ବରଗଡ଼ ଅଫିସ୍,୨୮ା୫: ଗାଁ ହେଉ କି ସହର, ଖରାଦିନେ ସବୁଠି ଜଳାଭାବ ପ୍ରମୁଖ ସମସ୍ୟା ପାଲଟିଥାଏ। ତେବେ ବହୁପୂର୍ବରୁ ଗାଁ ଏବଂ ସହରରେ ରହିଥିବା ଜଳାଶୟ ଗୁଡ଼ିକ ଯୋଗୁ ସେଭଳି ସମସ୍ୟାରୁ ମୁକ୍ତି ମିଳୁଥିଲା। ମାତ୍ର ଏବେ ବରଗଡ଼ ଜିଲାର ସବୁଆଡ଼େ ଜଳାଶୟ ପରିତ୍ୟକ୍ତ ଅବସ୍ଥାରେ ପଡ଼ିଛି। କେଉଁଠି ଜବରଦଖଲ ଯୋଗୁ ଜଳାଶୟ ସଙ୍କୁଚିତ ହୋଇଛି ତ ଆଉ କେଉଁଠି ଜଳାଶୟଗୁଡ଼ିକ ନିଶ୍ଚିହ୍ନ ହୋଇ ସେଠାରେ କୋଠାବାଡ଼ି ଗଢ଼ି ଉଠିଛି। ଯେଉଁ ଜଳାଶୟ ଗୁଡ଼ିକ ରହିଛି, ତାହା ମଧ୍ୟ ପରିତ୍ୟକ୍ତ ଅବସ୍ଥାରେ ପଡ଼ିଛି। ବର୍ତ୍ତମାନ ତାହା ଉପରେ ଜମି ମାଫିଆଙ୍କ ଲୋଲୁପ ଦୃଷ୍ଟି ପଡ଼ିଛି। ଅନ୍ୟପଟେ ପାରମ୍ପରିକ ଜଳଉତ୍ସ ଗୁଡ଼ିକର ରକ୍ଷଣାବେକ୍ଷଣ ପ୍ରତି ଦୃଷ୍ଟି ନ ଦେଲେ ସେଗୁଡ଼ିକ ଲୋପ ପାଇଯିବ ଏବଂ ଆଗାମୀ ଦିନରେ ଜଳ ସମସ୍ୟା ଉତ୍କଟ ରୂପ ଧାରଣ କରିବା ସମ୍ଭାବନା ସୃଷ୍ଟି ହୋଇଛି।
