ପୁରୀ, ୮ା୭ (ଅଜିତ୍ ମହାନ୍ତି): ବିଶ୍ୱର ବିଭିନ୍ନ ସ୍ଥାନରେ ଶ୍ରୀଜଗନ୍ନାଥ ମନ୍ଦିର ରହିଛି। ମହାପ୍ରଭୁ କେଉଁଠି ପଥର ରୂପରେ ତ ଆଉ କେଉଁଠି ମୂର୍ତ୍ତିି ରୂପରେ ପୂଜା ପାଉଛନ୍ତି। ଏଭଳି ଏକ ଅନାଲୋଚିତ ଜଗନ୍ନାଥ ମନ୍ଦିର ଉତ୍ତରାଖଣ୍ଡର ଉତ୍ତରକାଶୀଠାରୁ ୬କି.ମି ଦୂର ସାଲ୍ଡ ଗ୍ରାମରେ ରହିଛି। ସମୁଦ୍ର ପତ୍ତନଠାରୁ ୩ହଜାର ଫୁଟ ଉପରେ ଅବସ୍ଥିତ ଏହି ମନ୍ଦିରରେ ପ୍ରସ୍ତର ରୂପରେ ଜଗନ୍ନାଥ ପୂଜା ପାଉଛନ୍ତି। ଏନେଇ ଶୁକ୍ରବାର ଏକ ଘରୋଇ ହୋଟେଲରେ ଆୟୋଜିତ ଖବରଦାତା ସମ୍ମିଳନୀରେ ଓଲିଉଡ୍ ଅଭିିନେତା ସବ୍ୟସାଚୀ ମହାପାତ୍ର, ଅଭିନେତ୍ରୀ ଅର୍ଚ୍ଚିତା ଏବଂ ଶ୍ରୀମନ୍ଦିର ଛତିଶା ନିଯୋଗ ମହାନାୟକ ଜନାର୍ଦ୍ଦନ ପାଟ୍ଟଯୋଶୀ ମହାପାତ୍ର ସୂଚନା ଦେଇଛନ୍ତି।
ଛତିଶା ନିଯୋଗ ମହାନାୟକ କହିଛନ୍ତି, ସେ ଯେତେବେଳେ ଉତ୍ତରକାଶୀକୁ ଯାଇଥିଲେ ଜାଣିବାକୁ ପାଇଥିଲେ ସେଠାରେ ମହାପ୍ରଭୁ ଜଗନ୍ନାଥଙ୍କ ମନ୍ଦିର ରହିଛି। ସେ ସେହି ମନ୍ଦିରକୁ ଯାଇଥିଲେ ମଧ୍ୟ ପହୁଡ଼ ପଡ଼ିଥିବାରୁ ଦର୍ଶନ କରିପାରି ନ ଥିଲେ। ସେଠାରେ ମହାପ୍ରଭୁ ଅଖିଆ ଅପିଆ ରହୁଥିବା ତାଙ୍କୁ ବ୍ୟଥିତ କରିଥିଲା। ପରେ ସେ ଏନେଇ ଅଭିନେତା ସବ୍ୟସାଚୀଙ୍କୁ ଜଣାଇଥିଲେ। ସଂଯୋଗବଶତଃ ସେହି ସମୟରେ ଅର୍ଚ୍ଚିତାଙ୍କର ଏକ ସୁଟିଂ ଉତ୍ତରାଖଣ୍ଡରେ ଥିଲା। ସବ୍ୟସାଚୀ ଓ ଅର୍ଚ୍ଚିତା ସେହି ମନ୍ଦିରକୁ ଯାଇଥିଲେ। ତେବେ ସେଠାରେ ଜଗନ୍ନାଥଙ୍କ ଦାରୁମୂର୍ତ୍ତି ବଦଳରେ ଶିଳାମୂର୍ତ୍ତି ରହିଛି। ଜଗନ୍ନାଥଙ୍କ ପୂଜା ଠିକ୍ ଭାବେ ହେଉ ନ ଥିବା ବେଳେ ପ୍ରସାଦ ଠିକ୍ ଭାବେ ଲାଗି ପାରୁନାହିଁ। ତେଣୁ ମହାପାତ୍ର ବାହୁଡ଼ା ଯାତ୍ରା ଦିନ ଉକ୍ତ ମନ୍ଦିରରେ ପୂଜା କରିବାକୁ ଚେଷ୍ଟା କରିଥିଲେ। ମନ୍ଦିର ନିକଟ ୫ଟି ଗ୍ରାମର ଲୋକଙ୍କୁ ଏକାଠି କରି ପୂଜାର୍ଚ୍ଚନା ଆୟୋଜନ କରିଥିଲେ। ସ୍ଥାନୀୟ ଗ୍ରାମର ଲୋକଙ୍କ ଇଷ୍ଟଦେବତା ପ୍ରଭୁ ଶ୍ରୀଜଗନ୍ନାଥ। ଏଭଳିକି ସେମାନଙ୍କ ଲୋକ ଗୀତ ଓ ଝିଅ ବିଦାୟୀ ଗୀତରେ ଶ୍ରୀଜଗନ୍ନାଥଙ୍କ ନାମ ନେଇ ସ୍ମରଣ କରିଥାନ୍ତି। ସେହିପରି ସବ୍ୟସାଚୀ କହିଥିଲେ, ସେ ଏହି ମନ୍ଦିର ଉପରେ ଡକ୍ୟୁମେଣ୍ଟାରି ପ୍ରସ୍ତୁତ ପାଇଁ ଓଡ଼ିଆ ଲୋକଙ୍କ ସହାୟତା ନେଇଥିଲେ। ବ୍ରହ୍ମପୁରର ଜଣେ ଓଡ଼ିଆ ବ୍ୟକ୍ତି ସୋସିଆଲ ମିଡିଆରେ ଏହି ଭିଡିଓ ଦେଖି ସେଠାକାର ପ୍ରଶାସନକୁ ମେଲ୍ କରିଥିଲେ। ସେ ଏବଂ ଅର୍ଚ୍ଚିତା ସେଠାରେ ଥିବାବେଳେ ଉତ୍ତରାଖଣ୍ଡ ଉତ୍ତରକାଶୀ ପର୍ଯ୍ୟଟନ ବିଭାଗର ଅଧିକାରୀ ସେଠାରେ ପହଞ୍ଚିଥିଲେ। ଏସବୁ ମହାପ୍ରଭୁଙ୍କ ଲୀଳା। ମନ୍ଦିର ରକ୍ଷଣାବେକ୍ଷଣ ଓ ଉନ୍ନତି ପାଇଁ ସେ ୬ମାସ ପର୍ଯ୍ୟନ୍ତ ସମସ୍ତ ଦାୟିତ୍ୱ ନେଇଛନ୍ତି। ଉକ୍ତ ମନ୍ଦିରର ପ୍ରଚାର, ପୁନରୁଦ୍ଧାର ଓ ବିକାଶ ପାଇଁ ସେ ଉତ୍ତରାଖଣ୍ଡ ସରକାର, କେନ୍ଦ୍ର ପର୍ଯ୍ୟଟନ ବିଭାଗ, ଉତ୍ତରକାଶୀ ଏବଂ ରାଜ୍ୟ ସରକାରଙ୍କ ନିକଟରେ ନିବେଦନ କରିଛନ୍ତି ବୋଲି ସବ୍ୟସାଚୀ କହିଛନ୍ତି। ଲୋକକଥା ଅନୁଯାୟୀ, ଉକ୍ତ ମନ୍ଦିରରେ ଜଗନ୍ନାଥଙ୍କ ବିଗ୍ରହ ମାଟିତଳୁ ଆବିର୍ଭାବ ହୋଇଛନ୍ତି। ଥରେ ଜଣେ ବ୍ୟକ୍ତି ହଳ କରୁଥିବା ସମୟରେ ହଳ ଉକ୍ତ ଶିଳାରେ ବାଜିଥିଲା, ଯାହାର ପ୍ରମାଣ ଏବେ ବି ରହିଛି। ଶିଳାଦେହରେ ୭ଟି ଗାର ରହିଛି। ସେହିପରି ଆଦି ଶଙ୍କରାଚାର୍ଯ୍ୟ ୧୨୦୦ ମସିହାରେ ଏଠାକୁ ଆସି ଜଗନ୍ନାଥ ଶିଳା ପ୍ରତିଷ୍ଠା କରିଥିଲେ। ଏହି ମନ୍ଦିରରେ ଶ୍ରୀଜଗନ୍ନାଥଙ୍କ ବ୍ୟତୀତ ହନୁମାନ, ଗଣେଶ, ଦୁର୍ଗା ଆଦି ପୂଜା ପାଉଛନ୍ତି।
