ବାସୁଦେବପୁର, ୧।୧୧(ନାରାୟଣ ପ୍ରସାଦ ବାରିକ୍): ଭଦ୍ରକ ଜିଲା ବାସୁଦେବପୁର ବ୍ଲକର ବିଦେଇପୁର ଗ୍ରାମକୁ ପ୍ରାୟ ୧ ସପ୍ତାହ ଧରି ପାନୀୟ ଜଳ ଠିକ୍ ଭାବେ ମିଳୁ ନ ଥିବା ନେଇ ଜନଅସନ୍ତୋଷ ଦେଖାଦେଇଛି। ସୋମବାର ଶତାଧିକ ମହିଳାଙ୍କ ସମେତ ଗ୍ରାମବାସୀ ସମସ୍ୟା ଦୂର କରିବା ଓ ତୁରନ୍ତ ପାନୀୟ ଜଳ ପ୍ରଦାନ ଦାବିରେ ବିଦେଇପୁର-କରଞ୍ଜଆଡ଼ିଆ ବଜାରକୁ ସଂଯୋଗ କରୁଥିବା ରାସ୍ତାକୁ ଅବରୋଧ କରି ବସି ରହିଥିଲେ। ଫଳରେ ଦୀର୍ଘ ସମୟ ଧରି ଯାତାୟାତ ବାଧାପ୍ରାପ୍ତ ହୋଇଥିଲା। ପାନୀୟ ଜଳ ପାଇପ୍ ମାଧ୍ୟମରେ ଠିକ୍ ଭାବେ ମିଳିପାରୁ ନ ଥିବାରୁ ପ୍ରତିଦିନ ଶତାଧିକ ଲୋକ ନାହିଁ ନ ଥିବା ହଇରାଣ ହେଉଛନ୍ତି। ବିଦେଇପୁର ପଞ୍ଚାୟତ ଏକ ଲୁଣା ପ୍ରବଳ ଅଞ୍ଚଳ ହୋଇଥିବାରୁ ପାନୀୟ ଜଳ ଏଠାରେ ଏକ ପ୍ରମୁଖ ସମସ୍ୟା। ରାସ୍ତାରୋକୋ ସମ୍ପର୍କରେ ଖବରପାଇ କଷିଆ ସାମୁଦ୍ରିକ ଥାନାଧିକାରୀ ଓ ଆର୍ଡବ୍ଲ୍ୟୁଏସ୍ଏସ୍ ବିଭାଗର ଅଧିକାରୀ ପହଞ୍ଚତ୍ ଲୋକଙ୍କୁ ବୁଝାଶୁଝା କରିବା ସହ ପାନୀୟ ଜଳ ସମସ୍ୟା ଦୂର ପାଇଁ ପ୍ରତିଶ୍ରୁତି ଦେଇଥିଲେ। ଏହାପରେ ରାସ୍ତାରୋକୋ ହଟିଥିଲା। ଏତଦ୍ଭିନ୍ନ ହିତାଧିକାରୀଙ୍କଠାରୁ ବର୍ଦ୍ଧିତ ଭାବେ ଜଳକର ନିଆଯାଉଥିବା ଗ୍ରାମବାସୀ ଅଭିଯୋଗ କରିବା ପରେ ଏ ଦିଗରେ ତଦନ୍ତ ହେବ ବୋଲି ବିଭାଗୀୟ ଅଧିକାରୀ ଲୋକଙ୍କୁ ପ୍ରତିଶ୍ରୁତି ଦେଇଥିଲେ।
