ଓ୍ବାଶିଂଟନ/ନୂଆଦିଲ୍ଲୀ,୨୨ା୫: ଲୋକ ସଭା ନିର୍ବାଚନ ବର୍ତ୍ତମାନ ଶେଷ ପର୍ଯ୍ୟାୟରେ ପହଞ୍ଚିଛି। ଏହି ସମୟରେ ଭାରତ ତଥା ବିଦେଶର ଜଣାଶୁଣା ନିର୍ବାଚନ ଜ୍ୟୋତିଷମାନେ ଆସନକୁ ନେଇ କଳ୍ପନାଜଳ୍ପନା କରିବା ଆରମ୍ଭ କରି ଦେଇଛନ୍ତି। ଗୋଟିଏ ଦିନ ପୂର୍ବରୁ ଦେଶର ଜଣାଶୁଣା ନିର୍ବାଚନ ରାଜନୀତିଜ୍ଞ ପ୍ରଶାନ୍ତ କିଶୋର ଭାଜପା ପାଇଁ ସମ୍ଭାବ୍ୟ ଆସନ ବିଷୟରେ ପୂର୍ବାନୁମାନ କରିଥିଲେ। ବର୍ତ୍ତମାନ ଆମେରିକାର ନିର୍ବାଚନ ସର୍ଭେ ବିଶେଷଜ୍ଞଙ୍କ ଆକଳନ ସାମ୍ନାକୁ ଆସିଛି। ସେ ଗତ ୨୦୧୯ ତୁଳନାରେ ଭାଜପାକୁ ଅଧିକ ଆସନ ମିଳିବ ବୋଲି କହିଛନ୍ତି। ଏଭଳି ପରିସ୍ଥିତିରେ ଦେଖାଯାଉଛି ଯେ, ଏଥର ଏନ୍ଡିଏର ୪୦୦ ଅତିକ୍ରମ କରିବାର ସ୍ଲୋଗାନ ବହୁ ପରିମାଣରେ ସଠିକ୍ ପ୍ରମାଣିତ ହେବ।
ଏହି ରାଜନୈତିକ ବୈଜ୍ଞାନିକ ତଥା ନିର୍ବାଚନ ବିଶେଷଜ୍ଞଙ୍କ ନାମ ହେଉଛି ଇୟାନ ବ୍ରେମର। ଏକ ସାକ୍ଷାତକାରରେ ସେ କହିଛନ୍ତି, ୨୦୨୪ ଲୋକ ସଭା ନିର୍ବାଚନରେ ବିଜେପି ୩୦୫ (+/- ୧୦) ସିଟ୍ ପାଇବ। ଏହାର ଅର୍ଥ ହେଉଛି ଭାଜପା ସର୍ବାଧିକ ୩୧୫ଟି ସିଟ୍ ଏବଂ ସର୍ବନିମ୍ନ ୨୯୫ଟି ସିଟ୍ ପାଇବ।
ଇୟାନ ବ୍ରେମର ୟୁରାସିଆ ଗ୍ରୁପର ପ୍ରତିଷ୍ଠାତା। ଏହା ଏକ ରିସ୍କ ଏବଂ ରିସର୍ଚ୍ଚ କନ୍ସୋଲାଣ୍ଟ୍ସି କମ୍ପାନୀ। ଭାରତର ସାଧାରଣ ନିର୍ବାଚନ ସମ୍ପର୍କରେ ସେ କହିଛନ୍ତି ଯେ, ଯଦି ବିଶ୍ୱ ଦୃଷ୍ଟିକୋଣରୁ ଦେଖାଯାଏ ତେବେ କେବଳ ଭାରତର ସାଧାରଣ ନିର୍ବାଚନ ସମ୍ପୂର୍ଣ୍ଣ ସ୍ଥିର ଥିବା ପରି ମନେହୁଏ । ନଚେତ୍ ଚଳିତ ବର୍ଷ ନଭେମ୍ବରରେ ଆମେରିକାରେ ହେବାକୁ ଥିବା ନିର୍ବାଚନ ସବୁ ସମସ୍ୟାରେ ପରିପୂର୍ଣ୍ଣ ଥିବା ଜଣାପଡିଛି।
ସେ ଆହୁରି ମଧ୍ୟ କହିଛନ୍ତି, ଆମେ ବ୍ୟାପକ ମାଇକ୍ରୋ ସ୍ତରୀୟ ଭୌଗୋଳିକ ଅନିଶ୍ଚିତତାର ସମ୍ମୁଖୀନ ହେଉଛୁ ଏବଂ ଜଗତୀକରଣର ଭବିଷ୍ୟତ କମ୍ପାନୀଗୁଡିକର ଚିନ୍ତାଧାରାକୁ ଦର୍ଶାଉ ନାହିଁ। ଏପରିକି ରାଜନୀତି ନିଜେ ବିଶ୍ୱ ବଜାରରେ ପ୍ରବେଶ କରିଛି। ଯୁଦ୍ଧ, ଆମେରିକା-ଚାଇନା ସମ୍ପର୍କ ଏବଂ ଆମେରିକା ନିର୍ବାଚନ ଏସବୁ ବଡ଼ କଥା।
ସେ କହିଛନ୍ତି, ଏହି ସବୁ ଜିନିଷ ସଠି୍କ ଭାବରେ ପରିଚାଳିତ ହେଉନାହିଁ ଏବଂ ଏହାର ପ୍ରଭାବ ଅଧିକ ନକାରାତ୍ମକ ଅଟେ। ପ୍ରକୃତ କଥା ହେଉଛି ରାଜନୈତିକ ଦୃଷ୍ଟିରୁ ସ୍ଥିର ଥିବା ଏକମାତ୍ର ଜିନିଷ ହେଉଛି ଭାରତର ନିର୍ବାଚନ। ନଚେତ ସବୁକିଛି ଏକ ସମସ୍ୟା ପରି ଦେଖାଯିବ।
ଭାରତୀୟ ନିର୍ବାଚନ ବିଷୟରେ ତାଙ୍କର ଭବିଷ୍ୟବାଣୀ ବିଷୟରେ ପଚରାଯାଇଥିବା ଏକ ପ୍ରଶ୍ନରେ ସେ କହିଛନ୍ତି ଯେ, ୟୁରାସିଆନ ରିସର୍ଚ୍ଚ ଗ୍ରୁପ ଆକଳନ କରିଛି ଯେ, ଭାଜପା ୨୯୫ରୁ ୩୧୫ ସିଟ୍ ମଧ୍ୟରେ ଜିତିପାରିବ।
