ବରଗଡ଼ ଅଫିସ୍,୨୯।୫: ବରଗଡ଼ ସଦର ଥାନା ଅଧୀନ ପଥର୍ଲା ଛକ ନିକଟରେ ଏକ ହତ୍ୟାକାଣ୍ଡ ଘଟିଛି। କିଛି ଦୁର୍ବୃତ୍ତ ଜଣେ ଟ୍ରାକ୍ଟର ଡ୍ରାଇଭରଙ୍କୁ ଠେଙ୍ଗାରେ ଅତର୍କିତ ଆକ୍ରମଣ କରିବାରୁ ଘଟଣାସ୍ଥଳରେ ତାଙ୍କର ମୃତ୍ୟୁ ଘଟିଛି। ପରେ ଦୁର୍ବୃତ୍ତମାନେ ମୃତଦେହକୁ ବରଗଡ଼ ଜିଲା ମୁଖ୍ୟ ଡାକ୍ତରଖାନାକୁ ନେଇଥିଲେ। ବାରଣ୍ଡାରେ ମୃତଦେହ ପକାଇ ସେମାନେ ଖସି ପଳାଇଯାଇଥିବା ଅଭିଯୋଗ ହୋଇଛି। ମୃତକ ହେଲେ ବରଗଡ଼ ଜିଲା ଅତାବିରା ଆରଏମ୍ସି ପଡ଼ାର ଅଜୟ ଛତ୍ରିଆ(୩୩)। ମୃତକଙ୍କ କାକା ରାଜେନ୍ଦ୍ର ଛତ୍ର୍ରିଆ ଏ ନେଇ ସଦର ଥାନାରେ ଅଭିଯୋଗ କରିଛନ୍ତି। ଅଭିଯୋଗକୁ ଭିତ୍ତି କରି ସଦର ଥାନା ପୋଲିସ ଦଫା ୩୦୨, ୩୪ ଆଇପିସିରେ ଏକ ମାମଲା ରୁଜୁ କରି ମୃତଦେହ ବ୍ୟବଚ୍ଛେଦ କରାଇଛି। ଅଜୟଙ୍କୁ କିଏ ଏବଂ କାହିଁକି ହତ୍ୟା କଲେ ସେ ନେଇ ପୋଲିସ ତଦନ୍ତ ଆରମ୍ଭ କରିଛି।
ପୋଲିସ ସୂଚନା ଅନୁସାରେ, ଅଜୟ ଅତାବିରାର ଜଣେ ଚାଷୀଙ୍କ ଧାନକୁ ଏକ ଟ୍ରାକ୍ଟର (ନଂ.ଓଡ଼ି୧୭ଜି/୫୩୬୩)ରେ ବୋଝେଇ କରି ପଥର୍ଲାର ଏକ ରାଇସ୍ ମିଲ୍କୁ ଆଣିଥିଲେ। ଉକ୍ତ ରାଇସ୍ ମିଲ୍ରେ ଧାନ ଅନ୍ଲୋଡ଼ ହୋଇ ନ ପାରିବାରୁ ସେ ସେଠାରେ ଟ୍ରାକ୍ଟର ରଖି ବବଲୁ ସାହୁ ନାମକ ତାଙ୍କର ଜଣେ ପରିଚିତ ଲୋକଙ୍କ ସହିତ ପଥର୍ଲା ଛକକୁ ଯାଇଥିଲେ। ଏହି ସମୟରେ ଏକ ନାଲି ରଙ୍ଗର କାର୍ରେ ୫ଜଣ ଦୁର୍ବୃତ୍ତ ପହଞ୍ଚିଥିଲେ। ପରେ ସେମାନେ ଅଜୟଙ୍କୁ ଠେଙ୍ଗାରେ ଅତର୍କିତ ଆକ୍ରମଣ କରିଥିଲେ। ଏହାଦେଖି ଭୟରେ ବବଲୁ ସେଠାରୁ ଦୌଡ଼ି ପଳାଇଥିଲେ।
