ଯାଜପୁରରୋଡ୍,୭ା୬(ଡି.ଏନ.ଏ.): କଳିଙ୍ଗନଗରର ମୁଖଶାଳା ଭାବେ ପରିଚିତ କ୍ରମବର୍ଦ୍ଧିଷ୍ଣୁ ଯାଜପୁର ରୋଡ୍ ବା ବ୍ୟାସନଗର ସହରରେ ବଢୁଛି ବାଂଲାଦେଶୀଙ୍କ ସଂଖ୍ୟା। ଫଳରେ ସହରରେ ଦିନକୁ ଦିନ ଚୋରି, ଡକାୟତି ଭଳି ନାନା ପ୍ରକାର ଅସାମାଜିକ କାର୍ଯ୍ୟ ବୃଦ୍ଧିପାଉଛି। ସେମାନେ କବାଡ଼ିଆ ଭାବେ ଆସି ସହରର ବିଭିନ୍ନ ସ୍ଥାନରେ ସରକାରୀ ଜମି, ବସ୍ତି ଅଞ୍ଚଳରେ ବଳପୂର୍ବକ ମାଡ଼ିବସି ଘର କରି ରହୁଛନ୍ତି। ସହରର ରେଳବାଇ ପ୍ଲଟ, ମୁଣ୍ଡମାଳ, ସାପଗାଡ଼ିଆ, ବଙ୍ଗାଳି ସାହି, ଚୋରଦା ବାଇପାସ୍ ଓ ଧବଳଗିରି ଆଦି ଅଞ୍ଚଳରେ ଆଡ୍ଡା ଜମାଇ ବିଭିନ୍ନ ଅସାମାଜିକ କାର୍ଯ୍ୟ କରୁଛନ୍ତି ବୋଲି ଅଭିଯୋଗ ହେଉଛି।
ସେମାନେ ରାତି ଦିନ ସହରର ବିଭିନ୍ନ ଅଞ୍ଚଳରେ ଦଳଦଳ ହୋଇ ବୁଲି ଦୋକାନ ବଜାରରୁ ବାହାରୁଥିବା ଜରି, ପ୍ଲାଷ୍ଟିକ, କାଗଜ ପଟି, ମଦ ବୋତଲ ଓ ବିଭିନ୍ନ କବାଡ଼ିଆ ଜିନିଷଗୁଡ଼ିକୁ ସଂଗ୍ରହ କରି ବିକ୍ରି କରୁଛନ୍ତି। ଏହି ଆଳରେ ଚୋରି, ଲୁଟ୍, ଡକାୟତି, ଅବୈଧ ନିଶା ଓ ଦେହ ବ୍ୟବସାୟ ପରି ବିଭିନ୍ନ ଅସାମାଜିକ କାର୍ଯ୍ୟରେ ଲିପ୍ତ ରହୁଛନ୍ତି, ଯାହାର ଶିକାର ହେଉଛନ୍ତି ଯୁବପିଢ଼ି। କିଛିବର୍ଷ ହେବ ପଶ୍ଚିମବଙ୍ଗର ମୁର୍ସିଦାବାଦ, ମେଦିନପୁର, ଚବିଶ ପର୍ଗନା ଓ ବେହେଲା ଅଞ୍ଚଳରୁ ନିର୍ମାଣ କାର୍ଯ୍ୟ କରିବାକୁ ରାଜମିସ୍ତ୍ରି, ଫେରିବାଲା ଓ କବାଡ଼ିଆଭାବେ ଆସି ଶହଶହ ସଂଖ୍ୟାରେ ପରିବାର ସହ ଏଠାରେ ବସବାସ କରୁଛନ୍ତି। ମଉକା ଦେଖି ଡକାୟତି କରି ଫେରାର ହୋଇଯାଉଛନ୍ତି। ପୋଲିସ ସେମାନଙ୍କୁ କାବୁ କରିବାରେ ବିଫଳ ହେଉଛି।
କେତେଜଣ ସ୍ଥାନୀୟ ନେତା ମୋଟା ଅଙ୍କର ଟଙ୍କା ନେଇ ସେମାନଙ୍କ ନାମ ଭୋଟର ଲିଷ୍ଟରେ ମଧ୍ୟ ସଂଯୋଗ କରିଛନ୍ତି। ସେମାନଙ୍କର କୌଣସି ପରିଚୟ ପତ୍ର ପୌର ପରିଷଦ, ପୋଲିସ କିମ୍ବା ପ୍ରଶାସନ ପାଖରେ ନାହିଁ। ସେମାନ ବାଂଲାଦେଶୀ ରିଫୁଜି ହୋଇଥିବାରୁ କିପରି ଓ କେଉଁ ବାଟେ ଆସୁଛନ୍ତି ତାହା ଜଣାପଡୁନାହିଁ। ପୋଲିସ ସେମାନଙ୍କୁ ତଦନ୍ତ ପରିସରକୁ ନ ଆଣିବା ପ୍ରଶ୍ନବାଚୀ ସୃଷ୍ଟି କରୁଛି। ଆଗାମୀ ଦିନରେ ସେମାନେ ସହରର ଓ ଜନସାଧାରଣଙ୍କ ପ୍ରତି ଅଧିକ ବିପଦ ସୃଷ୍ଟି କରିବାର ସମ୍ଭାବନାକୁ ଏଡ଼ାଇ ଦିଆଯାଇ ନ ପାରେ। ତେଣୁ ଜିଲା ପ୍ରଶାସନ ଓ ପୋଲିସ ଏଥିପ୍ରତି ଗୁରୁତ୍ୱ ସହ ବିଚାର କରିବା ଆବଶ୍ୟକ ବୋଲି ସହରର ବୁଦ୍ଧିଜୀବୀ ମହଲରେ ଦାବି ହେଉଛି। ଏ ସମ୍ପର୍କରେ ଯାଜପୁର ରୋଡ୍ ଆଦର୍ଶ ଥାନା ଅଧିକାରୀ ଉପେନ୍ଦ୍ର ପ୍ରଧାନଙ୍କୁ ପଚାରିବାରେ ସେ କହିଛନ୍ତି, ସହରରେ ରହୁଥିବା ବାଂଲାଦେଶୀ କବାଡ଼ିଆ ଓ ନିର୍ମାଣ କାର୍ଯ୍ୟ ପାଇଁ ଆସୁଥିବା ବାହାର ରାଜ୍ୟର ରାଜମିସ୍ତ୍ରି ଏବଂ ଶ୍ରମିକମାନଙ୍କୁ ସେମାନଙ୍କ ପରିଚୟ ପତ୍ର ଏବଂ ପରିବାରର ଫଟୋ ଥାନାରେ ଆଣି ପ୍ରଦାନ କରିବାକୁ ପୋଲିସ ପକ୍ଷରୁ କୁହାଯାଇଛି। ପରିଚୟପତ୍ର ଦେଲେ ସେମାନଙ୍କ ତଥ୍ୟ ସଂଗ୍ରହ କରାଯିବ। ଏବେ ଦେଖିବାକୁ ଅପେକ୍ଷା ପୋଲିସ ଆଗାମୀ ଦିନରେ ଏହି କାର୍ଯ୍ୟରେ କେତେ ସଫଳ ହେଉଛି।
