କେନ୍ଦୁଝର,୧୯ା୧୦(ନରେଶ ଚନ୍ଦ୍ର ପଟ୍ଟନାୟକ)କେନ୍ଦୁଝର ଜିଲା ମୁଖ୍ୟ ଚିକିତ୍ସାଳୟ ଏବଂ ଉପଖଣ୍ଡ ଡାକ୍ତରଖାନାରେ ଟ୍ରମା କେୟାର ସେଣ୍ଟର ନାହିଁ। ଫଳରେ ଜିଲାରେ ପ୍ରାୟ ପ୍ରତ୍ୟେକ ଦିନ ଦୁର୍ଘଟଣାଜନିତ ଜୀବନହାନି ହେଉଛି। ବହୁ ଲୋକ ଆହତ ହୋଇ ବିକଳାଙ୍ଗ ହେଉଛନ୍ତି। ଦୁର୍ଘଟଣା ପରେ ଆବଶ୍ୟକ ଚିକିତ୍ସା ମିଳୁ ନ ଥିବାରୁ ଅସନ୍ତୋଷ ପ୍ରକାଶ ପାଉଛି।
ଟ୍ରମା କେୟାର ମାଧ୍ୟମରେ ସଡ଼କ ଦୁର୍ଘଟଣା, କାରଖାନା ଦୁର୍ଘଟଣା, ଉପରୁ ଖସି ପଡ଼ିବା, ଗୁଳି ବାଜି ଆହତ ହେବା, ପୋଡ଼ାଜଳା ଭଳି ଗୁରୁତର ରୋଗୀଙ୍କୁ ଆପତ୍କାଳୀନ ପରିସ୍ଥିତିରେ ତୁରନ୍ତ ଚିକିତ୍ସା ଯୋଗାଇ ଦିଆଯାଇଥାଏ। ଜିଲାରେ ବିଶେଷକରି ଖଣି ଖାଦାନ ଅଞ୍ଚଳରେ ବହୁ ସଂଖ୍ୟାରେ ଲୁହାପଥର ପରିବହନ ଟ୍ରକ୍ ଓ ଅନ୍ୟ ଭାରିଯାନ ଚଳାଚଳ କରୁଥିବାରୁ ଦୁର୍ଘଟଣା ଘଟିଥାଏ। ସେହିପରି ଜିଲା ଦେଇ ଯାଇଥିବା ଜାତୀୟ ରାଜପଥଗୁଡ଼ିକରେ ମଧ୍ୟ ବିଭିନ୍ନ ସମୟରେ ଦୁର୍ଘଟଣା ଘଟି ଗାଡ଼ି ଚାଳକ, ଯାତ୍ରୀ ତଥା ଯାତାୟାତ କରୁଥିବା ଲୋକମାନେ ଗୁରୁତର ହୋଇଥାନ୍ତି। ମାତ୍ର ଜିଲାରେ ଟ୍ରମା କେୟାର ନ ଥିବାରୁ ଗୁରୁତର ରୋଗୀଙ୍କୁ ଜିଲା ମୁଖ୍ୟାଳୟ ପରେ ୨୦୦ କି.ମି. ଦୂର କଟକ ବଡ଼ ଡାକ୍ତରଖାନାକୁ ପଠାଇ ଦିଆଯାଉଛି। ଏତେ ବାଟ ଅତିକ୍ରମ କରି ଯିବା ବେଳକୁ ଅନେକେ ମୃତ୍ୟୁବରଣ କରୁଛନ୍ତି। ଡିଏମ୍ଏଫ୍(ଜିଲା ଖଣିଜ ପାଣ୍ଠି), ଓଏମ୍ବିଏଡିସି( ଖଣିଜ ପଦାର୍ଥ ଧାରକ ଅଞ୍ଚଳ ଉନ୍ନୟନ ନିଗମ) ପାଣ୍ଠିରୁ ଅନେକ ହଜାର କୋଟି ଟଙ୍କା ବ୍ୟୟ କରାଯାଇ ପାର୍କ, ପୋଖରୀ ସୌନ୍ଦର୍ଯ୍ୟକରଣ ଆଦି କରାଯାଉଥିବା ବେଳେ ଟ୍ରମା କେୟାର ସେଣ୍ଟର ଭଳି ଗୁରୁତ୍ୱପୂର୍ଣ୍ଣ ସେବା ଯୋଗାଇ ଦିଆଯାଉ ନ ଥିବା ଅତ୍ୟନ୍ତ ଦୁର୍ଭାଗ୍ୟପୂର୍ଣ୍ଣ। କେନ୍ଦୁଝର ଜିଲା ମୁଖ୍ୟ ଚିକିତ୍ସାଳୟ ଉପରେ ପଡ଼ୋଶୀ ମୟୂରଭଞ୍ଜ, ଦେବଗଡ଼ ଜିଲା ଓ ଝାଡ଼ଖଣ୍ଡ ରାଜ୍ୟର ବହୁ ରୋଗୀ ନିର୍ଭର କରିଥାନ୍ତି। ଏଣୁ ଜିଲାରେ ଟ୍ରମା କେୟାର ସେଣ୍ଟର ପ୍ରତିଷ୍ଠା କରି ଦୁର୍ଘଟଣା ଜନିତ ମୃତ୍ୟୁ ରୋକାଯାଉ ବୋଲି କେନ୍ଦୁଝର ଓକିଲ ସଂଘର ପୂର୍ବତନ ସଭାପତି ଅଶୋକ ଦାସ କହିଛନ୍ତି। ସିଡିଏମ୍ଓ ଡା. କେ.ସି.ପୃଷ୍ଟି କହିଛନ୍ତି, କେନ୍ଦୁଝର ଜିଲାରେ ଟ୍ରମା କେୟାର ସେଣ୍ଟର ଖୋଲିବା ପାଇଁ ସରକାରଙ୍କ ପ୍ରସ୍ତାବ ରହିଛି। ଜିଲା ମୁଖ୍ୟାଳୟ ବ୍ୟତୀତ ଆନନ୍ଦପୁର, ଚମ୍ପୁଆ ଉପଖଣ୍ଡ ଡାକ୍ତରଖାନା ଏବଂ ବଡବିଲ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଖୋଲିବ।
