ଅନୁଗୋଳ ଅଫିସ, ୧୫ା୭
ଅନୁଗୋଳ ସହର ଉପକଣ୍ଠରେ ଥିବା ଏକ ସରକାରୀ ପଥର କ୍ୱାରିରୁ ବଢ଼ୁଛି ଚୋରି। ଉକ୍ତ କ୍ୱାରିର ନିଲାମ ଅବଧି ଶେଷ ହୋଇଯାଇଥିଲେ ମଧ୍ୟ ସେଠାରୁ ଲଘୁ ଖଣିଜ ଦ୍ରବ୍ୟର ଚୋରା ଉତ୍ପାଦନ ଜାରି ରହିଥିବା ଅଭିଯୋଗ ହେଉଛି। ଦୈନିକ ମଧ୍ୟରାତ୍ରିରେ ୩୦ରୁ ୪୦ ଟ୍ରିପ୍ ଚୋରା ଖଣିଜ ବିଭିନ୍ନ ସ୍ଥାନକୁ ପଠାଯାଉଛି। ମାସ ମାସ ଧରି ଏପରି କାରବାର ଯୋଗୁ ସରକାରଙ୍କ କୋଟି କୋଟି ଟଙ୍କାର ରାଜସ୍ବହାନି ହେଉଥିବା ବେଳେ ତହସିଲ କି ଜିଲା ପ୍ରଶାସନ ଜାଣି ନ ପାରିବା ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି।
ଅଭିଯୋଗ ଅନୁଯାୟୀ, ଉକ୍ତ ସରକାରୀ ପଥର କ୍ୱାରିକୁ ଶେଷଥର ପାଇଁ ୨୦୧୬ ମସିହାରେ ନିଲାମ ଦିଆଯାଇଥିଲା। ଏହାର ଅବଧି ୨୦୨୧ରେ ସରିବା କଥା। ପ୍ରତିବର୍ଷ ମାର୍ଚ୍ଚ ମାସରେ ଏହାକୁ ନବୀକରଣ କରିବାର ନିୟମ ରହିଛି। କିନ୍ତୁ କୌଣସି କାରଣବଶତଃ ଗୋଟିଏ ବର୍ଷ କମ୍ କରାଯାଇ ମାର୍ଚ୍ଚ ୨୦୨୦ ପର୍ଯ୍ୟନ୍ତ (ଚାରି ବର୍ଷିଆ) ନିଲାମ ଦିଆଯାଇଥିଲା। ତେଣୁ ଗତ ମାର୍ଚ୍ଚ ୩୧ରୁ ଉକ୍ତ ସରକାରୀ କ୍ୱାରିର ନିଲାମ ଅବଧି ଶେଷ ହୋଇସାରିଛି। ନିୟମ ଅନୁସାରେ ଅବଧି ଶେଷ ହୋଇଥିବା ପଥର କ୍ୱାରିରେ କୌଣସି ପ୍ରକାର ବ୍ଲାଷ୍ଟିଂ କରାଯାଇ ପାରିବ ନାହିଁ କି ବାହାରୁଥିବା କଂକ୍ରିଟ୍, ବୋଲଡର ଆଦି ବାହାରେ ବିକ୍ରି ହୋଇପାରିବ ନାହିଁ। କିନ୍ତୁ ନିୟମ ଉଲ୍ଲଂଘନ କରାଯାଇ କ୍ୱାରିରୁ ଚୋରା ଉତ୍ପାଦନ ଜାରି ରଖାଯିବା ସହ ଚଢ଼ା ଦରରେ ଲଘୁ ଖଣିଜ ଦ୍ରବ୍ୟକୁ ବିକ୍ରି କରାଯାଉଛି। ବିଳମ୍ବିତ ରାତିରେ ନିୟମିତ ବ୍ଲାଷ୍ଟିଂ କରାଯାଇ ମଧ୍ୟରାତ୍ରରୁ ଭୋର୍ ମଧ୍ୟରେ ଟ୍ରକ୍, ଟ୍ରାକ୍ଟର ଯୋଗେ ଜିଲାର ବିଭିନ୍ନ ସ୍ଥାନକୁ ପରିବହନ କରାଯାଉଛି। କିନ୍ତୁ ତହସିଲ ପ୍ରଶାସନ ଏଯାଏ ମୌନବ୍ରତ ଧାରଣ କରିଛି। ସ୍ଥାନୀୟ ରାଜସ୍ବ ଅଧିକାରୀ ମଧ୍ୟ ଉପରିସ୍ଥ ଅଧିକାରୀଙ୍କୁ ରିପୋର୍ଟ କରୁନାହାନ୍ତି। ଫଳରେ ଦିନକୁ ଦିନ ଚୋରା କାରବାର ବଢ଼ିବାରେ ଲାଗିଛି। ସରକାରଙ୍କ କୋଟି କୋଟି ଟଙ୍କାର ରାଜସ୍ବହାନି ପଛରେ କାହାର ହାତ ରହିଛି ତାହା ଖୋଜି ବାହାର କରିବାକୁ ଦାବି ହେଉଛି। ଅଭିଯୋଗ ସମ୍ପର୍କରେ ଅନୁଗୋଳ ଉପଜିଲାପାଳ ବାସୁଦେବ ଶତପଥୀ କହିଛନ୍ତି ଯେ, ଅବଧି ଶେଷ ପରେ କାହିଁକି ଏଭଳି କାର୍ଯ୍ୟ ହେଉଛି ତାହାର ଅନୁଧ୍ୟାନ କରାଯିବ। ପ୍ରମାଣ ମିଳିଲେ କି କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ସେ ନେଇ ନିଷ୍ପତ୍ତି ନିଆଯିବ।
