କେନ୍ଦୁଝର, ୨୯।୩ ଦକ୍ଷିଣ ପୂର୍ବ ଓ ପୂର୍ବତଟ ରେଳପଥର ଜେନେରାଲ ମ୍ୟାନେଜର(ଜି.ଏମ୍) ଅର୍ଚ୍ଚନା ଯୋଶୀ ଓ ଖୋର୍ଦ୍ଧା ରୋଡସ୍ଥିତ ଡିଭିଜନାଲ ମ୍ୟାନେଜର ରିଙ୍କେଶ ରାୟ ଏକ ମିଳିତ ପରିଦର୍ଶନରେ ସୋମବାର କେନ୍ଦୁଝର ରେଳ ଷ୍ଟେଶନକୁ ଆସିଥିଲେ। ଏହି ଗସ୍ତ ସମୟରେ କେନ୍ଦୁଝର ସିଟିଜେନ ଫୋରମର ବରିଷ୍ଠ ସଦସ୍ୟ ଇଂ ଅଜୟ କୁମାର ସାହୁଙ୍କ ନେତୃତ୍ୱରେ ଏକ ଦଳ ସହିତ ଜିଲାର ବିଭିନ୍ନ ସମସ୍ୟା ଏବଂ ଫୋରମ ପକ୍ଷରୁ ଦିଆଯାଇଥିବା ଦାବି ଉପରେ ପୁଙ୍ଖାନୁପୁଙ୍ଖ ଆଲୋଚନା କରିଥିଲେ।
ସ୍ମାରକପତ୍ର ଅନୁସାରେ କେନ୍ଦୁଝର ସିଟିଜେନ ଫୋରମ ଅଗ୍ରାଧିକାର ଭିତ୍ତିରେ ପୁରୀ-ବଡବିଲ ଇଣ୍ଟରସିଟି ଟ୍ରେନ୍ ଚଳାଇବାର ଅନୁରୋଧ କରିଥିଲେ ଏବଂ ବରିଷ୍ଠ ଅଧିକାରୀଗଣ ୭ ଦିନ ମଧ୍ୟରେ ପୁରୀ-ବଡବିଲ ଇଣ୍ଟରସିଟି ଟ୍ରେନ୍ ଚଳାଇବା ପାଇଁ ପ୍ରତିଶ୍ରୁତି ଦେଇଥିଲେ। ଇଂ ଅଜୟ ସାହୁ ଅଧିକାରୀଗଣଙ୍କୁ ଅନୁରୋଧ କରି କହିଥିଲେ କି କେନ୍ଦୁଝର ସିଟିଜେନ ଫୋରମ କେନ୍ଦୁଝର ରେଳବାଇ ଉପରେ ଦାବି କରିଥିବା ଦୂରଦୃଷ୍ଟି ସମ୍ପନ୍ନ କଳ୍ପନା ପତ୍ରକୁ ତୁରନ୍ତ କାର୍ଯ୍ୟକାରୀ କରିବାକୁ ଦାବି ଉପସ୍ଥାପନ କରିଥିଲେ। ଏହି ଦାବି କାର୍ଯ୍ୟକ୍ଷମ ହେଲେ କେନ୍ଦୁଝର ଜିଲାରେ ଅନେକ ଶିଳ୍ପାୟନ ହୋଇପାରିବ। ଯେଉଁଥିରେ କେନ୍ଦୁଝରର ଆର୍ଥିକ ଉତ୍ସ ବଳବତ୍ତର ହେବା ସହ ନିଯୁକ୍ତି ସୃଷ୍ଟି ହେବ। ଉକ୍ତ ଅଧିକାରୀଙ୍କୁ ଦିଆଯାଇଥିବା ବିଭିନ୍ନ ଦାବିଗୁଡିକ ମଧ୍ୟରେ ଯଖପୁରା ବାଂଶପାଣି ରେଳପଥର ଦୋହରୀକରଣ ଓ ବୈଦ୍ୟୁତିକରଣ କାର୍ଯ୍ୟର ଶୀଘ୍ର ସମାପ୍ତି, କେନ୍ଦୁଝର ଦେଇ ଭୁବନେଶ୍ୱର-ଦିଲ୍ଲୀ ମଧ୍ୟରେ ଦୁଇଟି ପାସେଞ୍ଜର ଟ୍ରେନ୍ ଚଳାଚଳ, ବଡ଼ବିଲ-ବାଂଶପାଣି ସଂଯୋଗୀକରଣ କାର୍ଯ୍ୟ ଶୀଘ୍ର ଆରମ୍ଭ, କେନ୍ଦୁଝର-ବାଦାମପାହାଡ ସଂଯୋଗୀକରଣ, କେନ୍ଦୁଝରଠାରୁ ହରିଚନ୍ଦନପୁର ଓ ଆନନ୍ଦପୁର ଦେଇ ଭଦ୍ରକକୁ ନୂତନ ରେଳପଥ ଶୁଭାରମ୍ଭ, ଅନୁଗୋଳଠାରୁ କେନ୍ଦୁଝର ରାସ୍ତା ଦେଇ ଖଡଗପୁର ପର୍ଯ୍ୟନ୍ତ ନୂତନ ରେଳପଥର ବିକାଶ, କେନ୍ଦୁଝରଠାରୁ ହାୱଡା ଏକ ଦୈନିକ ଇଣ୍ଟରସିଟି ଚଳାଚଳର ବ୍ୟବସ୍ଥା, ସର୍ବୋପରି କେନ୍ଦୁଝରଠାରେ ଏକ ରେଳଡବା କାରଖାନାର ଭିତ୍ତିିପ୍ରସ୍ତର ସ୍ଥାପନ କରିବା ଏବଂ କେନ୍ଦୁଝର ରେଳ ଷ୍ଟେଶନଠାରୁ କେନ୍ଦୁଝର ସରକାରୀ ମେଡିକାଲ କଲେଜ ପର୍ଯ୍ୟନ୍ତ ଏକ କଙ୍କ୍ରିଟ ରାସ୍ତାା ନିର୍ମାଣ କରିବା ଆଦି ରହିଛି।
