ଚିକିଟି,୧।୧୧(ପ୍ରକାଶ ଚନ୍ଦ୍ର ସାହୁ): ଚିକିଟି ବ୍ଲକରେ ଚଳିତ ବର୍ଷ ସ୍ବଳ୍ପ ବୃଷ୍ଟି ଯୋଗୁ ମରୁଡି ପରିସ୍ଥିତି ସୃଷ୍ଟି ହୋଇଛି। ବିଳମ୍ବରେ ହେଲେ ମଧ୍ୟ ଦୁଇ ମାସ ତଳେ ହୋଇଥିବା ବର୍ଷାରେ ପ୍ରାୟ ଅଧିକାଂଶ ଜମିରେ ଧାନ ଚାଷ ହୋଇଥିଲା। କିନ୍ତୁ ବର୍ତ୍ତମାନ ବର୍ଷା ନ ହେବାରୁ ଜମି ଫାଟି ଆଁ କରିଥିବା ବେଳେ ଧାନଗଛ ଶୁଖି ମରିଯିବାକୁ ବସିଲାଣି। ଚାଷୀ ମଜୁରି ଦେଇ ଓ ସାର କିଣି ହତାଶ ହୋଇଥିବା ବେଳେ ଏବେ ପୁଣି ଧାର କରି କିରୋସିନ, ଡିଜେଲ ଓ ପାଣିପମ୍ପ ଟଙ୍କା ଦେଇ ଥକି ଗଲେଣି। ବର୍ତ୍ତମାନ ଧାନ ଗଛରୁ କେଣ୍ଡା ବାହାରୁଥିବା ବେଳେ ଜମିକୁ ପାଣି ମିଳୁନି। ମରୁଡି ପରିସ୍ଥିତିର ମୁକାବିଲା ପାଇଁ ଜିଲା କିମ୍ବା ବ୍ଲକ ପ୍ରଶାସନ ପକ୍ଷରୁ ଏଥିପ୍ରତି କୌଣସି ପଦକ୍ଷେପ ନିଆଯାଉ ନ ଥିବା ସୁନୁପୁର, ଗିରିସୋଲା, ଝାଟିପଦର, ଚାନ୍ଦପୁର, ନୂଆପଡା, ଡଭାର ଆଦି ଗ୍ରାମର ଚାଷୀମାନେ ଅଭିଯୋଗ କରିଛନ୍ତି। ଉକ୍ତ ବ୍ଲକର ମୋଟ ୯୭୬୦ ହେକ୍ଟର ଜମିରେ ଧାନ ଚାଷ ରହିଥିବା ବେଳେ ୮୧୩୭ ହେକ୍ଟର ଜମିରେ ଜଳସେଚନର ସୁବିଧା ରହିଛି। ଆଉ ବଳକା ୧୬୨୩ ହେକ୍ଟର ଜମିରେ ସମ୍ପୂର୍ଣ୍ଣ ରୂପେ ବର୍ଷା ଉପରେ ନିର୍ଭରଶୀଳ। ଦୀର୍ଘ ଦୁଇ ମାସ ଧରି ବର୍ଷା ନ ହେବାରୁ ଜମି ଶୁଖି ଯାଇଛି। ବାଘଲଟି କେନାଲ ଦ୍ୱାରା ଚାନ୍ଦପୁର ପଞ୍ଚାୟତର ଚାନ୍ଦପୁର, ଦେଉଳିଆପଡା, ବାତରଡା, ବାଦୁଆ, ବଳରାମପୁର, ସୁନ୍ଦରଡା, ବେଲପନ୍ତି, ବୈଦ୍ୟନାଳଶାସନ ଆଦି ଅଞ୍ଚଳ ଜଳସେଚନର ବ୍ୟବସ୍ଥା ରହିଛି। ଅପରପକ୍ଷରେ ଲାଲମେଣ୍ଟା, କୁଟିଲିଙ୍ଗ, ରାମଚନ୍ଦ୍ରପୁର, ପିତାତଳି, କଳବାଡ ଆଦି ଅଞ୍ଚଳ ବାହୁଦା କେନାଲ ଉପରେ ନିର୍ଭର କରୁଥିଲେ ହେଁ ଠିକ ଭାବେ ପାଣି ଛଡ଼ା ଯାଉ ନ ଥିବା ଚାଷୀ ଅଭିଯୋଗ କରିଛନ୍ତି। ଚଳିତବର୍ଷ ବିଳମ୍ବରେ ବର୍ଷା ହେବାରୁ ଡେରି ହେଉ ପଛେ ରୁଆ ବେଉଷଣ କରିଥିଲେ। ବର୍ତ୍ତମାନ ଦୁଇ ମାସ ହେଲା ବର୍ଷାର ନାଁ ଗନ୍ଧ ନାହିଁ। ଅମଳ ହେଲେ ପୁରୁଣା କରଜ ଶୁଝି ମୁକ୍ତି ପାଇବେ ବୋଲି ଆଶା କରିଥିଲେ । ବର୍ତ୍ତମାନ ଚାଷୀ ଏଭଳି ପରିସ୍ଥିତିକୁ କିପରି ସାମ୍ନା କରିବେ ଚିନ୍ତାରେ ପଡିଯାଇଛନ୍ତି। ତୁରନ୍ତ ପ୍ରଶାସନ
ଏଥିପ୍ରତି ଦୃଷ୍ଟି ଦେଇ ଚିକିଟି ବ୍ଲକକୁ ସମ୍ପୂଣ୍ଣ ମରୁଡି ଘୋଷଣା କରାଯାଉ ବୋଲି ଚାଷୀଙ୍କ ପକ୍ଷରୁ ଦାବି ହେଉଛି ।
