ଦିଗପହଣ୍ଡି,୧।୧୧(ଅଶେଷ ନାଥ ମିଶ୍ର): ଦିଗପହଣ୍ଡି ବ୍ଲକ ଖମାରୀଗାଁ ପଞ୍ଚାୟତ ଅନ୍ତର୍ଗତ ମହୁଲପଡା ଗ୍ରାମକୁ ବିଜୁଳି କିମ୍ବା ରାସ୍ତାଟିଏ ନାହିଁ। ଲୋକେ ବିପଦ ସଙ୍କୁଳ ଅବସ୍ଥାରେ ଦିଗପହଣ୍ଡି କିମ୍ବା ପଞ୍ଚାୟତ ସଦର ମହକୁମାକୁ କାଠ ଡଙ୍ଗାରେ ଯାତାୟାତ କରୁଥିବା ଜଣାପଡିଛି। ପାହାଡିଆ ରାସ୍ତାରେ ପ୍ରାୟ ୫ କିଲୋମିଟର ଅତିକ୍ରମ ପରେ ଡଙ୍ଗାରେ ଗାଁକୁ ଯିବା ଆସିବା କରିଥାନ୍ତି। ଆଦିବାସୀ ବହୁଳ ଗ୍ରାମରେ ୩୦ରୁ ଊର୍ଦ୍ଧ୍ୱ ପରିବାର ବାସ କରୁଥିବା ବେଳେ ବିଜୁଳି ଓ ରାସ୍ତା ନଥିବାରୁ ପିଲାମାନେ ଶିକ୍ଷାରୁ ବଞ୍ଚିତ ହେଉଛନ୍ତି। ଜଙ୍ଗଲ ରାସ୍ତାରେ ହିଂସ୍ର ଜନ୍ତୁର ଭୟ ଏବଂ ପାଣିରେ କୁମ୍ଭୀରର ଭୟ ଭିତରେ ଅନେକ ଅସୁବିଧାର ସମ୍ମୁଖୀନ ହେଉଛନ୍ତି ଗ୍ରାମବାସୀ। ଭାଜପାର ପୂର୍ବତନ ରାଜ୍ୟ ସମ୍ପାଦକ ଶ୍ରୀକାନ୍ତ ପାଢ଼ୀ ସୋମବାର ଗ୍ରାମରେ ପହଞ୍ଚି ଗ୍ରାମବାସୀଙ୍କ ଅଭାବ ଅସୁବିଧା ସମ୍ପର୍କରେ ଆଲୋଚନା କରିଥିଲେ। ରାଜ୍ୟ ସରକାରଙ୍କ ପକ୍ଷରୁ ଏହି ଗ୍ରାମକୁ ବିଜୁଳି ଏବଂ ପକ୍କା ରାସ୍ତା ନିର୍ମାଣ ପାଇଁ ସେ ପ୍ରଶାସନିକ ଅଧିକାରୀ ମାନଙ୍କ ଦୃଷ୍ଟି ଆକର୍ଷଣ କରିଥିବା କହିଛନ୍ତି। ସୀମାଞ୍ଚଳ ସାସମଲ, ଗୋପୀନାଥ ବେହେରା, ଆକାଶ ରେଡ୍ଡୀ, କିସାନ ପାତ୍ର, ପ୍ରଭଞ୍ଜନ ପାଇକ, ଅଜୟ ପାଇକ, ପଞ୍ଚା ପାଇକ, ପ୍ରତିମା ପାଇକ ଏବଂ ବହୁ ଗ୍ରାମବାସୀ ଆଲୋଚନାରେ ଅଂଶଗ୍ରହଣ କରିଥିଲେ।
