ଭଞ୍ଜନଗର,୨୦ା୩(ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗର କେନ୍ଦ୍ରୀୟ ବିଦ୍ୟାଳୟ ଅଭିଭାବକ ସମ୍ମିଳନୀ ଗୁରୁବାର ଅନୁଷ୍ଠିତ ହୋଇଯାଇଛି। ଏଥିସହ ଗୁରୁବାର ପ୍ରଥମରୁ ପଞ୍ଚମ ଶ୍ରେଣୀ ପର୍ଯ୍ୟନ୍ତ ବାର୍ଷିକ ପରୀକ୍ଷା ଫଳ ପ୍ରକାଶିତ ହୋଇଛି। ଆୟୋଜିତ ସଚେତନତା କାର୍ଯ୍ୟକ୍ରମରେ ବିଦ୍ୟାଳୟ ଅଧ୍ୟକ୍ଷ ପ୍ରଦୀପ କମାନୁ ସଭାପତିତ୍ୱ କରି କହିଥିଲେ ଯେ, ଅସ୍ଥାୟୀ କୋଠାରେ ବିଦ୍ୟାଳୟ ଆଜକୁ ୧୫ ବର୍ଷ ହେବ ଚାଲିଛି। ତେଣୁ କିଛିଟା ସମସ୍ୟା ରହୁଛି। ସ୍ଥାନୀୟ ଶିଳ୍ପ ତାଲିମ କେନ୍ଦ୍ର ସମ୍ମୁଖରେ ବିଦ୍ୟାଳୟର ସ୍ଥାୟୀ କୋଠା ପାଇଁ ଜମି ମିଳିଛି। ଚଳିତ ବର୍ଷ ତାହାର କାମ ଆରମ୍ଭ ଲକ୍ଷ୍ୟ ରଖାଯାଇଛି। ବିଦ୍ୟାଳୟ କାମ ଆରମ୍ଭ ହେଲେ ଦୁଇରୁ ତିନି ବର୍ଷ ମଧ୍ୟରେ କାମ ସରିଯିବ। ଏହାପରେ ଯୁକ୍ତ ୨ ସେଠାରେ ଆରମ୍ଭ କରାଯିବ । ଛାତ୍ରୀଛାତ୍ର ପରୀକ୍ଷା ଫଳ ଯାହା କରିଛନ୍ତି ଭଲ କରିଛନ୍ତି। ମାର୍କ ସବୁ କିଛି ନାହିଁ। ସେମାନଙ୍କର ଜ୍ଞାନ ମଧ୍ୟ ବୃଦ୍ଧି କରିବାକୁ ପଡ଼ିବ। ଛାତ୍ରୀଛାତ୍ରଙ୍କ ଭବିଷ୍ୟତ ଉଜ୍ଜ୍ୱଳ ପଛରେ ଅଭିଭାବକ ଏବଂ ଶିକ୍ଷକଙ୍କ ଭୂମିକା ଗୁରୁତ୍ୱପୂର୍ଣ୍ଣ। ତେଣୁ ସମସ୍ତଙ୍କ ମଧ୍ୟରେ ସମନ୍ବୟ ରଖି ଛାତ୍ରୀଛାତ୍ରଙ୍କ ଭବିଷ୍ୟତ ଉଜ୍ଜ୍ବଳ କରାଯିବ। ଏଥିପାଇଁ ସମସ୍ତଙ୍କ ସହଯୋଗ କାମନା କରିଥିଲେ ଅଧ୍ୟକ୍ଷ। ଶିକ୍ଷୟିତ୍ରୀ
ଶ୍ରଦ୍ଧାଞ୍ଜଳି ଖୁଣ୍ଟିଆ କହିଥିଲେ ଚଳିତ ବର୍ଷ ଚତୁର୍ଥ ଏବଂ ପଞ୍ଚମ ଶ୍ରେଣୀ ପୁସ୍ତକ ବଦଳିଛି। ଖୁବ୍ଶୀଘ୍ର ବଜାରକୁ ବହି ଆସିଯିବ। ଏହାପରେ ଅଭିଭାବକମାନେ ପୁସ୍ତକ କିଣିବେ। ଛାତ୍ରୀଛାତ୍ର ଦୈନନ୍ଦିନ ଜୀବନରେ କିଛିଟା ନୀତି ନିୟମ ପାଳନ କରିବାକୁ ପଡ଼ିବ। ସୁଷମ ଖାଦ୍ୟ ବ୍ୟବହାର କରିବାକୁ ପଡ଼ିବ। ଖାଦ୍ୟରେ ତେଲର ପରିମାଣ କମାଇବାକୁ ପଡ଼ିବ। ଶିଶୁ ଭଲ କାମ କରିବା ସମୟରେ ଅଭିଭାବକମାନେ ତାଙ୍କୁ ଉତ୍ସାହିତ କରିବାକୁ ପଡ଼ିବ। ତାହାହେଲେ ଯାଇ ସେମାନଙ୍କ ଆଗ୍ରହ ଆହୁରି ବଢ଼ିବ। ମୋବାଇଲଠାରୁ ଶିଶୁକୁ ଦୂରେଇ ରଖିବାକୁ ପଡ଼ିବ। ଅଭିଭାବକମାନେ ମଧ୍ୟ ଶିଶୁ ସମ୍ମୁଖରେ ମୋବାଇଲ କମ୍ ବ୍ୟବହାର କରିବାକୁ ପଡ଼ିବ। ନଚେତ ତାହାର ପ୍ରଭାବ ଶିଶୁ ଉପରେ ପଡ଼ିବ ବୋଲି ଶିକ୍ଷୟିତ୍ରୀ ଖୁଣ୍ଟିଆ କହିଥିଲେ। ଅନ୍ୟମାନଙ୍କ ମଧ୍ୟରେ ଶିକ୍ଷକ ଅମରେନ୍ଦ୍ର ପ୍ରଧାନ, ଅଜୟ ରାଜ ଜିଜ୍ଞାସୁ, ଶିକ୍ଷୟିତ୍ରୀ ମାନସୀ ସ୍ବାଇଁ ପ୍ରମୁଖ ଆଲୋଚନାରେ ଭାଗ ନେଇ ବିଦ୍ୟାଳୟର ଉନ୍ନତି ପାଇଁ ଅଭିଭାବକଙ୍କ ସହଯୋଗ କାମନା କରିଥିଲେ। ବିଦ୍ୟାଳୟରେ ଅନୁପସ୍ଥିତ ରହୁଥିବା ଛାତ୍ରୀଛାତ୍ରଙ୍କ ସମ୍ପର୍କରେ ଅଭିଭାବକମାନେ ବିଦ୍ୟାଳୟକୁ ସୂଚିତ କରନ୍ତୁ। ଛାତ୍ରୀଛାତ୍ରଙ୍କ ଗୁଣାତ୍ମକ ଶିକ୍ଷାର ବିକାଶ ପାଇଁ ମଧ୍ୟ ପଦକ୍ଷେପ ନିଆଯାଇଛି ବୋଲି ବକ୍ତାମାନେ ପ୍ରକାଶ କରିଥିଲେ।
