କେନ୍ଦୁଝର, ୧୧।୩ (ସ୍ବ.ପ୍ର.) କେନ୍ଦୁଝର ଜିଲା ମୁଖ୍ୟ ଡାକ୍ତରଖାନାରେ ଲକ୍ଷାଧିକ ଟଙ୍କା ବ୍ୟୟରେ ବସିଥିବା ଅକ୍ସିଜେନ ଜେନେରେଟର କାମରେ ଲାଗୁନି। ଏହା କାର୍ଯ୍ୟକ୍ଷମ ହେବା ଦିନ ଠାରୁ ଅକ୍ସିଜେନ ଲିକ ହେଉଥିବାରୁ ବ୍ୟବହାର ହୋଇପାରୁନାହିଁ। ଫଳରେ ଏହାକୁ ନେଇ ରୋଗୀ ମାନେ ସେବା ପାଇବାରୁ ବଞ୍ଚିତ ରହିଥିବା ବେଳେ ଏହାର ରକ୍ଷଣାବେକ୍ଷଣ ଦାୟିତ୍ୱରେ ଥିବା କର୍ମଚାରୀ ବସି ବସି ଦରମା ନେଉଥିବାରୁ ଲକ୍ଷ ଲକ୍ଷ ଟଙ୍କା ଅର୍ଥ ଅଯଥା ଖର୍ଚ୍ଚ ହେଉଛି।
ପ୍ରକାଶ ଯେ, ଜିଲା ମୁଖ୍ୟ ଡାକ୍ତରଖାନାର ସେଣ୍ଟେନାରୀ ବିଲଡିଙ୍ଗ (ମୁଖ୍ୟ କୋଠା)କୁ ଅନବରତ ଅକ୍ସିଜେନ ଯୋଗାଣ ପାଇଁ ୯୬୦ ଲିଟର ପ୍ରତି ମିନିଟ କ୍ଷମତା ବିଶିଷ୍ଟ ଏହି ଅକ୍ସିଜେନ ଜେନେରେଟର ପ୍ଲାଣ୍ଟ ଗତ ୬ ମାସ ହେଲା ଅକ୍ଟୋବର ମାସରେ ସ୍ଥାପନ କରାଯାଇଥିଲା। ଏହାକୁ ଏକ କମ୍ପାନୀ ସ୍ଥାପନ କରିଥିଲା। ଏହାର ରକ୍ଷଣାବେକ୍ଷଣ ପାଇଁ ଆଉଟ୍ସୋର୍ସିଂରୁ ଟେକ୍ନିକାଲ କର୍ମଚାରୀ ନିଯୁକ୍ତି କରାଯାଇଛି। ଏସବୁ ବାବଦକୁ ଅର୍ଥ ସିଏସ୍ଆର ପାଣ୍ଠିରୁ ଦିଆଯାଉଛି। ତେବେ ତ୍ରୁଟିପୂର୍ଣ୍ଣ ପ୍ଲାଣ୍ଟ ଯୋଗୁ
ଏହା ଠିକ ଭାବେ କାମ କରୁନାହିଁ। ଫଳରେ ଅକ୍ସିଜେନ ଲିକ ହେଉଥିବାରୁ ଏହାକୁ ବ୍ୟବହାର କରାଯାଇପାରୁ ନାହିଁ। ଏଣୁ ଆପାତ୍ତକାଳୀନ ଅକ୍ସିଜେନର ଆବଶ୍ୟକତା ହେଲେ ପୂର୍ବଭଳି କାମ ଚଳା ଅକ୍ସିଜେନ ଯୋଗାଣ କରାଯାଉଛି ବୋଲି ମତପ୍ରକାଶ ପାଉଛି। ଅନେକ ସମୟରେ ଅକ୍ସିଜେନ ପାଇଁ ରୋଗୀଙ୍କୁ ହଇରାଣ ହେବାକୁ ପଡୁଛି। ଏହି ଅକ୍ସିଜେନ ଅନବରତ ଭାବେ ମୁଖ୍ୟ ଡାକ୍ତରଖାନାର ସର୍ଜରୀ, ମେଡିସିନ, ଅସ୍ଥିଶଲ୍ୟ, କାଜୁଆଲିଟି ଆଦି ଅର୍ନ୍ତବିଭାଗ ଓ୍ବାର୍ଡକୁ ଯୋଗାଇଦେବା ପାଇଁ ସ୍ଥାପନ କରାଯାଇଥିଲା। ସେହିପରି କୋଭିଡ ସମୟରେ ଅକ୍ସିଜେନର ଅଧିକ ଆବଶ୍ୟକତା ଦୃଷ୍ଟିରୁ ଏଭଳି ବ୍ୟୟ ବହୁଳ ପ୍ଲାଣ୍ଟ ସ୍ଥାପନ କରାଯାଇଥିଲେ ହେଁ ନିମ୍ନମାନର ଯନ୍ତ୍ରପାତି ବ୍ୟବହାର ହୋଇଥିବାରୁ ଏଭଳି ସମସ୍ୟା ସୃଷ୍ଟି ହୋଇଥିବା ଅଭିଯୋଗ ହୋଇଛି। ଏସମ୍ପର୍କରେ ହସ୍ପିଟାଲ ମାନେଜର ସୂଚିସ୍ମୀତା ଦାଶ କହିଛନ୍ତି ଯେ ଏହା ଗତ ଅକ୍ଟୋବର ମାସରେ ସ୍ଥାପନ କରାଯାଇଛି। ଅଦ୍ୟାବଧି କାର୍ଯ୍ୟକ୍ଷମ ହୋଇ ନାହିଁ। ଏନେଇ ସିଡିଏମଓ ଡ. ସୁଜାତା ରାଣୀ ମିଶ୍ର କହିଛନ୍ତି ବାରମ୍ବାର ପ୍ଲାଣ୍ଟ ବସାଇଥିବା କମ୍ପାନୀକୁ ଚିଠି ଲେଖିବା ସହ ସରକାରଙ୍କୁ ଚିଠି କରାଯାଇଛି। କିନ୍ତୁ ଏହାର ମରାମତି ପାଇଁ କେହି ଆସୁନାହାନ୍ତି। କୌଣସି ଅଘଟଣ ଘଟିବା ଆଶଙ୍କା କରି ଅକ୍ସିଜେନ ଯୋଗାଣ ବନ୍ଦ କରାଯାଇଛି।
