ଭୁବନେଶ୍ୱର,୧୪।୫(ବ୍ୟୁରୋ): ଭୁବନେଶ୍ୱରରେ ପ୍ରଗତିଶୀଳ ସଡ଼କ କରିବା ସହିତ ବିଏମ୍ସିର ବିଭିନ୍ନ ୱାର୍ଡରେ ଅବସ୍ଥିତ ଅନେକ ରାସ୍ତାର ବିକାଶ କରିବା ନେଇ କର୍ତ୍ତୃପକ୍ଷ ପଦକ୍ଷେପ ନେଉଛନ୍ତି। ଏହି ପରିପ୍ରେକ୍ଷୀରେ ଶୁକ୍ରବାର ୩ଟି ବିଭିନ୍ନ ପ୍ରକଳ୍ପ ପାଇଁ ଶିଳାନ୍ୟାସ କରାଯାଇଛି। ସବୁ ପ୍ରକଳ୍ପର ମୋଟ ମୂଲ୍ୟ ୪.୫ କୋଟି ଟଙ୍କା ରହିଛି। ବିଏମ୍ସି ମେୟର ସୁଲୋଚନା ଦାସ, ବିଧାୟକ ଅନନ୍ତ ନାରାୟଣ ଜେନା, ସ୍ଥାନୀୟ କର୍ପୋରେଟର ଏବଂ ସ୍ଥାନୀୟ ଅଞ୍ଚଳର ବିଶିଷ୍ଟ ବ୍ୟକ୍ତିଙ୍କ ଉପସ୍ଥିତିରେ ଏହି ଶିଳାନ୍ୟାସ କରାଯାଇଛି। ୱାର୍ଡ ନଂ.୩୭ ଏବଂ ୩୯ରେ ୩ଟି ରାସ୍ତାର ନିର୍ମାଣ କାର୍ଯ୍ୟ ଶୀଘ୍ର ଆରମ୍ଭ ହେବ। ଏହି ପ୍ରକଳ୍ପରେ ୱାର୍ଡ ନଂ. ୩୯ ଅଧୀନରେ ଥିବା ପ୍ରକଳ୍ପଗୁଡ଼ିକରେ ପ୍ରୋଜେକ୍ଟ ଇନଫ୍ରା ଅଧୀନରେ ଦୁଇଟି ଆଭ୍ୟନ୍ତରୀଣ ରାସ୍ତା ଅନ୍ତର୍ଭୁକ୍ତ। ସେହିପରି ପ୍ରକଳ୍ପଗୁଡ଼ିକରେ ନୂଆସାହି ଲେନ ୨ ଏବଂ ଲେନ ୯ରେ ସଡ଼କର ବିକାଶ କରାଯିବ। ଏହି ଦୁଇଟି ଆଭ୍ୟନ୍ତରୀଣ ରାସ୍ତାର ନବୀକରଣ ମୂଲ୍ୟ ପ୍ରାୟ ୩୩.୫ ଲକ୍ଷ ଟଙ୍କା ରହିଛି। ୱାର୍ଡର ଅନ୍ୟ ଏକ ପ୍ରକଳ୍ପ ଭାବେ ବାଲିଟୋଟା ସାହିରେ ସଡ଼କର ବିକାଶ କରାଯିବ। ସେହିପରି ୱାର୍ଡ ନଂ. ୩୭ରେ ସ୍ମାର୍ଟ ଲୁକ ସହିତ ବିଭିନ୍ନ ସୁବିଧା ଥିବା ଗୁରୁତ୍ୱପୂର୍ଣ୍ଣ ସଡ଼କ ପ୍ରକଳ୍ପ ଶୀଘ୍ର ଆରମ୍ଭ ହେବ। ଏହି ପ୍ରକଳ୍ପରେ ବିଟି ରୋଡ, ଡ୍ରେନ ଏବଂ ପାଦଚଲା ପଥ, ଆଲୋକ ଏବଂ ଉତ୍ସର୍ଗୀକୃତ ପାର୍କିଂ ସ୍ଥାନ ପରି ଅନ୍ୟାନ୍ୟ ସଡ଼କ ସରଞ୍ଜାମ ଅନ୍ତର୍ଭୁକ୍ତ ରହିବ। ପ୍ରସ୍ତାବିତ ସଡ଼କ ଦୈର୍ଘ୍ୟ ପ୍ରାୟ ୨୦୦୦ ମିଟର ରହିବ। ଆସନ୍ତା ୭ମାସ ମଧ୍ୟରେ ଏହି କାର୍ଯ୍ୟ ଶେଷ ହେବ ବୋଲି ଆକଳନ କରାଯାଇଛି। ଭୁବନେଶ୍ୱରର ପ୍ରତ୍ୟେକ ଅଞ୍ଚଳର ନାଗରିକମାନେ ସରକାରୀ ପଦକ୍ଷେପକୁ ସହଯୋଗ କରିବା ପାଇଁ ଆଗେଇ ଆସିବା ଉଚିତ ବୋଲି ମେୟର କହିଛନ୍ତି। ବରିଷ୍ଠ ନାଗରିକ ସଂଘ, ଅଞ୍ଚଳସ୍ତରୀୟ ମହାସଂଘ, ପୂର୍ବତନ କର୍ପୋରେଟର ଏବଂ କର୍ପୋରେଟର ୩୯ ନଂ. ଓ୍ବାର୍ଡ କର୍ପୋରେଟର ଗୀତାଞ୍ଜଳି ସାହୁ, ୩୮ ନଂ. କର୍ପୋରେଟର ପଦ୍ମଜା ପ୍ରିୟଦର୍ଶିନୀ ପ୍ରମୁଖ ଉପସ୍ଥିତ ଥିଲେ। ସୂଚନାଯୋଗ୍ୟ, ଦୀର୍ଘଦିନ ଧରି ରାସ୍ତା ଅବହେଳିତ ହୋଇପଡ଼ି ରହିଥିଲା। ଯାହାଦ୍ୱାରା ଅଞ୍ଚଳବାସୀ ଅନେକ ସମସ୍ୟାର ସମ୍ମୁଖୀନ ହେଉଥିଲେ। ଏ ନେଇ ସାମାଜିକ କର୍ମୀ ଅର୍ଜୁନ ବେହେରାଙ୍କ ନେତୃତ୍ୱରେ ରାସ୍ତା ନିର୍ମାଣ ନିମନ୍ତେ ଅଞ୍ଚଳବାସୀ ଧାରଣାକୁ ଓହ୍ଲାଇଥିଲେ। ରାସ୍ତା ନିର୍ମାଣ ନେଇ ବିଏମ୍ସି ପକ୍ଷରୁ ପ୍ରତିଶ୍ରୁତି ମିଳିବା ପରେ କର୍ପୋରେଟର ଓ ସ୍ଥାନୀୟବାସିନ୍ଦା ଧାରଣାରୁ ଓହ୍ଲାଇଥିଲେ।
