ପୁରୀ ଅଫିସ,୬।୧୦: ମୁମ୍ବାଇ କ୍ରୁଜ୍ ଡ୍ରଗ୍ସ ମାମଲାରେ ଓଡ଼ିଶାର ଲିଙ୍କ୍ ପ୍ରସଙ୍ଗ ସାମ୍ନାକୁ ଆସିବା ସହ ରାଉରକେଲାର ଦୁଇଜଣ ଗିରଫ ହେବା ପରେ ସମୁଦ୍ର ତଟବର୍ତ୍ତୀ ପୁରୀ ସହର ଉପରେ ସଭିଁଙ୍କ ନଜର ପଡ଼ିଛି। ପୁରୀକୁ ଦେଶ ବିଦେଶର ଲୋକେ ଆସୁଥିବାବେଳେ କେବଳ ଯାଞ୍ଚ ପ୍ରକ୍ରିୟା ସମୟରେ ବା ସୁରକ୍ଷା ବ୍ୟବସ୍ଥା ଦୃଷ୍ଟିକୋଣରୁ ବେଳାଭୂମିରେ ପୋଲିସ ମୁତୟନ କରାଯାଇଥାଏ। ଅନ୍ୟ ସମୟରେ ବେଳାଭୂମି ପ୍ରାୟତଃ ମୁକୁଳା ପଡ଼ିଥାଏ। ତେଣୁ ଏହାର ସୁଯୋଗ ନେଇ ନିଶା ବେପାରୀ ସମୁଦ୍ର ପଥ ଦେଇ ପୁରୀରେ ପ୍ରବେଶ କରିବାର ଆଶଙ୍କା ରହିଛି। ପୁରୀ ସହରରେ ବ୍ରାଉନସୁଗାର ଓ ଗଞ୍ଜେଇ କାରବାର ବଢି ଚାଲିଥିବାବେଳେ ବେଳାଭୂମିକୁ ଲାଗିରହିଥିବା ପେଣ୍ଠକଟା ଅଞ୍ଚଳରେ ମଧ୍ୟ ନିଶା କାରବାର ନେଇ ପୂର୍ବରୁ ଅଭିଯୋଗ ରହିଛି। ପଶ୍ଚିମବଙ୍ଗରୁ ସଡ଼କ ପଥ ଦେଇ ବାଲେଶ୍ୱର ଜିଲାର ଜଳେଶ୍ୱର ଏବଂ ସେଠାରୁ ପୁରୀକୁ ବ୍ରାଉନସୁଗାର ଚାଲାଣ ହେଉଥିବା ଜଣାପଡ଼ିଛି। ତେବେ ସମୁଦ୍ରପଥରେ ବ୍ରାଉନସୁଗାର କିମ୍ବା ଡ୍ରଗ୍ସ ଆସୁଥାଇପାରେ ବୋଲି ଏବେ ଆଶଙ୍କା ସୃଷ୍ଟି ହେଲାଣି, ଯାହାକି ପୁରୀବାସୀଙ୍କୁ ଚିନ୍ତାରେ ପକାଇଛି।
ପୁରୀର କେତେକ ସ୍ଥାନରେ ଗଞ୍ଜେଇ, ମଦ ଓ ବ୍ରାଉନସୁଗାର କାରବାର ହେଉଛି। ତେଣୁ ଏଠାକୁ ଡ୍ରଗ୍ସ ବି ଆସୁଥାଇପାରେ ବୋଲି କେତେଜଣ ବ୍ୟକ୍ତି ଆଶଙ୍କା ପ୍ରକାଶ କରିଛନ୍ତି। ସତ୍ୟବ୍ରତ ପରିଡ଼ା କହିଛନ୍ତି, ପୁରୀରେ ବ୍ରାଉନସୁଗାର ଓ ଅନ୍ୟ ନିଶା କାରବାର ବନ୍ଦ କରିବା ପାଇଁ ପୋଲିସ ସ୍ବତନ୍ତ୍ର ଯୋଜନା ପ୍ରସ୍ତୁତ କରିବା ଦରକାର। ତୃଣମୂଳ ସ୍ତରକୁ ଯାଇ ପୋଲିସ ତଦନ୍ତ କଲେ ଏହାର ଉତ୍ସ ସମ୍ପର୍କରେ ଜଣାପଡ଼ିବ। ଏସବୁ ଦୃଷ୍ଟିରୁ ସମୁଦ୍ର ପଥ ଉପରେ ପୋଲିସ ସତର୍କ ଦୃଷ୍ଟି ରଖିବା ଆବଶ୍ୟକ ବୋଲି ବୁଦ୍ଧିଜୀବୀ ମତ ଦେଇଛନ୍ତି। ଏ ନେଇ ପୁରୀ ସିଟି ଡିଏସ୍ପି ଜନାର୍ଦ୍ଦନ ପାଢ଼ୀ କହିଛନ୍ତି, ଜଳପଥ ବା ସମୁଦ୍ରପଥ ଉପରେ ପୋଲିସ କଡ଼ା ନଜର ରଖିଛି। କୌଣସି ନିଶା ବେପାରୀ ଯେଭଳି ଜଳପଥକୁ ମାଧ୍ୟମ ଭାବେ ବ୍ୟବହାର ନ କରିବେ ସେନେଇ ଆମେ ସତର୍କ ଦୃଷ୍ଟି ରଖିଛୁ। ଏଯାବତ୍ ଏଭଳି କୌଣସି ମାମଲା ସାମ୍ନାକୁ ଆସିନାହିଁ ବୋଲି କହିଛନ୍ତି।
