ଭୁବନେଶ୍ୱର,୨୦।୭(ବ୍ୟୁରୋ): କରୋନା ମହାମାରୀ କାୟା ବିସ୍ତାର କରୁଥିବାବେଳେ ଏଥିରୁ ରକ୍ଷା ପାଇବା ପାଇଁ ସରକାର ଟିକାକରଣ ଉପରେ ଗୁରୁତ୍ୱାରୋପ କରୁଛନ୍ତି। ରାଜଧାନୀ ଭୁବନେଶ୍ୱରରେ ମହାମାରୀର ପ୍ରକୋପ ଅଧିକ ରହୁଥିବାରୁ ଏଠାରେ ଟିକାକରଣକୁ ତ୍ୱରାନ୍ବିତ କରିବା ପାଇଁ ବିଏମ୍ସି ପକ୍ଷରୁ ବିଭିନ୍ନ ପଦକ୍ଷେପ ନିଆଯାଉଛି। ଲୋକମାନେ ଯେପରି ଶୃଙ୍ଖଳାର ସହ ଯଥାଶୀଘ୍ର ଟିକା ନେଇପାରିବେ ସେନେଇ ବିଏମ୍ସି ଟିକାକେନ୍ଦ୍ର ବୃଦ୍ଧି କରିଛି। ପୂର୍ବରୁ ୧୨ଟି କେନ୍ଦ୍ରରେ ଟିକା ଦିଆଯାଉଥିବାବେଳେ ଏହାକୁ ବଢ଼ାଇ ୨୭ କରାଯାଇଛି। କେବଳ ବୁଷ୍ଟର ଡୋଜ୍ ନୁହେଁ ବରଂ ଯେଉଁମାନେ ପ୍ରଥମ ଏବଂ ଦ୍ୱିତୀୟ ଡୋଜ୍ ଟିକା ନେଇନାହାନ୍ତି ସେମାନଙ୍କ ପାଇଁ ମଧ୍ୟ ଟିକାକରଣର ବ୍ୟବସ୍ଥା ରହିଛି। କେବଳ ସେତିକି ନୁହେଁ, କୋଭାକ୍ସିନ୍ଠାରୁ ଆରମ୍ଭ କରି କୋଭିସିଲ୍ଡ ଏବଂ ପିଲାମାନଙ୍କ ପାଇଁ କୋର୍ବେଭାକ୍ସ ଟିକା ପ୍ରଦାନ ପାଇଁ ବ୍ୟବସ୍ଥା ହୋଇଛି।
ବିଏମ୍ସି ପକ୍ଷରୁ ଚିହ୍ନଟ ହୋଇଥିବା ୨୧ଟି ସ୍ବାସ୍ଥ୍ୟକେନ୍ଦ୍ର ଯଥା କ୍ୟାପିଟାଲ ହସ୍ପିଟାଲ, ଏମ୍ସ, ବିଏମ୍ସି ହସ୍ପିଟାଲ, ପଟିଆ ୟୁସିଏଚ୍ସି, ୟୁନିଟ-୪ ୟୁସିଏଚ୍ସି, ଡୁମୁଡୁମା ୟୁସିଏଚ୍ସି, ଶହୀଦନଗର ୟୁପିଏଚ୍ସି, ଘାଟିକିଆ ୟୁପିଏଚ୍ସି, ଆଇଆର୍ସି ଭିଲେଜ୍ ୟୁପିଏଚ୍ସି, କଳ୍ପନା ୟୁପିଏଚ୍ସି, ସାମନ୍ତରାପୁର ୟୁପିଏଚ୍ସି, ୟୁନିଟ-୮ ୟୁପିଏଚ୍ସି, ଇସିଓଆର୍, ଶିଖରଚଣ୍ଡୀ ୟୁପିଏଚ୍ସି, ଜିଜିପି ରସୁଲଗଡ଼ ୟୁପିଏଚ୍ସି, ଝାରପଡ଼ା ୟୁପିଏଚ୍ସି, ନୀଳାଦ୍ରିବିହାର ୟୁପିଏଚ୍ସି, ୟୁନିଟ-୩ ୟୁପିଏଚ୍ସି, ବ୍ରହ୍ମେଶ୍ୱର ପାଟଣା ୟୁପିଏଚ୍ସି, ପୋଖରୀପୁଟ ୟୁପିଏଚ୍ସି ଏବଂ ନହରକଣ୍ଟା ୟୁପିଏଚ୍ସିରେ କୋଭାକ୍ସିନ ଦିଆଯିବ। ଏଠାରେ ହିତାଧିକାରୀମାନେ ପ୍ରଥମ, ଦ୍ୱିତୀୟ ଏବଂ ବୁଷ୍ଟର ଡୋଜ୍ ନେଇପାରିବେ। ସେହିପରି ୟୁନିଟ-୯ ୟୁପିଏଚ୍ସିରେ କୋଭିସିଲ୍ଡ ବୁଷ୍ଟର ଡୋଜ୍ ପ୍ରଦାନ କରାଯିବ। ଏଥିସହ କ୍ୟାପିଟାଲ ହସ୍ପିଟାଲ, ଏମ୍ସ, ସତ୍ୟନଗର ୟୁପିଏଚ୍ସି, ଚନ୍ଦ୍ରଶେଖରପୁର ୟୁପିଏଚ୍ସି ଏବଂ କପିଳପ୍ରସାଦ ୟୁପିଏଚ୍ସିରେ ୧୨ରୁ ୧୪ ବର୍ଷର ପିଲାମାନଙ୍କୁ କୋର୍ବେଭାକ୍ସ ଟିକା ଦିଆଯିବ ବୋଲି ବିଏମ୍ସି ପକ୍ଷରୁ ସୂଚନା ଦିଆଯାଇଛି। ସମସ୍ତ ଟିକାକେନ୍ଦ୍ରରେ ପୂର୍ବାହ୍ନ ୯ଟାରୁ ଅପରାହ୍ନ ୧ଟା ଏବଂ ଅପରାହ୍ନ ୩ଟାରୁ ୫.୩୦ ପର୍ଯ୍ୟନ୍ତ ଟିକାକରଣ କରାଯିବ। ତେବେ ଟିକାକରଣ ପାଇଁ ହିତାଧିକାରୀଙ୍କୁ ଅନ୍ଲାଇନ୍ରେ ସ୍ଲଟ୍ ବୁକିଂ କରିବାକୁ ପଡିବ। ପୂର୍ବରୁ ଅନ୍ଲାଇନ୍ ଏବଂ ସିଧାସଳଖ ଭାବେ ଟିକାକେନ୍ଦ୍ରକୁ ଯାଇ ଟିକା ନେବା ପାଇଁ ବ୍ୟବସ୍ଥା କରାଯାଇଥିଲା। ମାତ୍ର ଏହାଦ୍ୱାରା ଅତ୍ୟଧିକ ଗହଳି ହେଉଥିବାରୁ ବିଏମ୍ସି ପକ୍ଷରୁ ଏଭଳି ବ୍ୟବସ୍ଥା କରାଯାଇଥିବା ସୂଚନା ଦିଆଯାଇଛି।
