ସୁନାବେଡା ୧୯ା୧୦(କୃତ୍ତିବାସ ପ୍ରଧାନ): ସୁନାବେଡ଼ା ହାଲ୍ ଟାଉନଶିପ୍ରେ ଥିବା ପୋଷ୍ଟ ଅଫିସରେ ପାର୍ସଲ ଥିବା ସାମଗ୍ରୀ ହଜିଯାଉଥିବା ଅଭିଯୋଗ ହୋଇଛି। ଫଳରେ ଯାହାଙ୍କ ନାମରେ ପାର୍ସଲ ଆସୁଛି, କିନ୍ତୁ ତାଙ୍କୁ ଖାଲି ଖୋଳ ମିଳୁଛି। ମିଳିଥିବା ଖବରରୁ ଜଣାପଡିଛି, ହାଲ୍ ଟାଉନଶିପ୍ ଷ୍ଟେଟ୍ ବ୍ୟାଙ୍କ ନିକଟରେ ଥିବା ଶ୍ରୀନିବାସ ସ୍ପୋର୍ଟସର ମାଲିକ କଳାକର ପ୍ରଧାନ ଚଳିତ ମାସ ୮ରେ ନିଜ ଦୋକାନ ପାଇଁ ଦିଲ୍ଲୀରୁ କିଛି ସାମଗ୍ରୀ ମଗାଇଥିଲେ। ଗତ ୧୦ରେ ପ୍ରଧାନ ପଞ୍ଚକୁଲା ପୋଷ୍ଟ ଅଫିସରୁ ଦୁଇଟି ପେଟିରେ ଆସିଥିବା ୩.୨ ଓ ୧୨.୬ କେଜି ଓଜନର ପାର୍ସଲ ସାମଗ୍ରୀ ଯଥାକ୍ରମେ ୧୬ ଓ ୧୭ ତାରିଖରେ ଗ୍ରହଣ କରିଥିଲେ। ତେବେ ସେ ୧୭ ତାରିଖରେ ଗ୍ରହଣ କରିଥିବା ସାମଗ୍ରୀ ଭର୍ତ୍ତି ପେଟିଟି ତାଙ୍କୁ ହାଲୁକା ଲାଗିବାରୁ ସେ ଡେଲିଭରି ଦେବାକୁ ଆସିଥିବା ଡାକ କର୍ମଚାରୀଙ୍କ ସମ୍ମୁଖରେ ଖୋଲିଥିଲେ। ସେଥିରେ ତାଙ୍କ ଅର୍ଡର ମୁତାବକ ସାମଗ୍ରୀ ପରିବର୍ତ୍ତେ ଅନାବଶ୍ୟକ ଜିନିଷ ଥିବା ଦେଖିବାକୁ ପାଇଥିଲେ। ସଙ୍ଗେ ସଙ୍ଗେ ପ୍ରଧାନ ପାର୍ସଲ ପଠାଇଥିବା ବ୍ୟକ୍ତିଙ୍କୁ ଯୋଗାଯୋଗ କରିବା ସହ ପୋଷ୍ଟ ମାଷ୍ଟର ଓ ସୁନାବେଡ଼ା ଥାନାରେ ଏ ସମ୍ପର୍କରେ ଅଭିଯୋଗ କରିଥିଲେ। ଥାନା ଅଧିକାରୀ ରମଣୀ ରଞ୍ଜନ ଦଳେଇ ମାମଲାକୁ ଗୁରୁତର ସହ ନେଇ ଏହାର ତଦନ୍ତ ଆରମ୍ଭ କରିଛନ୍ତି। ଏ ସମ୍ପର୍କରେ ସମ୍ପୃକ୍ତ ପୋଷ୍ଟ ମାଷ୍ଟର ବିଜୟଲକ୍ଷ୍ମୀ ପାଣିଗ୍ରାହୀଙ୍କୁ ପଚାରିବାରୁ ସେ କହିଛନ୍ତି, ପାର୍ସଲ ପେଟି ଭିତରେ କ’ଣ ଥିଲା ଆମେ ଜାଣିନୁ। କିନ୍ତୁ ପାର୍ସଲ ପ୍ୟାକେଟ ଭଲ କଣ୍ଡିସନରେ ଗ୍ରାହକଙ୍କୁ ପ୍ରଦାନ କରାଯାଇଛି। ପ୍ରଧାନ ଦେଇଥିବା ଅଭିଯୋଗପତ୍ରକୁ ଜୟପୁର ଡିଭିଜନ ଅଫିସ ସୁପରିଣ୍ଟେଣ୍ଡେଣ୍ଟଙ୍କ ନିକଟକୁ ପଠାଯାଇଛି। ବିଭାଗୀୟ ତଦନ୍ତ ପରେ ସତ୍ୟାସତ୍ୟ ଜଣାପଡିବ ବୋଲି ବିଜୟଲକ୍ଷ୍ମୀ କହିଛନ୍ତି। ସୂଚନାଯୋଗ୍ୟ, ପୋଷ୍ଟାଲ୍ ଭଳି କେନ୍ଦ୍ର ସରକାରଙ୍କ ଏକ ଗୁରୁତ୍ୱପୂର୍ଣ୍ଣ ବିଭାଗ ଏପରି ଦାୟିତ୍ୱହୀନ ହେଲେ ସାଧାରଣ ଲୋକେ କାହା ଉପରେ ଭରସା ରଖିବେ ବୋଲି ସାଧାରଣରେ ଆଲୋଚନା ହେଉଛି। ତେବେ ପ୍ରଧାନଙ୍କ ପେଟିରୁ ଗାଏବ ହୋଇଥିବା ସାମଗ୍ରୀର ମୂଲ୍ୟ ୭୦ ହଜାରରୁ ଊଦ୍ଧର୍ବ ଟଙ୍କା ହେବ ବୋଲି ଜଣାପଡ଼ିଛି।
