କେନ୍ଦୁଝର,୨୦ା୪(ସ୍ବ.ପ୍ର.): କେନ୍ଦୁଝର ଜିଲା ମୁଖ୍ୟ ଡାକ୍ତରଖାନାରେ ମାତୃ ଓ ଶିଶୁ ଚିକିତ୍ସାଳୟରେ ନବଜାତ ଶିଶୁ ସହିତ ପ୍ରସୂତି ମହିଳା ବେଡ୍ ଅଭାବରୁ ତଳେ ଶୋଇବା ଘଟଣା ଚର୍ଚ୍ଚାର ବିଷୟ ହୋଇଛି। ଗୋଟିଏ ନୁହେଁ ଏଭଳି ବହୁ ପ୍ରସୂତି ନବଜାତ ଶିଶୁକୁ ଧରି ତଳେ ଶୋଇଥିବା ଦେଖିବାକୁ ମିଳିଛି। ସାଧାରଣ ଲୋକଙ୍କ ଯାତାୟାତ ସ୍ଥାନ ତଥା ଶିଡ଼ି ନିକଟରେ ଏଭଳି ନବଜାତ ଶିଶୁକୁ ଧରି ଗରିବ ଅସହାୟ ଆଦିବାସୀ ମହିଳା ଶୋଇବା ଉଭୟ ଶିଶୁ ଓ ମା’ର ସାସ୍ଥ୍ୟଗତ ସୁରକ୍ଷାକୁ ନେଇ ପ୍ରଶ୍ନବାଚୀ ସୃଷ୍ଟି କରିଛି। ପ୍ରବଳ ଗରମରେ ମା’ ତା’ର ନବଜାତ ଶିଶୁକୁ ଧରି ଶୋଇବା ଜିଲାରେ ମିଳୁଥିବା ସ୍ବାସ୍ଥ୍ୟସେବାକୁ ପଦାରେ ପକାଇ ଦେଇଛି। ବାଂଶପାଳ ବ୍ଲକର ଜାମୁଡ଼ିହା ଗ୍ରାମର ଲମ୍ବୋଦର ଜୁଆଙ୍ଗଙ୍କ ସ୍ତ୍ରୀଙ୍କ ପ୍ରସବ ଯନ୍ତ୍ରଣା ହେବାରୁ ବୁଧବାର ବିଳମ୍ବିତ ରାତିରେ ମେଡ଼ିକାଲ ଆଣିଥିଲେ। ଆଜି ସନ୍ତାନ ଜନ୍ମ ପରେ ସ୍ଥାନ ଅଭାବରୁ ତଳେ ବାରଣ୍ଡାରେ ଶିଡ଼ି ନିକଟରେ ରଖାଗଲା ବୋଲି କହିଛନ୍ତି। ସେହିପରି ହରିଚନ୍ଦନପୁରରୁ ଆସିଥିବା ଯଶୋଦା ବେହେରାଙ୍କ ଆଜି ସନ୍ତାନ ଜନ୍ମ ହେବା ପରେ ବାରଣ୍ଡାରେ ସ୍ଥାନ ମିଳିବାରୁ ନବଜାତ ଶିଶୁକୁ ଧରି ଶୋଇଥିଲେ। ପ୍ରବଳ ଗରମ ସାଙ୍ଗକୁ ଗରମ ପବନରେ ଏଭଳି ବହୁ ପ୍ରସୂତି ଓ ଶିଶୁ ଚିକିତ୍ସିତ ହେଉଥିଲେ ହେଁ କାହାରି ନଜର ନାହିଁ। ଫଳରେ ଏହାକୁ ନେଇ ଅସନ୍ତୋଷ ପ୍ରକାଶ ପାଇଛି।
