ଗୁରୁବାର ଦିନ ଆଉ ଏକ ଜନକଲ୍ୟାଣକାରୀ ଯୋଜନାର ଶୁଭାରମ୍ଭ କରିଛନ୍ତି। ଏହି ଯୋଜନାର ନାମ ‘ଜଗନ୍ନା ବିଦ୍ୟା କାନୁକା’ ରଖାଯାଇଛି। ଏହି ସ୍କିମ ଅନୁଯାୟୀ, ପ୍ରଥମରୁ ୧୦ ଶ୍ରେଣୀ ପର୍ଯ୍ୟନ୍ତ ପ୍ରତ୍ୟେକ ଛାତ୍ରୀଛାତ୍ରଙ୍କୁ ଗୋଟିଏ ଲେଖାଏ କିଟ୍ ପ୍ରଦାନ କରାଯିବ। ଯେଉଁଥିରେ ୩ଟି ୟୁନିଫର୍ମ, ଦୁଇହଳ ଜୋତା ଓ ମୋଜା, ଶ୍ରେଣୀ ଅନୁଯାୟୀ ନିର୍ଦ୍ଦିଷ୍ଟ ପାଠ୍ୟ ପୁସ୍ତକ, ନୋଟ୍ ବୁକ୍ ଏବଂ ଗୋଟିଏ ସ୍କୁଲ ବ୍ୟାଗ୍ ଏଥିରେ ରହିବ। ପ୍ରତ୍ୟେକ କିଟ୍ ପିଛା ୧୬୦୦ ଟଙ୍କା ଖର୍ଚ୍ଚ କରାଯିବ ବୋଲି ଜଣାପଡ଼ିଛି। ମୋଟ୍ ଉପରେ ୪୨ ଲକ୍ଷ ୩୪ ହଜାର ୩୨୨ କିଟ୍ ପ୍ରଦାନ କରାଯିବ। ଏଥିଲାଗି ୬୫୦ କୋଟି ଟଙ୍କାର ବଜେଟ୍ ସ୍ଥିର କରାଯାଇଛି। ଏହି ଅବସରରେ ମୁଖ୍ୟମନ୍ତ୍ରୀ କୃଷ୍ଣ ଜିଲାର ପୁନାଦିପାଦୁ ଗ୍ରାମରେ ସରକାରୀ ବିଦ୍ୟାଳୟର ଛାତ୍ରୀଛାତ୍ରଙ୍କୁ ଏହି କିଟ୍ ପ୍ରଦାନ କରିଛନ୍ତି। ଛାତ୍ରୀଛାତ୍ରଙ୍କ ସମସ୍ତ ଆବଶ୍ୟକତା ପ୍ରଦାନ କରି ପିତାମାତାଙ୍କ ଉପରୁ ବୋଝ ହ୍ରାସ କରିବା ଏହି ଯୋଜନାର ଲକ୍ଷ୍ୟ ବୋଲି ସେ କହିଛନ୍ତି।
