ନୂଆଦିଲ୍ଲୀ, ୨୬।୭: ଦକ୍ଷିଣ ଆଫ୍ରିକା କ୍ରିକେଟ୍ ଦଳର ଲେଗ୍ ସ୍ପିନର ଇମ୍ରାନ ତାହିର ଭାରତର ପୂର୍ବତନ ଅଧିନାୟକ ମହେନ୍ଦ୍ର ସିଂ ଧୋନୀଙ୍କ ସହ ପ୍ରଥମ ସାକ୍ଷାତ୍କାରକୁ ମନେ ପକାଇଛନ୍ତି। ତାହିର ୨୦୧୪ରେ ଆଇପିଏଲ୍ ପଦାର୍ପଣ କରିଥିଲେ। କିନ୍ତୁ ଯେତେବେଳେ ସେ ୨୦୧୭ରେ ରାଇଜିଂ ପୁନେ ସୁପର୍ ଜିଆଣ୍ଟ୍ସ ପକ୍ଷରୁ ଖେଳିବାର ସୁଯୋଗ ପାଇଥିଲେ ସେତେବେଳେ ପ୍ରଥମଥର ଲାଗି ଧୋନୀଙ୍କ ସହ ସାକ୍ଷାତ୍ କରିବାର ସୁଯୋଗ ପାଇଥିଲେ। ଏକ ଲାଇଭ୍ ସୋ ପ୍ରୋଗ୍ରାମ ଅବସରରେ ତାହିର କହିଛନ୍ତି, ଧୋନୀଙ୍କୁ ସାକ୍ଷାତ୍ କରିବା ପୂର୍ବରୁ ମୁଁ ବହୁତ ନର୍ଭସ ଥିଲି। ମୁଁ ତାଙ୍କୁ ପୂର୍ବରୁ ଟିଭିରେ ଦେଖିଥିଲେ ମଧ୍ୟ କେବେ ଭେଟିବାର ସୁଯୋଗ ପାଇ ନ ଥିଲି। ମୋତେ ଯେତେବେଳେ ପୁନେ ପକ୍ଷରୁ ଖେଳିବା ଲାଗି ଚୟନ କରାଗଲା ସେତେବେଳେ ତାଙ୍କୁ ପ୍ରଥମଥର ଭେଟିଲି। ହୋଟେଲରେ ମୋ ରୁମ୍ କବାଟ ଖୋଲିବା ପରେ ସେ ମୋ ପାଖକୁ ଆସିଲେ। ମୋତେ କହିଲେ ଇମ୍ରାନ ଭାଇ ତୁମକୁ ସ୍ବାଗତ। ତାଙ୍କ ରୁମ୍ରେ ବସି ଆଲୋଚନା କରିବା ପାଇଁ ମୋତେ ଡାକିଥିଲେ। ସେ ମୋତେ ଏ ଅଫର୍ ଦେଇଥିବାରୁ ଏଥିରେ ମୁଁ ଆଶ୍ଚର୍ଯ୍ୟ ହୋଇଯାଇଥିଲି। ମୋତେ କ୍ରିକେଟ୍ ବିଷୟରେ ବହୁତ କିଛି ତାଙ୍କ ନିକଟରୁ ଜାଣିବାକୁ ଥିବାରୁ ଏହି ଅଫରରେ ରାଜି ହୋଇଯାଇଥିଲି’ ବୋଲି ଇମ୍ରାନ କହିଛନ୍ତି। ୪୧ ବର୍ଷୀୟ ଇମ୍ରାନ ଦକ୍ଷିଣ ଆଫ୍ରିକା ପକ୍ଷରୁ ୨୦ ଟେଷ୍ଟ, ୧୦୭ ଦିନିକିଆ ଓ ୩୮ ଟି୨୦ ମ୍ୟାଚ୍ ଖେଳି ଯଥାକ୍ରମେ ୫୭, ୧୭୩ ଓ ୬୩ ଉଇକେଟ୍ ଅକ୍ତିଆର କରିଛନ୍ତି
