ଗଞ୍ଜାମ, ୨୯/୯(ବିଦ୍ୟାଧର ସାହୁ): ଗଞ୍ଜାମ ବ୍ଲକ ଅନ୍ତର୍ଗତ ପାଳିବନ୍ଦ ପଞ୍ଚାୟତର କଣ୍ଟିଆଗଡ଼ ନିକଟରେ ଅବସ୍ଥିତ ପ୍ରସିଦ୍ଧ ଶୈବପୀଠ ବଟେଶ୍ୱରକୁ ହୁମାଠାରୁ ସଂଯୋଗ କରୁଥିବା ରାସ୍ତା ଏବେ ଅତ୍ୟନ୍ତ ଶୋଚନୀୟ ହୋଇପଡ଼ିଛି। ଫଳରେ ପର୍ଯ୍ୟଟକଙ୍କ ସମେତ ସ୍ଥାନୀୟ ଲୋକେ ଯାତାୟାତରେ ବହୁ ସମସ୍ୟାର ସମ୍ମୁଖୀନ ହେଉଛନ୍ତି। ଗତ ଶ୍ରାବଣ ମାସରେ ବଟେଶ୍ୱର ପୀଠକୁ ହଜାର ହଜାର କାଉଡ଼ିଆ ଆସିଥିବା ବେଳେ ରାସ୍ତାର ଦୁରବସ୍ଥା ଯୋଗୁ ସେମାନେ ମଧ୍ୟ ଯାତାୟାତରେ ଅସୁବିଧା ଭୋଗିଥିବା ଅଭିଯୋଗ ହୋଇଛି।
ଏହି ସମସ୍ୟା ନେଇ ସ୍ଥାନୀୟ ତିନିଟି ଗ୍ରାମର ଲୋକେ ଗତ ଅଗଷ୍ଟ ୨୪ ତାରିଖରେ ଜିଲାସ୍ତରୀୟ ଜନଶୁଣାଣିରେ ଜିଲାପାଳଙ୍କୁ ଭେଟି ଅବଗତ କରାଇଥିଲେ। ଜିଲାପାଳ ବିଭାଗୀୟ ଅଧିକାରୀଙ୍କୁ ଡାକି ତୁରନ୍ତ ରାସ୍ତା କାମ ଶେଷ କରିବାକୁ ନିର୍ଦ୍ଦେଶ ଦେଇଥିବା ଜଣାପଡ଼ିଛି। ଏପରିକି ସେପ୍ଟେମ୍ବର ମାସରେ ରାସ୍ତା କାମ ଆରମ୍ଭ ହେବ ବୋଲି ବିଭାଗୀୟ ଅଧିକାରୀମାନେ କହିଥିଲେ। ତେବେ ଏକ ମାସ ବିତିଯାଇଥିଲେ ମଧ୍ୟ ରାସ୍ତା କାମରେ ଆଶାନୁରୂପ ଅଗ୍ରଗତି ହୋଇ ନ ଥିବା ଅଭିଯୋଗ ହୋଇଛି।
ଅନ୍ୟପକ୍ଷରେ ହୁମା ନିକଟରେ ୧୬ ନମ୍ବର ଜାତୀୟ ରାଜପଥରୁ ବଟେଶ୍ୱର ପୀଠକୁ ଯାଇଥିବା ପ୍ରବେଶ ରାସ୍ତାରେ ଓଭରବ୍ରିଜ ନିର୍ମାଣ ହୋଇଥିବାରୁ ପୁରୁଣା ରାସ୍ତା ବନ୍ଦ ହୋଇଯାଇଛି। ମନ୍ଦିରକୁ ଯାତାୟାତ ପାଇଁ ଆବଶ୍ୟକ ସର୍ଭିସ ରୋଡ ମଧ୍ୟ ଏପର୍ଯ୍ୟନ୍ତ ନିର୍ମାଣ ହୋଇ ନ ଥିବା ଅଭିଯୋଗ ହୋଇଛି। ବିକଳ୍ପ ଭାବେ ବ୍ୟବହୃତ ହେଉଥିବା ରାସ୍ତାଟି ମଧ୍ୟ ଶୋଚନୀୟ ଅବସ୍ଥାରେ ରହିଛି।
ଏହି ରାସ୍ତା ଉପରେ କଣ୍ଟିଆଗଡ଼, ଖଟୁଆକୁଦା, ପୋଡେମୋପେଟା ଓ ନୀଳାଦ୍ରିପୁର ଭଳି ଚାରିଟି ଗ୍ରାମର ଲୋକେ ନିର୍ଭରଶୀଳ। ରାସ୍ତାର ଅବସ୍ଥା ଖରାପ ଥିବାରୁ ଦୈନନ୍ଦିନ ଯାତାୟାତରେ ଗ୍ରାମବାସୀଙ୍କୁ ନାନା ସମସ୍ୟା ଭୋଗିବାକୁ ପଡ଼ୁଛି।
ବଟେଶ୍ୱର ପୀଠକୁ ସଂଯୋଗ କରୁଥିବା ରାସ୍ତା ମଧ୍ୟ ଅଧାପନ୍ତରିଆ ଅବସ୍ଥାରେ ପଡ଼ିରହିଛି। ଠିକାଦାର ଦୀର୍ଘଦିନ ଧରି କାମ କରୁଥିଲେ ମଧ୍ୟ ତାହା ଠିକ ଭାବେ ହେଉନଥିବା ନେଇ ସ୍ଥାନୀୟ ଲୋକେ ଅଭିଯୋଗ କରିଛନ୍ତି। ଆସନ୍ତା କାର୍ତ୍ତିକ ମାସରେ ବଟେଶ୍ୱର ପୀଠରେ ଭକ୍ତଙ୍କ ଭିଡ଼ ବଢ଼ିବାକୁ ଥିବାରୁ ଏହା ପୂର୍ବରୁ ରାସ୍ତା ନିର୍ମାଣ ଓ ମରାମତି କାମ ଶେଷ କରିବାକୁ ଦାବି ହୋଇଛି।
ତୁରନ୍ତ ରାସ୍ତା କାମ ଶେଷ ନହେଲେ ଆଗାମୀ ଦିନରେ ଜନସାଧାରଣ ଆନ୍ଦୋଳନାତ୍ମକ ପନ୍ଥା ଗ୍ରହଣ କରିବେ ବୋଲି ପୂର୍ବତନ ସରପଞ୍ଚ ଦିଲୀପ ଛୋଟରାୟ, ପୂର୍ବତନ ସମିତି ସଭ୍ୟ ଛାୟାକାନ୍ତ ପ୍ରଧାନ, ଯୁବ ନେତା ରଞ୍ଜିତ ପଲାଇ, ପବିତ୍ର ସ୍ବାଇଁ, ଶିବରାମ ପଲାଇ, ବୃନ୍ଦାବନ ପ୍ରଧାନ, ଧର୍ମରାଜ ସ୍ବାଇଁ, ଅଜୟ ପ୍ରଧାନ ପ୍ରମୁଖ ଚେତାବନୀ ଦେଇଛନ୍ତି।
Dharitri – Odisha’s No.1 Odia Daily
