ପାଟଣା,୯।୫(ସ୍ବ. ପ୍ର.): ସୋସିଆଲ ମିଡିଆ ସାଇବର ଠକଙ୍କ ପାଦୁର୍ଭାବ ଦିନ ଦିନ ବୃଦ୍ଧି ପାଇବାରେ ଲାଗିଛି। ସାଇବର ଠକ ମାନେ ଲୋନ ଆପ୍ରେ ଲୋକଙ୍କୁ ଟଙ୍କା ଦେଇ ପରବର୍ତ୍ତୀ ମୁହୂର୍ତ୍ତରେ ଦୁଇଗୁଣା ଟଙ୍କା ଫେରାଇବାକୁ ଫୋନ କରୁଛନ୍ତି। ଟଙ୍କା ନଦେଲେ ଫଟୋକୁ ଏଡିଟିଙ୍ଗ କରି ଅଶ୍ଳୀଳ କରି ବିଭିନ୍ନ ସୋସିଆଲ ମିଡିଆରେ ଛାଡିବାକୁ ଧମକ ଦେଉଛନ୍ତି। ଏଭଳି ଠକାମୀ ର ଶିକାର ହୋଇଛନ୍ତି କେନ୍ଦୁଝର ଜିଲା ତୁରୁମୁଙ୍ଗା ଥାନା ତୁରୁମୁଙ୍ଗା ଗ୍ରାମର ଯୁବକ ବିକାଶ କୁମାର ସାହୁ। ଏନେଇ ସେ ମାନସିକ ଚାପ ରେ ଥିବା ବେଳେ ସାଇବର ଠକଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ତୁରୁମୁଙ୍ଗା ଥାନାରେ ଏତେଲା ଦେଇଛନ୍ତି।
ଏଥିସହ ସେ କ୍ରାଇମବ୍ରାଞ୍ଚ ଏବଂ ଆରବିଆଇଙ୍କୁ ମଧ୍ୟ ଅନ୍ଲାଇନ ଜରିଆରେ ଅଭିଯୋଗ କରିଛନ୍ତି। ପ୍ରଥମେ ଫେସବୁକ୍ରେ କୋକାଲୋନ ନାମକ ଏକ ଆପ୍ରେ ସେ ଲୋନ ଆବେଦନ କରିଥିଲେ ସେଥିରେ ତାଙ୍କର ପାନକାର୍ଡ ସହ ଆଧାରକୁ ମଧ୍ୟ ଅପଲୋଡ଼ କରିଥିଲେ ଅପଲୋଡ଼ ପରେ ତାଙ୍କୁ ୭ ହଜାର ଟଙ୍କା ଲୋନ ମିଳିବା ପାଇଁ ମଞ୍ଜୁର ହେବା ରୁ ସେ ଉକ୍ତ ଆପ୍ଲିକେସନକୁ ଅନ୍ ଇନଷ୍ଟଲ କରିଦେଇଥିଲେ। ପରେ ତାଙ୍କ ଆକାଉଣ୍ଟକୁ ୪ ହଜାର ୬୦ ଟଙ୍କା ଆପେ ଆପେ ଆସିଥିଲା। ପରେ ସାଇବର ଠକ ତାଙ୍କୁ ଲୋନ ନେଇଛ ଟଙ୍କାକୁ ଦୁଇ ଗୁଣା ଶୁଝିବାକୁ ଫୋନ କରିଥିଲେ। କିନ୍ତୁ ଏକ ଲିଙ୍କ ଜରିଆ ରେ ପୂର୍ବରୁ ଆସିଥିବା ଟଙ୍କାକୁ ସେ ପଠାଇ ଥିଲେ। ହେଲେ ଦୁଇଗୁଣା ଟଙ୍କା ଦେବାକୁ ସାଇବର ଠକ ଦାବି କରିଥିଲେ। ବିକାଶ ଦୁଇଗୁଣା ଟଙ୍କା ନଦେବାରୁ ତାଙ୍କ ଫେସବୁକ ଆକାଉଣ୍ଟକୁ ହ୍ୟାକ କରି ତାଙ୍କ ଫଟୋକୁ ଅଶ୍ଳୀଳ କରି ତାଙ୍କ ନିକଟକୁ ପଠାଇବାସହ ସମ୍ପର୍କୀୟଙ୍କ ନିକଟକୁ ମଧ୍ୟ ପଠାଇଥିଲେ।
