ପାତ୍ରପୁର,୧୦।୭(ଡି.ଏନ.ଏ): ପାତ୍ରପୁର ବ୍ଲକ ବୁରାତାଲ ପଞ୍ଚାୟତରେ ବର୍ଷା ପାଣି ଯୋଗୁଁ ଜାମୁଗଣ୍ଡ ନାଳ ଭର୍ତ୍ତି ହୋଇଯିବାରୁ ଦଉଡ଼ି ବାନ୍ଧି ଛାତ୍ରୀଛାତ୍ର ଘରକୁ ଆସିଛନ୍ତି। ବୁରାତାଲ ପଞ୍ଚାୟତ କମଳାଖତ ନୂଆଁସାହି ତଥା ସେହି ଅଞ୍ଚଳରେ ଥିବା ପ୍ରାୟ ଦଶ ଖଣ୍ଡ ଗ୍ରାମକୁ ଯିବା ପାଇଁ ହେଲେ ଜାମୁଗଣ୍ଡ ନାଳ ପାର କରିବାକୁ ପଡିଥାଏ। ଶୁକ୍ରବାର ଉପର ମୁଣ୍ଡରେ ପ୍ରବଳ ବର୍ଷା ହେବା ଫଳରେ ନାଳରେ ପାଣି ଆସି ଯାଇଥିଲା। ଫଳରେ ଉପର ମୁଣ୍ଡରେ ଥିବା ଗ୍ରାମର ପିଲାମାନେ ବିଦ୍ୟାଳୟକୁ ଯାଇ ଗ୍ରାମକୁ ଫେରିବା ବେଳେ ନାଳର ବର୍ଷା ପାଣିକୁ ଦେଖି ଭୟଭିତ ହୋଇପଡ଼ିଥିଲେ। କମଳାଖତ ନୂଆଁସାହିର ଗୋବିନ୍ଦ ମଣ୍ଡଳ, ଅନନ୍ତ ଭୁୟାଁ, ପିତାମ୍ବର ମଣ୍ଡଳ, ବାଙ୍କିଆ ଭୁୟାଁ ଓ ନନ୍ଦ ରଇତ ନାଳ ଅତିକ୍ରମ ହୋଇ ପାଠ ପଢିବା ପାଇଁ ପୁରିଆସାହି ଯାଇଥିଲେ। ଫେରିବା ସମୟରେ ନାଳରେ ପାଣି ଆସିଯାଇଥିଲା। ନାଳ ସେ ପଟେ ରହି ପିଲା ଡାକ ଦେବାରୁ ଗ୍ରାମବାସୀ ଆସି ଦଉଡି ବାନ୍ଧି ପିଲାମାନଙ୍କୁ ନାଳ ପାର କରିଥିଲେ। ପ୍ରତ୍ୟେକ ଦିନ ପିଲା ମାନେ ନାଳ ପାର ହୋଇ ପାଠ ପଢିବାକୁ ଯାଉଥିବା ବେଳେ ବର୍ଷା ଦିନ ଆସିଲେ ସେମାନେ ନାନା ପ୍ରକାରର ସମସ୍ୟାକୁ ସାମ୍ନା କରୁଥିବା
ଗ୍ରାମବାସୀ ପ୍ରକାଶ କରିଛନ୍ତି ।
