ଭୁବନେଶ୍ୱର, ୨୫।୯ (ବନ୍ଦନା ସେଠୀ):କଟକ ରୋଡ୍ର ବମିଖାଲ ଓଭରବ୍ରିଜ୍ ରାସ୍ତା ଏବେ ମରଣଯନ୍ତା ପାଲଟିଛି। ଲକ୍ଷ୍ମୀସାଗରଠାରୁ ରସୁଲଗଡ଼ ଆଡକୁ ଯିବାବେଳେ ଓଭରବ୍ରିଜ୍ ତଳ ରାସ୍ତାରେ ଓ୍ବାଟ୍କୋ ପକ୍ଷରୁ ବହୁଦିନ ଧରି କାମ ଚାଲିଛି। ପୂର୍ବରୁ ସମ୍ପୃକ୍ତ ରାସ୍ତାକୁ ସମ୍ପୂର୍ଣ୍ଣ ଭାବେ ବନ୍ଦ ରଖାଯିବା ସହ ଓ୍ବାଟ୍କୋ ପକ୍ଷରୁ ଏକ ସୂଚନା ବୋର୍ଡ ରଖାଯାଇଥିଲା। ଲୋକେ ବମିଖାଲ ଓଭରବ୍ରିଜ୍ ଦେଇ ଯିବାଆସିବା କରୁଥିଲେ। କାମ କିଛିବାଟ ଆଗେଇବା ପରେ ରାସ୍ତାକୁ ଅଧା ଖୋଲାଯାଇଥିଲା। କେବଳ ପଥଚାରୀ ଓ ଦୁଇଚକିଆ ଯାନ ହିଁ ଯାତାୟାତ କରୁଥିଲା। ଗତ ୩/୪ଦିନ ହେବ ରାସ୍ତା ବନ୍ଦ ରଖିବା ପାଇଁ ଥିବା ବୋର୍ଡଟିକୁ ଓଭରବ୍ରିଜ୍ ଆଡକୁ ଘୁଞ୍ଚାଇ ଦିଆଯାଇଛି। ଏବେ ସେହି ରାସ୍ତା ଦେଇ ଦୁଇ ଓ ଚାରି ଚକିଆ ଯାନ ମଧ୍ୟ ଯାତାୟାତ କରୁଛି। ଏଥିସହ ଓଭରବ୍ରିଜ୍ କଡରେ ଚାରି ଚକିଆ ଯାନ ମଧ୍ୟ ପାର୍କିଂ ହୋଇ ରହିଛି। ତେବେ ସମ୍ପୃକ୍ତ ରାସ୍ତାରେ ଖାଲଖମା ସହ କେତେକ ସ୍ଥାନରେ ମାଟି ଗଦା ହୋଇରହିଛି। ପୁଣି ଖୋଲା ଡ୍ରେନ୍ ବିପଦ ଡାକୁଛି। ଗାଡିମୋଟର ଯିବା ସମୟରେ ଡ୍ରୋଜର ଲଗାଇ ମାଟି ସମାନ କରାଯାଉଥିବା ଦେଖାଯାଇଛି। ଅପରପକ୍ଷେ ଦୀର୍ଘଦିନ ଧରି କାମ ପାଇଁ ରାସ୍ତା ବନ୍ଦ କରାଯାଇଥିଲେ ବି ଆଖି ଦୃଶିଆ କାମ ହୋଇପାରି ନ ଥିବାରୁ ସାଧାରଣରେ ଅସନ୍ତୋଷ ବୃଦ୍ଧି ପାଇଛି। ସେହିଭଳି ବଡ଼ଗଡ଼, ରସୁଲଗଡ ସମେତ ବିଭିନ୍ନ ଅଞ୍ଚଳରେ ବିକାଶ ନାମରେ ରାସ୍ତାକୁ ବିକୃତ କରାଯାଉଥିବା ଦେଖିବାକୁ ମିଳୁଛି।
