ଅନୁଗୋଳ ଅଫିସ, ୭।୩: ଅନୁଗୋଳ ଜିଲାର ୯୪ ମଣ୍ଡିରେ ଧାନ ବିକ୍ରି କରିବାକୁ ମୋଟ ୩୪ ହଜାର ୯୨୬ ଜଣ ଚାଷୀ ପଞ୍ଜୀକରଣ କରିଥିଲେ। ପ୍ରଥମ ପର୍ଯ୍ୟାୟରେ ଜିଲାରୁ ୬ଲକ୍ଷ ୪ ହଜାର ୪୧୧ କୁଇଣ୍ଟାଲ ଧାନ କିଣାଯିବାକୁ ସରକାରଙ୍କ ପକ୍ଷରୁ ଧାର୍ଯ୍ୟ କରାଯାଇଥିଲା। ତେବେ ଆରମ୍ଭରୁ ଅବ୍ୟବସ୍ଥା ଯୋଗୁ ଏହି ବ୍ୟବସ୍ଥା ବାଟବଣା ହୋଇଚାଲିଛି। କିଛି ମଣ୍ଡିରେ ତାଲା ପକାଯାଇଥିବାବେଳେ ଆଉ କେତେକ ସ୍ଥାନରେ ମାସ୍ ନ ଥିବାରୁ ମିଲରମାନେ ଧାନ ଉଠାଇପାରି ନାହାନ୍ତି। ଫଳରେ ସରକାର ଥରକୁ ଥର ଦେଉଥିବା ଟାର୍ଗେଟ୍ ତୁଳନାରେ ବହୁ କମ୍ ଧାନ କିଣାଯାଉଛି। ଇତିମଧ୍ୟରେ ଜିଲାକୁ ୭ ମ ପର୍ଯ୍ୟାୟାରେ ୧୪ ହଜାର କୁଇଣ୍ଟାଲ ଧାନ କିଣାଯିବାକୁ ଟାର୍ଗେଟ୍ ମିଳିଛି। କିନ୍ତୁ ଚାଷୀମାନଙ୍କ ନିକଟରେ ୪ ଲକ୍ଷ କୁଇଣ୍ଟାଲରୁ ଅଧିକ ଧାନ ପଡ଼ିରହିଥିବା ବେଳେ ଆସିଥିବା ସରକାରଙ୍କ ଟାର୍ଗେଟ୍ ସମୁଦ୍ରକୁ ଶଙ୍ଖେ ବୋଲି କୁହାଯାଉଛି।
ସୂଚନା ମୁତାବକ, ଧାନ ବିକ୍ରି କରିବାକୁ ପଞ୍ଜୀକରଣ କରିଥିବା ଜିଲାର ମୋଟ ୩୪ ହଜାର ଚାଷୀଙ୍କ ମଧ୍ୟରୁ ଗତ ଫେବୃୟାରୀ ୨୪ ତାରିଖ ସୁଦ୍ଧା ୧୩ ହଜାର ୨୧୦ ଜଣ ତାଲିକାରେ ଅପେକ୍ଷା କରିଛନ୍ତି। ସେମାନଙ୍କ ନିକଟରେ ୪ ଲକ୍ଷ ୪୪ ହଜାର ୫୩୯ କୁଇଣ୍ଟାଲ ଧାନ ମହଜୁଦ୍ ରହିଛି। କିନ୍ତୁ ସରକାର ମାତ୍ର ୧୪ ହଜାର କୁଇଣ୍ଟାଲ ଧାନ କିଣିବାକୁ ଟାର୍ଗେଟ୍ ଦେଇଥିବାରୁ ପ୍ରଶାସନ ଓ ଯୋଗାଣ ବିଭାଗ ଅଡ଼ୁଆରେ ପଡ଼ିଛି। ଏହି ନୂଆ ଲକ୍ଷ୍ୟଧାର୍ଯ୍ୟ ସମ୍ପର୍କରେ ଗତ ବୁଧବାର ନିର୍ଦ୍ଦେଶ ପହଞ୍ଚିଥିବା ଚାଷୀମାନେ ଜାଣିବା ପରେ ସେମାନଙ୍କ ମଧ୍ୟରେ ନିରାଶା ଖେଳିଯାଇଛି। କିପରି ଏତେ ଧାନ କିଣାଯାଇପାରିବ ସେ ନେଇ ସେମାନେ ଯୋଗାଣ ଅଧିକାରୀଙ୍କ ଠାରୁ ଆରମ୍ଭ କରି ବିଭିନ୍ନ ସମୟରେ ଜିଲା ପ୍ରଶାସନ ନିକଟରେ ଅଭିଯୋଗ କରୁଥିବା ଦେଖିବାକୁ ମିଳିଛି। ତେବେ ବିଭାଗ ପକ୍ଷରୁ କୁହାଯାଇଛି, ଜିଲାରେ ବର୍ତ୍ତମାନ ସୁଦ୍ଧା ୨୪ ହଜାର ୧୮୨ ଜଣ ଚାଷୀଙ୍କ ଠାରୁ ୮ଲକ୍ଷ ୯୧ ହଜାର ୭୪୦ କୁଇଣ୍ଟାଲ ଧାନ କିଣାଯାଇସାରିଛି। ତଥାପି ସମସ୍ତ ମଣ୍ଡିରେ ଆହୁରି ବହୁ କୁଇଣ୍ଟାଲ ଧାନ ପଡ଼ି ରହିଛି। ସହକାରୀ ଯୋଗାଣ ଅଧିକାରୀ ଶ୍ରୀନିବାସ ମିଶ୍ର କହିଛନ୍ତି, ସରକାରଙ୍କ ପକ୍ଷରୁ ୧୪ ହଜାର କୁଇଣ୍ଟାଲ ଧାନ କିଣିବାକୁ ଟାର୍ଗେଟ ଆସିଛି, ଯାହା ଖୁବ୍ କମ୍। ତେଣୁ ସମସ୍ତ ୯୪ ମଣ୍ଡିରେ ଧାନ କିଣିବାକୁ ଦିଆଯିବ ନାହିଁ। ଯେଉଁ ମଣ୍ଡିରେ ଅଧିକ ଧାନ ରହିଛି, ସେଠାରେ ଧାନ ଉଠାଇବା ପାଇଁ ବ୍ୟବସ୍ଥା କରାଯାଉଛି।
ମିଲରମାନେ ଶୋଷଣ କରୁଛନ୍ତି
ଯେଉଁ ପରିମାଣରେ ଜିଲାରେ ଧାନ ଚାଷ ହେଉଛି, ସେହି ଅନୁଯାୟୀ ମଣ୍ଡିରୁ ଧାନ ଉଠୁନାହିଁ। ମଣ୍ଡିରେ ନାନା ଅବ୍ୟବସ୍ଥା ଥିବାବେଳେ ମିଲରମାନେ ଶୋଷଣ କରୁଛନ୍ତି। ବାରମ୍ବାର ଅଭିଯୋଗ ପରେ ମଧ୍ୟ ସ୍ଥିତି ସୁଧୁରୁନାହିଁ। ତେଣୁ ଚାଷୀ ଅଭାବୀ ବିକ୍ରୀର ସମ୍ମୁଖୀନ ହେଉଛି।
-ଦୁର୍ଯ୍ୟୋଧନ ପ୍ରଧାନ, ଚାଷୀ, କଣିହଁା
ବ୍ୟବସ୍ଥା ନ କଲେ ଆନ୍ଦୋଳନ
ଚାଷୀମାନେ ହଜାର ହଜାର କୁଇଣ୍ଟାଲ ଧାନ ଧରି ମଣ୍ଡିରେ ବସିଛନ୍ତି। କିନ୍ତୁ ସରକାରଙ୍କ ନିକଟରୁ ଆସୁଥିବା ଟାର୍ଗେଟ ସେହି ତୁଳନାରେ ବହୁ କମ୍। ତେଣୁ ଚାଷୀମାନେ ହତାଶ ହୋଇପଡ଼ୁଛନ୍ତି। ଏ ନେଇ ସରକାର ବ୍ୟବସ୍ଥା ନ କଲେ ଆଗାମୀ ଦିନରେ ଆନ୍ଦୋଳନକୁ ଓହ୍ଲାଇବୁ।
-ଧ୍ରୁବ ଚରଣ ସାହୁ, ବିଲେଇନାଳୀ
ଦଲାଲ୍ଙ୍କୁ ପୋଷୁଛନ୍ତି ସରକାର
ଦଲାଲମାନଙ୍କୁ ପ୍ରୋତ୍ସାହନ ଦିଆଯାଉଥିବା ବେଳେ ଚାଷୀଙ୍କ ସହ ସରକାର ଖେଳୁଛନ୍ତି। ଧାନ କିଣା ସମୟରେ ୩ରୁ ୪ କିଲୋ ବିଭିନ୍ନ ଆଳରେ ହେରଫେର କରାଯାଉଛି। ଫଳରେ ଧାର୍ଯ୍ୟ ମୂଲ୍ୟ ଠାରୁ ଢେର କମ୍ ଅର୍ଥ ମିଳୁଛି। ତେଣୁ ସରକାର ଚାଷୀମାନଙ୍କ ପ୍ରତି ସଦୟ ହୁଅନ୍ତୁ।
-ବାନାମ୍ବର ସାହୁ, ଚାଷୀ, ହଣ୍ଡପା
